1 Ɣɛɛ mma lowe i idududu ame iisibawe i ibo ame. Ɔwiɔ ne, ɔpia Zebulon gu Naftali karɔ̃ kunuarɛ, ɣɛɛ ɔwi wɔ nto ɔba ne, ɔto ɔ̃apia Galilea, ngbegɔ i mma loiɖe Israel mabi fiɛ masi i ɔri wɔ lota i Yordan ɔwore iso ikɛlɛ ɔpo siare kuruɛ kuwarɛ.

2 Kaɖe ga nsɛ i idududu ame

ɔnya ɔtɔ siare;

mma nsi i karɔ̃ ga iso i kukpi ifɔ̃ fu lɛ idududu ne,

ɔtɔ ɔɔfiɛ ɔfere ma.

3 Ɔɔmɔdza kaɖe

atã ma isoɣɔ ɔsi;

mato mana isoɣɔ i fɔ katɔ̃

lɛ kumɛgɔ i so sɛ siɣɔ maturi ku ɔraɖui ɔsɔrɛwi;

lɛ kumɛgɔ i so sɛ siɣɔ marɛrɛ̃

si mato maɣɛ so kakpãramɔɛã.

4 Alasɔ lɛ ɔwi wɔ aɖe ma Midianse iso i kakpã ame ne,

ɔɔfɛ̃ ikpo nɛ ame mapia ma

ikpo nɛ lokpese ma ato,

ɔnyigbã wɔ losia i ma amɔiti

gu kadziri ga i ma matsirise ɔɖeɖe ma.

5 Kpãrɛrɛĩ biara ntokota mɛ ɔpia i kakpã ame

gu awu biara wa lopie ima ne,

maaɖi wã masɛ matã itsuedza,

aaɖe ara wa maapia i ɔtɔ.

6 Alasɔ maɣe ɔbi matã bo

matã bo ɔbibirɛrɛĩ

fiɛ iɖeiso asia i ɔ̃ amɔiti,

fiɛ maakpere wũ sɔ,

Adzunitãdze Wɔ Mba Ɣii, Ɣaa wɔ lomɔ.

Ɔse wɔ mpia ɔwi biara, Isobuɛ Igara Ɔbirɛrɛĩ.

7 Ɔ̃ iɖeiso gu isobuɛ to ikɔlɛ kato

gɔ iibaro inya.

Ɔ̃asɛ i David sigaraiyara iso ɔɖeiso

i ɔ̃ sigarakaɖekɔ̃ iso,

ɔɣedza sɛ̃ i ngba iso ɔmɔɛ̃ sɛ̃ ɔla

ku sibɔlɔlɔ gu atɔ̃meiɣɛ i ɔri iso

ita i ɔwi wɔmɔ ikpa ɔwi daaro.

Bosate Ɔlesate ɔɔɖo

sɔ ɔ̃abara ngbɔ.

8 Sate ɔɔsia Yakob kanya sɔ ɔ̃akpadzɛ̃ wũ kutsue;

kutsueikpadzɛ̃ nɛ loaba i Israel kaɖe iso.

9 Maturi ɔɖuɖu to maatsue ne,

Efrayim kaɖe gu mma nsi i Samaria -

fiɛ masɛ maɖe ika ku katoikɔlɛso

gu ituridaawarɛ i situ ame sɔ,

10 "Sise ayo ɔɔbibiɛ,

ɣɛɛ boatsue ata ayo i wã kanya

maɔpɛ bo abo mawiri,

ɣɛɛ boapia seder adziri i wã kanya."

11 Ɣɛɛ Bosate ɔɔpia Rezin matsirise ɔle ɔtara ɔpia i ma iso,

fiɛ ɔto ɔpia ma matsirise mama ɔle.

12 Ma Aramse ɔbɔrɛ i kuɣɛ̃kabɔrɛkɔ̃, gu ma Filistise i kuɣɛ̃iyokabokɔ̃ isɛ

ɔɔbɛ anyɛ mato maakɛkɛ Israel.

Ɣɛɛ i nwagbe ɔɖuɖu ame ne, sikpã iiɣɔ wũ,

ɔkɔlɛ ɔ̃ ikama ɔto.

13 Ɣɛɛ kaɖe ɔsɛ̃ sɔ maibakpese makɛlɛ nwɔ lopɛ ma kɔrɛ,

ɣee manyɔnyɔ Bosate, Ɔlesate.

14 Ne ɔso Bosate to ɔ̃atu Israel iti gu ɔkã,

ɔtu ɔkɛ gu kakpeku ɔɖi ku ikpɛnɛ iwɛ̃saã ame.

15 Kaɖe makpakpa gu maturi taaso nɖe iti,

kanyamaɖidze ma nsɛ mate mila ara nɖe ɔkã.

16 Mma nto makɔkɔ maturi magbe to makɔ ma mayura,

fiɛ mma mato makɔkɔ ana ɔɔyu ɔri.

17 Ne ɔso so iibaɣɔ Sate i maporoporoi iso,

fiɛ ɔ̃ibanyɔ makpisemabi gu makpisemare nnya,

alasɔ ma ɔɖuɖu iisɛ manigã Ɣaa fiɛ maba ɔtile,

anyanyara sɔɔ̃ nsɛ abɔrɛ i ma nnya ame.

Ɣɛɛ i nwagbe ɔɖuɖu ame ne, sikpã iiɣɔ wũ,

ɔkɔlɛ ɔ̃ ikama ɔto.

18 Gbaã ne, ɔtile to ɔtsue lɛ ɔtɔ;

ɔto ɔ̃atsuedza akora gu miyu,

ɔsɛ ɔpia apo kpirikpiria ɔtɔ,

ne ɔso kuyɔ to kuta lipii.

19 Bosate Ɔlesate sikpã ɔso ne,

karɔ̃ aatsue,

maturi aakpese ndɔrɛ̃ matã ɔtɔ,

kuwɛ̃ iibafɔ ɔ̃ ɔnyii.

20 I kuɖearɔ̃ iso ne, maawe ara,

ɣɛɛ kukã to kuakpɛ̃ ma;

i kubena iso ne, maaɖe ara

ɣɛɛ maibami.

Ɔbiara aawe ɔ̃ mɔmɔ ɔbi.

21 Manase aawe Efrayim fiɛ Efrayim aawe Manase;

fiɛ ma inyɔ ɔɖuɖu aafiriki mabo i Yuda iso.

Ɣɛɛ i nwagbe ɔɖuɖu ame ne, ɔ̃ sikpã iibaɣɔ,

ɔkɔlɛ ɔ̃ ikama ɔto.