1 Ndzo mitã mma nsɛ mabara mmara nyanyariã,

mma nsɛ mabara mmara mɛ loanyi maturi,

2 mmara mɛ loibatã mawɛrɛba iwarã,

mmɛ loibatã wũ maturi ma mabuka mapia ɔna atɔ̃meiɣɛ sɛɛ.

mayika makpisemare mapia

mayu makpisemabi ara.

3 Be miabara ku iyi nɛ maakpadzɛ̃ mi kutsue,

fiɛ itikpi aabɔrɛ i kadzorokɔ̃ iba?

Nna miatere mitarĩgu?

Lɛ mianyua mi karana misɛ?

4 Kuira iisikuti iɖo sɔ maamɔɛ̃ mi makɛlɛgu sisande ame,

ɣee maɖoe mi i kakpã ame.

Ɣɛɛ i nwagbe ɔɖuɖu ame ne, sikpã iiɣɔ Ɣaa,

ɔkɔlɛ ɔ̃ ikama ɔto.

5 "Ndzo mitã Asiria wɔ nɖe wũ sikpã kadziri,

nwɔ nrɔɔ̃ ame i wũ sikpã ikpo pia!

6 Loto lopia wũ i kaɖe ga loiɣe Ɣaa kɔrɛ,

loto losese wũ i maturi ma lopia me sikpã kɔrɛ,

sɔ maabodza, mafɔ kakpãramɔɛã;

mabio maturi lɛ iba i sivurã iso.

7 Ɣɛɛ iiɖe nnɛgbe iɖe ɔɖo,

iiɖe nnɛgbe mpia wũ i adzuni ame;

ɔ̃ adzuni nɖe sɔ si ɔnina ara,

si ɔwɔra nɖebi gbodzoo.

8 Ɔɣɛ sɔ, 'Wũ makpakpɛ̃dze makpakpa ɔɖuɖu ne, iiɖe magara maɖe?

9 Kalno ne, ɔ̃ise lɛ Karkemis?

Xamat ne, ɔ̃ise lɛ Arpad,

fiɛ Samaria ne, ɔ̃ise lɛ Damasko?

10 Lɛ kumɛgɔ i wũ kɔrɔ̃ ɔfɔ sigarakuɖekɔ̃ gɔ nsɛ kusɔrɛ aɣɔ,

sigarakuɖekɔ̃ gɔ aɣɔ loɖo Yerusalem gu Samaria are ne, -

11 ngbɔ ame loabara Yerusalem gu ɔ̃ aɣɔ

lɛ lobara Samaria gu ɔ̃ aɣɔ ne.' "

12 Si Sate ɔɔro ɔ̃ karabara gu Zion Kube gu Yerusalem ne, ɔ̃aɣɛ sɔ, "Loakpadzɛ̃ Asiria igara kutsue ala ɔ̃ katoikɔlɛso gu inyɔso nɛ mpia wũ i anɔ ɔso. 13 Ala ɔɣɛ sɔ;

" 'Wũ mɔmɔ kɔrɔ̃ losu lobara nnɛgbe,

gu wũ iwola alasɔ lokpa anɔ.

Loɖi nɖebi ame,

losore ma karana;

lɛ ɔlesate ne, lobɔ ma magarakpakpa karɔ̃.

14 Lɛ kumɛgɔ i ɔturi kɔrɔ̃ sɛ kumɔɛ̃ karodzai ayo ne,

ngbɔ i wũ kɔrɔ̃ ɔmɔɛ̃ nɖebi karana ne.

Kumɛgɔ i maturi sɛ marɛrɛ kurodzai aɣɔ wa kufa kufefere ne,

ngbɔ lorɛrɛ nɖebi ɔɖuɖu ne,

ma kuwɛ̃ iipɛ abue,

ɣee ɔbusi kanya sɔ ɔto ɔkpɛ.' "

15 Kaɣɛ sɛ kakɔlɛ so kaɖo nwɔ nto ɔwɛrɛ̃ kã?

Ɣee saa aanyɔ so ɔpia nwɔ losu wũ ɔto ɔbara ala karabara?

Kadziri aawo nwɔ nto kã ɔwɛrɛ̃?

Ɣee ikpo ɔwɛrɛ̃ so ipia ɔturi wɔ loiɖe kudziri?

16 Ne ɔso Sate, Bosate Ɔlesate,

to ɔ̃asese ɔnyɛ wɔ loabo ɔ̃ makpãrɛrɛĩ;

ɔtɔ aawara i ma ileso ame

lɛ itɔkpe mapia.

17 Israel ɔkaniɛ aakpese ɔtɔ,

ma Ɔsekelea aaɖe itɔkpe;

ikpɛnɛ iwɛ̃saã ne, ɔ̃aɣele ɔtsuedza

ɔ̃ miyu gu ɔ̃ akora.

18 Ɔ̃ karɔ̃ ga mba iɖa gu ɔ̃ apo wa nto alɛnyɔ

ɔɖuɖu to aawɔ,

lɛ kumɛgɔ i ɔturi sɛ ɔnyɛ ɔwɔwɔ.

19 Adziri wa loakuti i ɔ̃ ipo ame iibawo kuira,

sɔ ɔbiɛtɛ kɔraa aawo wã ɔka ɔtsɛrɛ ɔsɛ.

20 Iyi nɛmɔ mma lokuti i Israel,

mma lokpi makuti i Yakob iyo ame,

iisibasu ma ati masia i

nwɔ lowɔra ma iso,

ɣɛɛ masu ma ati masia i Bosate

Israel Ɔsekelea iso.

21 Makutia to maakpese maba

maakpese maba ma Ɣaa Ɔlesate kɔrɛ.

22 Israel kaɖe, si fɔ maturi ɔsi lɛ ɔpo kuruɛ iwarĩ kɔraa ne,

makutia pɛ loakpese maba.

Loɔɖo sɔ loawɔra ma

fiɛ iwɔra ɔkotegu ma.

23 Sate, Bosate, Ɔlesate

loawɔra karɔ̃ ɔɖuɖu lɛ kumɛgɔ ɔɖo.

24 Ne ɔso Sate Bosate, Ɔlesate sɔ,

"O wũ maturi ma nsi i Zion,

midaanigã ma Asiriase,

ma lopɛ mi ala kudzirii

fiɛ makɔlɛ ikpo i mi iso lɛ ma Egiptese ɔbara.

25 Ikuti kɛkɛĩ fiɛ sikpã dzɛ lona i mi iso aaɣɔ me,

fiɛ loafiriki lobo i ma iso lowɔra ma."

26 Bosate Ɔlesate aapɛ ma kama ala iporoibi,

lɛ ɔwi wɔ ɔpɛ Midian ɔwuĩ i karɔ̃ i Oreb itasiare kɔrɛ;

fiɛ ɔ̃anabarã ɔ̃ ɔdziri ɔsia i ma ndu iso,

lɛ kumɛgɔ ɔbara i Egipte.

27 Iyi nɛmɔ ne, ɔ̃asisi ma ato i mi amɔiti,

ɔɖi ma aɖansa i mi ɔme;

ma aɖansa to aafɛ̃

alasɔ mi amɔiti ɔɔfe imɔ.

28 Mabo i Ayat ɔmagɛ̃ ame;

maki i Migron,

fiɛ masɛ ma ara i Mikmas.

29 Maki i abebodɛ̃ri mafe maɣɛ sɔ,

"Boarɛ i Geba."

Rama to ɔti ɔkpakpa:

Saul ɔmagɛ̃ Gibea ɔpia ise.

30 Galim ɔbibirɔ̃gomi, pɛ ɔkpabo!

Laisa, kã atsue!

Anatot, wɔ mba nnya!

31 Madmena ɔpia ise,

ma Gebimse to mawɛrɛ.

32 Nɔme ikpɛnɛ nɛgbe mato maatuĩ i Nob,

fiɛ maakarĩ akama masɔ̃

Zion Ɔbirɔ̃gomi kube iso,

masɔ̃ Yerusalem kabemi iso.

33 Nyɔ, Sate, Bosate Ɔlesate

to ɔ̃afɛ̃ adzirikpa ku ɔle siare,

Ɔfɛ̃ adziri kɔlɛa,

ɔbɔ adziri kɔlɛa karɔ̃.

34 Ɔ̃asu kaɣɛ ɔpɛ adzirikpokpo i ipo kpirikpiria ame;

Lebanon to ɔ̃arɔ̃ i Ɔlesate katɔ̃.