1 Ikɔ nɛ i Asiria igara Sargon ɔpia ɔ̃ kpakpɛ̃dzekpakpa Tartan ɔsɛ ɔ̃akpɛ̃gu Asdod ɔmagɛ̃ ɔmɔɛ̃ ma i kakpã ame ne, 2 ɔwi wɔmɔ ame i Bosate ɔɣɛ ɔkigu i Yesaya, Amoz ɔbi iso ɔɣere wũ sɔ, "Bɛ ipundukoto wɔ anyi so, si aɖi ntokota i fɔ ngba." Ne ɔso ɔbara ngbɔ ɔɖi so ara ɔsɛ ngba kunu ɔki.

3 Kere ne Bosate ɔɣɛ sɔ, "Kumɛgɔ ame i wũ ɔɖabo Yesaya ɔɖi isɔ̃ ɔsɛ ngba kunu akɔ atɛ ne, iaɖe ikparĩ gu inyaisɛ itã Egipte gu Nubia 4 sɔ ngbɔ i ma Asiriase igara aaɖi Egipte gu Nubia mabiɛtɛ gu makpakpa ma mamɔɛ̃ i kakpã ame isɔ̃, masɛ ngba kunu ɔpia Egipte kunuarɛ ne. 5 Kunuarɛ aamɔɛ̃ mma losu ma ati masia i Nubia iso fiɛ masɛ masu Egipte maɖe ala ndamu. 6 Ɔwi wɔmɔ ame ne, mma nsi i ɔpo kuruɛ ngbe aaɣɛ sɔ, 'Minyɔ nnɛ lobɔrɛ i mma iso bosiaiti, mma botere botarĩgu sɔ mabuai bo si mafɔ bo i Asiria igara nrɔɔ̃ ame! Nda ka boabara fiɛ boatere?' "