1 Bosate sɔ, "La ne kulu teteree, daanyua ne.

Kɔlɛ fɔ silɔ kato lɛ kadadã awe,

si aɣere wũ kaɖe ma aɣɛrɛ

si aɣere Yakob ɔkparɛ ma akpi.

2 Alasɔ mato mabie me iyi biara;

fiɛ mabara lɛ ma kubie nɖe sɔ maatsue wũ siri,

lɛ kaɖe ga nsɛ kabara isɛɛ

fiɛ kainyua kã Ɣaa mmara kasɛ kaɖe awe.

Mato mabie sɔ losia atɔ̃me ita lotã ma i ɔri wɔ loya iso.

Masɛ mabara lɛ iɖe isoɣɔ sɔ maabore mamatã Ɣaa.

3 Masɛ maɣɛ sɔ, 'Be ɔso bonyikanya

fiɛ ainya ne ɣɛɛ?

Be ɔso bobɔsokarɔ̃

fiɛ aisɛ ne ikpo?'

"Ɣɛɛ misɛ mibara nnɛ misɛ miɖɔɛ ku iyi nɛ mito minyikanya

fiɛ misɛ miwedza mi marabaradze ɔɖuɖu anyɛ.

4 Misɛ minyikanya miro ka mibara kulu milɔ kalɔ,

fiɛ misɛ mikpɛ̃ mipɛ so akama.

Kumɛgɔ mito mibara kanyainyi kiniɔgbe

iibatã manɔ mi silɔ i kato i nnɛ mito minyɔ ɔri iso.

5 Kanyainyi ga igbã nto lobie,

ku iyi nɛ i ɔturi awune aasɛra so kukã i ngbe ne?

Si ɔɔbɔitikarɔ̃ lɛ tsatsa ɔkua awe

fiɛ arɛ i ipundukoto iso gu i ndɔ̃ ame,

ato akpere sɔ kanyainyi ɣɛɛ?

Ne nɖe iyi nɛ loabo i Bosate anɔ?

6 "Kanyainyi ga nsɛ lobie nɖe ngagbe ne:

sɔ maaɖi mma mapia kugbagɔrɔĩ i ɔri wɔ loiya iso,

sɔ maakurisi ɔmeisodziri awɛĩ,

matã mma nto mawedza anyɛ isɛguso

fiɛ maakurisi ɔmeisodziri biara.

7 Ana ne, aatã mma kukã to aɖera

akɔ wɛrɛba wɔ nsɛ ɔkiki akɛlɛgu fɔ iyo -

si anya ɔturi sɛ isɔ̃, si apia wũ arapia,

fiɛ daabara fɔ mɔmɔ iso malɛdze kanya gu ɔyiriɖo.

8 Si abara ara lɛgbe ne, iyɔ fɔ ɔtɔ aafiɛ ɔsese lɛ ɔɖesɛrã awe,

fiɛ aasarɛ mala.

Iyɔ fɔ ara bɔlɔlɔa ibara* aaɖe-ɔ katɔ̃,

fiɛ Bosate ikpawaĩ aadzuɛ̃-ɔ ibɔrɛgu i fɔ kama.

9 Iyɔ ne si akpere Bosate ne ɔ̃atɔrã-ɔ;

ato aalakulu akarɛ kabuai; ne ɔ̃aɣɛ sɔ, Mpia i ngbe.

"Si aɖi iyikaibɔkarɔ̃ ɔmeisodziri,

gu arɔĩ isɔsɔ̃ maturi gu aranyanyariã iɣɛ i fɔ ame ne,

10 si asu fɔ aɖera atã mma i kukã to ne;

fiɛ atã kanyɛwedzei nnɛ loɣiã wũ,

iyɔ fɔ ɔtɔ aasa i idududu ame,

fiɛ kasɛ̃ ase lɛ kakɔme awe.

11 Bosate to ɔ̃akɔkɔ-ɔ ɔwi biara;

ɔ̃atã-ɔ irabiara nɛ aɣiã i kuɣɛ̃ɖea karɔ̃ korea iso

ɔ̃atã fɔ akui ɔna ɔle.

Ato aase lɛ kawĩ ga mapia ndu kukaakɔ,

lɛ ndu kagodɛkɔ̃ ga ndu iisɛ misɔ̃ kuiyikuiyi.

12 Fɔ maturi to maaledza akpakpi kuere itsue

matsue ayo masia i simagɛ̃ sikaĩ kuere iso.

Maakpere-ɔ sɔ Abere Biɛa Tsuedze,

Ayo wa i maturi sɛ mawe ku sivurã Ledzase.

13 "Si aisɛ ɔri dzoroo ku Iwarãyi iso,

fiɛ aibara fɔ kuɖuɛ i wũ iyi sekelea iso,

ne akpere Iwarãyi, isoɣɔ

gu Bosate iyi sekelea sɔ, kuwarɛ,

fiɛ apia ne kuwarɛ fiɛ aisu fɔ mɔmɔ ɔri

ɣee aibie fɔ mɔmɔ nnɛ nsɛ ipia-ɔ isoɣɔ ɣee aiɣɛ kusasoi atɔ̃me ne,

14 iyɔ ne ato aana isoɣɔ i Bosate iso,

fiɛ Ɣaa aatã sɔ aasɛ karɔ̃ kusekelekɔ̃.

Ɔ̃atã aɖe fɔ ɔwa Yakob kaɖekɔ̃."

Bosate kanya loɣɛ ne.