1 Ndzo mitã ɔmagɛ̃ wɔ nse lɛ sigaraikoto, ɔ̃ ame i Efrayim matarɛ̃dze sɛ makɔlɛ so kato,

ma ikɛrɛso sɛɛ nɛ nto ibɛ lɛ aɣɔ̃la wa loɔɣɔ,

ndzo mitã matarɛ̃dze ma nsi i abe iso

i kugbolomi gɔ mba iɖa itititɛ̃.

2 Nyɔ, Bosate ba nwɔ mba ɔle gu kuwarɛ

lɛ kado wɔ nsɛgu atumagirĩ gu awɛ,

lɛ kado wɔ lopɛ ɔtã ndu ɔyi minina ara,

ngbɔ ɔ̃asu wũ ɔwuĩ i karɔ̃ ne.

3 Maabibio Efrayim

matarɛ̃dze ma nsɛ makɔlɛ so kato sigaraikoto ala ngba.

4 Ma ikɛrɛso sɛɛ nɛ nto ibɛ lɛ aɣɔ̃la wa loɔɣɔ

i kugbolomi gɔ mba iɖa itititɛ̃,

aase lɛ aboi wa lobe aɖegu wã isɔrɛ̃ katɔ̃.

Si ɔturi ɔnya ɔpɛ ne inɔ iso fiɛ ɔtɔrɛ ne ne,

ɔ̃ame ne.

5 Ɔwi wɔmɔ ame ne, Bosate Ɔlesate

aaɖe sigaraikoto nɛ nto ilɛnyɔ

aɣɔ̃la ika nɛ nto ilɛnyɔ

ɔtã ɔ̃ maturi kutia.

6 Ɔ̃aɖe atɔ̃meiɣɛ i ɔri iso siwarã

ɔtã atɔ̃meɣɛdze,

ɔ̃aɖe ɔle ɔtã

mma nɣɛ i kayogodɔ̃ to masa mma nto makpɛ̃gu ma.

7 Ɣɛɛ mmagbe ana ɔnɛ ndã mato marɛ̃,

manɛ ndã mɛ mba ɔle mato marɛ̃, manene mapia so;

Masɔrɛdze gu kanyamaɖidze to marɛ̃ ndã,

ndã ɔɔkpɔkpɔtɔra ma

mato manene mapia so

marɔ̃ mabo so iso si mato manya kaɖikate

matutura so iso si mato mabara adzuni.

8 Mara kura mafere i sipɔrɔ̃ ɔɖuɖu iso,

fiɛ kakɔi kukawɛ̃ na gɔ i anyanyara na.

9 "Nna ɔto ɔbie sɔ ɔ̃ate ara?

Nna ɔto ɔbie sɔ ɔ̃aɖi ɔ̃ itɔ̃me karɔ̃ ɔte?

Mabiɛtɛ wiriwiria ma ka to maanyua inyɛ itã,

mabiɛtɛ ma maɖi inyɛ kere?

10 Alasɔ maɣɛ sɔ:

Bara si abara, bara si abara,

mmara i mmara iso, mmara i mmara iso

kɛkɛĩ i ngbe, kɛkɛĩ i mmɔ."

11 Ne ɔso i ɔnukuare ame ne, sifɔɖe gu siɖe mama

i Ɣaa aasu ɔɖegu maturi magbe ika,

12 ɔɣere ma sɔ,

"Nya kawãrakɔ̃ i ngbe, mma iɔɖa si mawarã";

ana ne, "Nya kasorakɔ̃"-

ɣɛɛ maibakã atsue.

13 Ne ɔso Bosate itɔ̃me itã ma loaɖe sɔ:

Mibara si mibara, mibara si mibara,

mmara i mmara iso, mmara i mmara iso;

ngbe kɛkɛĩ, mmɔ kɛkɛĩ

si maasɛ simasima masɛ maarɔ̃

mare igbɛ, mabo i iyebi ame fiɛ maamɔɛ̃ ma.

14 Ne ɔso mi ma nsɛ mibara aɣiãra, minɔ Bosate itɔ̃me

mi ma nto miɖe maturi magbe iso i Yerusalem.

15 Misɛ miɖe ndamu sɔ, "Boɔnyikanya ku kukpi,

bonyikanya ku ikpibiɔ ana.

Si kadziri ga i Ɣaa to ɔpɛ ala maturi ɔba ne,

kaibapɛgu bo,

alasɔ bosu sila bobara bo katarikɔ̃

fiɛ sila ame nɖe bo kawɛrɛkɔ̃ ne."

16 Ne ɔso Bosate, Wɔ Nsiguso sɔ,

"Minyɔ, losɛ ita i Zion,

ita nɛ maɔkere manyɔ,

ita nɛ lofɔ kuɣa fiɛ iaɖe ɔyokã ame ita nɛ iso i iyo aasia;

kunuarɛ iibakpɛ̃ nwɔ losiaiti i ne iso kunya.

17 Loasu atɔ̃meiɣɛ i ɔri iso lobara iwɛĩ nɛ masusu ala ara

gu sibɔlɔlɔ lobara iwɛĩ nɛ loasusu ala itɔrɔrɔ.

Awɛ gu atumagirĩ aasore mila mɛ nɖe mi kawekɔ̃ iruigu,

fiɛ ndu aayi mibore mife mi kawɛrɛkɔ̃.

18 Maasa ɔri mapia i mi kanya ga minyigu kukpi;

nga minyigu ikpibiɔ ana iibabara karabara.

Ɔwi wɔ i kutsueikpadzɛ̃ kadziri aaba teteree ne,

kato kaapɛ mi kawuĩ i karɔ̃.

19 Ayi kumɛgɔ kato kaba ne, kato kaasore mi karuigu;

kaya biara, kasɛ̃ i kakɔme,

kato kaaki mi iso kafe."

Itɔ̃me nɛgbe karɔ̃inɔ

aabɔ ifɔ̃ gbaã.

20 Karɛkɔ̃ ɔfe ikurukutu sɔ maisibawo wũ ɔnabarã,

kundu ana iibɛ gɔ aawarɛ afu so.

21 Bosate to ɔ̃ata ɔya lɛ ɔbara i Perazim Kube iso,

ɔto ɔ̃ana sikpã lɛ ɔna i Gibeon Kagbolomi ame

sɔ ɔ̃abara ɔ̃ karabara ga mba ifɔ̃ gamɔ,

ɔ̃awiri ɔ̃ karabara ga igbã ɔĩbara ɔnya.

22 Kiniɔ ne ka minyua aɣiãra,

si iiɖe ngbɔ mi kugbagɔrɔĩ to kuawe ɔrɔrã kubua;

Bosate Ɔlesate ɔɔɣere me

kumɛgɔ ɔto ɔba ɔ̃awɔra karɔ̃ ɔɖuɖu.

23 Kã atsue si anɔ me silɔ;

warɛ atsue si anɔ nnɛ loto loɣɛ.

24 Kpɛ̃dze wɔ nto ɔpupuri karɔ̃ sɔ ɔ̃apia ɔraɖui ne, ɔ̃isɛ ɔpia ɔkɛ?

Ɔwi biara ɔsɛ ɔpupuri karɔ̃ ɔsia siɖebiri?

25 Si ɔ̃ɔledza karɔ̃ ɔro ne,

ɔ̃isɛ ɔsa sikɔ̃ gu asalabi?

Ɔ̃isɛ ɔpɛ kakpã i kã kasɛ?

Ɔpɛ atita i wã kasɛ

fiɛ ɔpɛ kakpã ga i siguri iso i kume iso?

26 Ɔ̃ Ɣaa sɛ ɔtã wũ asɛra

fiɛ ɔsɛ ɔte wũ ɔri sɛɛ.

27 Maisɛ mapɛ asalabi i ikolo iso,

ɣee masu kukɔtɛ i sikɔ̃ abi iso;

ɔdziri masɛ masu maɖeɖe maɖi asalabi,

fiɛ sikɔ̃ abi ne, ɔwete masɛ mawete maɖi wã.

28 Masɛ makɔtɛ ɔrãu matã araɖea iwa;

ne ɔso kuwɛ̃ iisɛ ɔkɔtɛ ɔwi biara

atoasɔ ɔsɛ ɔkã apɔngɔ ku kabore ɔki i kamɔ ame ne,

ɔ̃ apɔngɔ iibapɛ kamɔ.

29 Nwagbe ɔɖuɖu ana ne, Bosate Ɔlesate kɔrɛ ibɔrɛ,

ɔ̃ adzuni itã ba ɣii, fiɛ ɔ̃ iwola ɔwodoro gbaã.