1 Ɣɛɛ kiniɔ ne nnɛgbe i Bosate to ɔɣɛ ne -

O Yakob, nwɔ lobara-ɔ,

O Israel, nwɔ losasa-ɔ sɔ,

"Daanigã, alasɔ loɔɖi-ɔ;

loɔkpere fɔ iyere; wũ ɔre aɖe.

2 Si aki i ndu ame,

loawegu-ɔ;

fiɛ si aki i siwore ame afe ne,

siibamɔɛ̃-ɔ asɛ ndu.

Si asɛ aki i ɔtɔ ame ne,

aibatsue ɔtɔ.

Ɔtɔ sinyagɛmi iibatsuedza-ɔ.

3 Alasɔ Mme nɖe Bosate, fɔ Ɣaa,

Israel Ɔsekelea, fɔ Ɖidze;

losu Egipte lotã kuso i fɔ iti,

Kus gu Seba i fɔ kanya.

4 Gɔ afɔ kuɣa fiɛ nsɛ lowarɛ-ɔ i wũ anɔmi ame,

gu ala nsɛ loɖɔɛ ɔso ne,

loasu maturi lonyuarã i fɔ kanya,

fiɛ loasu maturi lonyuarã ku fɔ ngbã.

5 Daanigã, alasɔ lopiagu-ɔ;

loakpadzɛ̃ fɔ mabi lobɔrɛgu i kuɣɛ̃kabɔrɛkɔ̃ lobɔ

fiɛ loasa-ɔ kanya lobɔrɛgu i kuɣɛ̃iyokabokɔ̃.

6 Loaɣere kato isɛ sɔ, 'Ɖi matã!'

fiɛ loaɣere kala isɛ sɔ, 'Daafɔ ma asɛ.'

Kpadzɛ̃ wũ mabibirɛrɛĩ bɔrɛgu kadzorokɔ̃

si akɔ wũ mabibirɔ̃gomi abɔrɛgu i karɔ̃ kuwirikɔ̃ -

7 ɔbiara wɔ masɛ makperegu wũ iyere,

nwɔ lobara lotã wũ ikpawaĩ,

nwɔ lopɔ fiɛ lobara."

8 Bosate sɔ, "Kɔ maturi ma mba anɔmi ɣɛɛ mabiɛ anɔmi bɔ me,

mma mba atsue ɣɛɛ maisɛ mawo ara ɔnɔ bɔ me.

9 Nɖebi ɔɖuɖu ɔɔsa so kanya

fiɛ maturi ɔsikanya.

Nna i ma ndɛ̃ lonya nnɛgbe ɔɣɛ ɔsɛ

fiɛ ɔpɛ imomo i ɔwiɔ ara iso ɔtã bo?

Tã mabɔ ma maɖansiɛ si ite sɔ ma ɔkpɛ ɔya,

si maturi mama aanɔ fiɛ maaɣɛ sɔ, "Gbaã iɖe."

10 Bosate sɔ, "Mi nɖe wũ maɖansiɛ,

"gu wũ maɖabo ma loɖi,

si miatsue fiɛ miafɔ me miɖe

fiɛ mianɔ karɔ̃ sɔ Mme nɖe ɔ̃.

Ɣaa mama kuwɛ̃ na fiɛ Mme,

ngbɔ ame i ɣaa kuwɛ̃ iibawe i wũ kama ne.

11 Mme, ana ne Mme, nɖe Bosate,

fiɛ wũ kama ne ɖidze kuwɛ̃ siina.

12 Loɔɖi lote, loɖi fiɛ loɔpɛ imomo -

sɔ Mme, fiɛ iiɖe kafɔrɔ̃ ɣaa mpia i mi ndɛ̃.

Mi nɖe wũ maɖansiɛ." Bosate sɔ, "Mme nɖe Ɣaa.

13 Aĩ, fiɛ ta kokooko ne Mme nɖe ɔ̃ ne.

Kuwɛ̃ iibawo ɔpɛ ɔfɔ i wũ kɔrɔ̃ ame.

Si lobara ira ne, nna loawo ne ɔkpesera kama?"

14 Bosate

mi Ɖidze, Israel Ɔsekelea sɔ,

"Ala mi iti ne, loasese ɔturi Babilon

loawarã ma Kaldease,* maturiterea mamɔ ɔɖuɖu,

gu ma nduisoabuɛ wa ame masɛ mana isoɣɔ.

15 Mme nɖe Bosate, mi Ɔsekelea,

Israel Baradze, mi Igara ne."

16 Bosate sɔ -

ɔ̃ wɔ loɖi ɔri ɔkigu i ɔpo ame,

ɔɖi ɔri ɔkigu i ndu gbodzoo ame,

17 ɔ̃ lotã kubore, apɔngɔ

gu makpakpɛ̃dze gu makpãrɛrɛĩ ɔmɔɛ̃ ɔri,

marɔ̃ marɛ i karɔ̃, miasiwo ɔta ɖuɖuuɖu ana,

fiɛ ɔtã ma nnya ɔkpi lɛ kumɛgɔ i ɔkaniɛ ame ikatisɛ sɛ inyi awe loɣɛ sɔ,

18 "Miɣara ara kuere;

midaasu ara wa loɔba afe mipia i adzuni ame.

19 Minyɔ lo, loto lobara ira ɣɛtɛ!

Ka ito ibɔrɛ kayi; miito minya ne ɣɛɛ?

Loto loɖi ɔri lokigu i fafuĩ ame

fiɛ kuworei to kugodɛ̃ i igbigbi ame.

20 Kuputubɔi si kupia me kuwarɛ,

aboroi gu kutikuku,

alasɔ nsɛ lotã ndu i fafuĩ ame,

ku kuworei i igbigbi ame,

si lotã wũ maturi ndu, mma loɖi lotã so,

21 maturi ma lobara lotã so

sɔ maapɛ wũ ile imomo.

22 "Ɣɛɛ O Yakob, miisikpere me mikarɛ kabuai,

O Israel, miisipia so iɖa ala wũ ɔso.*

23 Miisito misu masɛrɛ miba miabara araifɛ̃ asɔrɛ,

fiɛ miisɛ mipia me kuwarɛ ku mi asɔrɛ.

Loisu geɖebu asɔrɛ ibara losia mi iso

ngbɔ ame loiɖaa mi sɔ mibɔ kuakɔrɔ̃kɔrɔã ne.

24 Miiɣa kuakɔrɔ̃kɔrɔã kukuwɛ̃ mibɔ me,

ngbɔ ame miipia me ɔmɛrɛ̃ ku mi mabɔi iɖa ne.

Ɣɛɛ mi akpi misu misia ato mitã me.

Ne aɖaa me ku mi aɣɛrɛ ne.

25 "Mme, kɔraa Mme nsɛ lonukutu fɔ

akpi, ala wũ mɔmɔ ɔso,

fiɛ loisɛ lonyigi fɔ akpi ana.

26 Nyigi si adzuĩ ɔwiɔ atã me,

tã bokɛlɛ atɔ̃mekaɣɛkɔ̃.

Ɣɛ nnɛ lobara lota loya-ɔ iso, si ite sɔ fɔ ɔkpɛ ɔya.

27 Mi ɔwa ɖeakatɔ̃ ɔbara ikpi;

fiɛ ma matɔ̃ɖedze ɔɣɛrɛ mata maya me iso.

28 Ne ɔso loasopara fɔ isɔrɛyo makpakpaturi,

fiɛ loaɖi Yakob nrɔɔ̃ sɔ mawɔra wũ pelepele,

fiɛ Israel ase lɛ simaira.