1 Bosate sɔ, "Yakob ɔkparɛ, mikã atsue si minɔ nnɛgbe,

mi ma marɔ iyere sɔ Israel

fiɛ miɖe Yuda ɔkparɛ.

Mikã me atsue, mi ma nsɛ mikã ndamu i Bosate iyere iso

fiɛ misɛ mikpere Israel Ɣaa -

ɣɛɛ iiɖe i ɔnukuare ɣee ara bɔlɔlɔa ibara ame -

2 mi mma nsɛ mikpere so sɔ ɔmagɛ̃siare sekelea kaɖemabi

fiɛ misɛ misiaiti i Israel Ɣaa iso -

nwɔ iyere nɖe Bosate Ɔlesate.

3 Kokooko ne loɣere mi ara wa nto aaba,

wũ kanya ɔɖi wã aɣɛ fiɛ lotã mi wã itsue.

Ɔluwɛ̃ ne lota i ne iso, ne ara wamɔ ɔba i ne ame ne.

4 Alasɔ loɣe kumɛgɔ miba atsuele;

fiɛ mi simɔ ɔka gbegbeegbe lɛ ibɔra,

fiɛ mi atɔ̃gbo ɔkore lɛ ayiwa awe.

5 Ne ɔso loɣere mi ara wagbe kokooko;

fiɛ aaba ne, loɖi wã kayi loɣere mi.

Iyɔ ne aibawo ɔɣɛ kuiyikuiyi sɔ,

'Wũ kuɣɔpɔa lobara ne,

wũ kudziri kumiamia gu ibɔra ɣaa lotã ne iba.

6 Miɔnɔ ara wagbe; minyɔ wã ɔɖuɖu,

ɣɛɛ misɛ̃ miifɔ ne mipia i kame.

"Kiniɔ ne loaɣere mi ara ɣɛtɛ,

awɛrɛra wa miinɔ minɔ.

7 Maɔbara wã kiniɔ, aiɖe ara wa lobara ta kokooko;

miinɔ wã iso ara fiɛ nɔme.

Ne ɔso aibawo ɔɣɛ sɔ, 'Aĩ ka loɣe wã koko.'

8 Loɣe sɔ ɔturi wɔ loiɖe ɔnukuarese aɖe.

Tsuelese maɔkpere-ɔ ita ɔwi wɔ maɣe-ɔ.

Ne ɔso ainɔ anɔ kɔraa ɖuɖuuɖu; aiɣe ne kuiyikuiyi.

Ta kokowi ne maibusi-ɔ atsue.

9 Ala wũ mɔmɔ iyere ɔso ne nsɛ lopia so i ɔyuɛ ame i wũ sikpã teterea iso.

Ala wũ ile ɔso ne losia kɔrɔ̃ i wũ sikpã i fɔ iso,

si loibawɔra-ɔ loɖi.

10 Nyɔ lo, loɔfore-ɔ, ɣɛɛ iiɖe lɛ sikãfudza awe.

Loɔla-ɔ lonyɔ i inyɛwe ɔferewu ame.

11 I wũ mɔmɔ iti, i wũ mɔmɔ iti, lobara ne.

Be ɔso loatã masopara wũ iyere?

Loibasu wũ kuwarɛ lotã ɔturi mama kuwɛ̃.

12 Bosate sɔ, "Kã me atsue Yakob ɔkparɛ,

Israel wɔ lokpere.

Mme nɖe ɔ̃.

Mme nɖe ɔɖeakatɔ̃ fiɛ Mme nɖe ɔtsɔra.

13 Wũ kɔrɔ̃ losu lopia karɔ̃ sikaĩ,

fiɛ wũ kuɖearɔ̃ lowarɛ kato ame.

Ɔwi wɔ lokpere wã ne,

wã ɔɖuɖu ɔba aare asakanya.

14 "Mi ɔɖuɖu miba miasakanya, si minɔ.

Iɖe aɣɔpɔa wa loɣɛ ara wagbe asɛ?

Bosate nwɔ ɔɖi ɔpia so

aabara nnɛ sɔ ɔbara Babilon,

fiɛ ɔ̃aɖi ɔ̃ ɔle ɔta ɔya i ma Babiloniase iso.

15 Mme, kɔraa Mme loɔɖe ika;

loɔkpere Kores.

Nto lokɔ wũ lobɔ

fiɛ nnɛ ɔto ɔ̃abara aare iti.

16 "Mibore miba wũ kɔrɛ si mikã nnɛgbe atsue.

"Ta karɔ̃kasɛkɔ̃ ne loiɖe ika i iwɛrɛ ame.

Lopia i mmɔ koko fiɛ iba."

Ne Yesaya sɔ: Kiniɔ ne Bosate Wɔ Nsiguso loɔsese

me ku ɔ̃ Siwarã.

17 Bosate, fɔ Ɖidze,

Israel Ɔsekelea sɔ -

"Mme nɖe Bosate fɔ Ɣaa

wɔ nsɛ ɔte-ɔ nnɛ nlɛ iɖo itã-ɔ.

Mme nsɛ lokɔ-ɔ lokigu i ɔri wɔ iso aaki ne.

18 Si ɔkã akã wũ mmara atsue ne,

tee fɔ isobuɛ aabore lɛ ɔwore awe,

fiɛ isaruɛ aase lɛ ɔpo sipotutaa.

19 Fɔ ɔkparɛ aase lɛ iwarĩ awe

fiɛ fɔ mabi aasi lɛ iwarĩ abi wa nna kukame.

Maibawɔra ma ayere kuiyikuiyi

ɣee manukutu wã maɖi i wũ anɔ."

20 Mirui i Babilon,

mirui mitere i ma Babiloniase kɔrɛ!

Miɖi nnɛgbe miɣɛ ku isoɣɔ kulu

si mipɛ ne imomo.

Miɖi ne miɣɛ misese karɔ̃ kawirikɔ̃.

Miɣɛ sɔ, "Bosate ɔɔɖi Yakob,"

21 Kutukã iikpɛ̃ ma ku ɔwi wɔ ɔkɔ ma ɔkigu i fafuĩ ame.

Ɔkɛ ita

ne ndu ɔbɔrɛ pupuupu ne.

Ɔtã ndu ɔbɔrɛ i ita ame mibore mitã ma.

22 Bosate sɔ, "Isobuɛ kuiwɛ̃ na itã matilese."