1 Kaɣɛkasɛ i Damasko iso i ngbe ne.

"Nyɔ, Damasko iisibaɖe ɔmagɛ̃siare

ɣɛɛ ɔ̃akpese ikpakpi.

2 Maturi aatere i Aroer simagɛ̃siare ame

manyua ɔmagɛ̃siare ɔkpese masɛrɛ karɛkɔ̃

gɔ kuwɛ̃ iibapia ma ifɔ̃.

3 Ɔmagɛ̃siare wɔ matsue kubereku mapia aayu i Efrayim,

fiɛ Damasko sigara ɔle aaba katuĩ;

ma Aramse kutia aase

lɛ Israel mabi ɔle,"

ngbɔ i Bosate Ɔlesate ɔɣɛ ne.

4 "Iyi nɛmɔ ne, Yakob ɔle to ɔ̃aba karɔ̃;

fiɛ ɔ̃ karana ana to kaaba karɔ̃.

5 Iase lɛ kumɛgɔ i kpɛ̃dze sɛ ɔmɔɛ̃ ɔnyɔi ɔrui kamɔ,

fiɛ ɔ̃abɛse atita ala kɔrɔ̃ -

iase ana lɛ kumɛgɔ i kpɛ̃dze sɛ ɔrɛrɛ atita wa lokpakpase

i Refayim Kagbolomi ame.

6 Ɣɛɛ ɔraɖui ɔwɛ̃ to ɔ̃akuti i karɔ̃ ɔtã mma loarɛrɛ,

lɛ kumɛgɔ si matidza oliva kudziri,

fiɛ iakuti abi atɛ ɣee anyɔ i akpa wa ta kato iso,

wã ana ɣee aru i akpa wa lobua aɣɔ̃ iso,"

ngbɔ i Bosate wɔ nɖe Israel Ɣaa ɔɣɛ ne.

7 Iyi nɛmɔ iso ne, maturi anyɔnyɔ ma Baradze

mafirikira ma anɔ masɔ̃ Israel Ɔsekelea iso.

8 Maisibasu ma anɔ masia i isɔrɛkusege iso,

ara wa mabara ala ma nrɔɔ̃.

Maisibawarɛ kuɣɔrɔ̃go Asera ɔdziri

gu isɔrɛkasege ga mabara ala ma arɔĩ sɔ maatsuedza kuakɔrɔ̃kɔrɔã iso.

9 Ɔwi wɔmɔ ame ne, ma simagɛ̃siare teterea dzɛ ame matere manyua ala Israel mabi ɔso aakpese ngɔi mɛ loakpese aputuku fiɛ mmɔ ɔɖuɖu aakpese akpakpi.

10 Miɔɣara mi Ɣaa wɔ nɖe mi Fɔdze;

Miito minyigi Itasiare nɛ nɖe mi kawɛrɛkɔ̃.

Ne ɔso si akpɛ̃ kukpɛkɔ̃ gɔ nto kulɛnyɔ,

fiɛ apia wain adziri wa lobɔrɛ i kafɔrɔ̃ iso ne,

11 atoasɔ atã wã atata ku iyi nɛ ame apia wã,

fiɛ kaya ga ame apia wã ne, atã wã afere aɣɔ̃la ne,

nnɛ miasɔrɛ̃ iibawo kuira

iɖo ɔnyɛ gu ibo nɛ nna kua.

12 Ei! nɖebi gbodzoo to mafu ku sikpã

mato mafu lɛ ɔpo!

Ei! maturi to mapɛ sikpabo

mato mapɛ sikpabo lɛ ndu gbodzoo nto mikpase!

13 Atoasɔ maturi to mapɛ sikpabo lɛ ndu mɛ nto miyi ne,

si ɔtɔme ɔpia ma ne, maatere makɛlɛ kama,

ɔwiri aafuri ma ɔkɛlɛgu lɛ sirɔ̃ i kubemi iso

lɛ fafuĩ ayata korea i ɔwiri wɔ mba ɔle kanya.

14 Kutsuɛ ne, iti ikpakpa aaba kpata!

Si kaya aaɣo ne matsirise ka makpa!

ngbɔ loaɖe mma loyu bo kuso ne,

mma losore bo karana maruigu ɔkpɛ i ngbe ne.