1 Ɔturi bɔlɔlɔa sɛ ɔkpi,

fiɛ kuiwɛ̃ iisɛ ɔsɛ iti ame i ne iso.

Masɛ makɔ Ɣaamematuri maruigu

gɔ kuiwɛ̃ iisɛ ɔnɔkarɔ̃.

Masɛ makɔ maturi bɔlɔlɔa maruigu

si maɖi ma mabɔrɛgu i aranyanyariã wa loaba ame.

2 Mma nsɛ mabara ara sɛɛ

sɛ makɛlɛ isobuɛ ame.

Masɛ mana iwarã gɔ marɛ i ikpibiɔ ame.

3 "Ɣɛɛ miba i ngbe, mi buɛkpiserɔ̃go mabi,

mi masɔrɔ̃ɖedze gu marɔ̃goturipɛ̃ mabi mibore miba i ngbe!

4 Nna mito mibara aɣiãra?

Nna mito mima

fiɛ mito miɖi sinyagɛmi misɛ kpawee?

Iiɖe makpibaradze mabi

gu maladze mabi miɖe ɣɛɛ?

5 Mi somina ame sɛ mibara mi mɛrɛ̃mɛrɛ̃ i siɖum ndɛ̃

gu adziri siare wa mba ayata kayirinɔ.

Misɛ misɔrɛ mi mabi

i kuwɛlagbolomi ame i ata siare sikpolo ame.

6 Aɖi arapɔa wa i kuwɛlagbolomi ata pɔlɔpɔlɔa ndɛ̃ atã so,

wã ne, wã nɖe fɔ ɔkpɛ ne. Gbaã ne, misɛ misɔrɛ wã ku aranɛa asɔrɛ

gu geɖebu asɔrɛ.

Ɔlo loalo losɛ lonyɔ ara wagbe?

7 Misɛ mi karɛkɔ̃ i kabemi ga lokɔlɛ kaɖo iso,

mmɔ miya mikɛlɛ misɛ miasɔrɛ ara fiɛ mirɛgu so ne.

8 Asu fɔ iɣɔsɔrɛ akparĩ asia i akui kama gu

kuyogodɔ̃ sidziri iso.

Alasɔ apɛ afiriki i wũ kama arui, atara ara i fɔ karɛkɔ̃ iso,

aya abo i kã ame fiɛ abɛra kã.

Mi gu mma karɛkɔ̃ asɛ aɖɔɛ ɔɖe kuɣa,

ne asɛ aɖɔɛ ma isɔ̃ inyɔ ne.

9 Asu ngarãdu gbodzoo

akɛlɛgu fɔ kuɣɔ Molek.

Asese fɔ maɖabo kadzorokɔ̃

mawɛ̃ ɔkɛlɛ ta ikpibiɔ ame.

10 Aki, fiɛ aki gbaã so ɔɔtu-ɔ,

ɣɛɛ aiɣɛ sɔ, 'Ira siefe iɖe.'

Ɔle ɣɛtɛ ɔbo i fɔ ame,

ne ɔso aifɛ̃.

11 "Nna nto ɔpia mi ifɔ̃,

fiɛ nna mito minigã ɔso mila sila,

fiɛ miinyigi me

ɣee miibu iti ame i wũ iso?

Iiɖe kumɛgɔ iɔna ɔpã lolokanana losi

ɔso miito minigã me ɣɛɛ?

12 Loaɖi mi ara bɔlɔlɔa ibara gu mi karabara ibara lote;

ɣɛɛ kuiwɛ̃ iibabuai mi.

13 Si alakulu teteree atã

fɔ arapɔa gbodzoo asakanya ne, tã afɔ-ɔ!

Ɔwiri aasore wã ɔɖuɖu ɔruigu,

ɔwiri wɔ aawarã kere loafuri wã ɔruigu.

Ɣɛɛ ɔturi wɔ lotarĩgu me ne

karɔ̃ aaɖe ɔ̃ kaɖekɔ̃

fiɛ ɔ̃ana wũ kube sekelea."

14 Mato maaɣɛ sɔ,

"Miɖi ɔri, mikpɛ̃ ɔri, si miledza ɔri!

Miɖi ɔriatɛ̃ra ɔɖuɖu i ɔri iso mitã wũ maturi."

15 Alasɔ Nwɔ nsi i kato dzoroo

fiɛ ɔsi ngbã ɔwi daaro fiɛ ɔ̃ iyere nɖe Ɔsekelea sɔ,

"Losi i kato gu i kasekelekɔ̃.

Ɣɛɛ lopiagu ɔturi wɔ lofiriki i ɔtu ame fiɛ ɔbɔsokarɔ̃ i siwarã ame ana.

Si loarɛgɛ̃ra ɔturi wɔ lobɔsokarɔ̃ siwarã

fiɛ loarɛgɛ̃ra ɔturi wɔ lofirikira kayiri ɔtu.

16 Alasɔ loibakpadzɛ̃ itɔ̃me ɔwi ɖaa,

fiɛ loibana sikpã ɔwi biara.

Alasɔ si lobara ngbɔ ne maturi to maafɛ̃ -

mme lobara ɔturi awune siwarã.

17 Lona sikpã ɔwi kɛkɛĩ ala ɔ̃ kanɔbɛbɛ ikpi iti.

Lokpadzɛ̃ wũ kutsue fiɛ i sikpã ame lokɔla wũ katɔ̃

ɣɛɛ ɔkɛlɛ i katɔ̃ i ɔ̃ aranyanyariã ibara ame.

18 Loɔnya ɔ̃ nsɛgbai, ɣɛɛ loasa wũ,

loakɔkɔ wũ fiɛ loaɣɔra wũ kayiri ana.

19 Loatã mma nto mamararã so i Israel sinyako ɔka ileaka sitã Bosate sɔ,

Isobuɛ, isobuɛ itã mma mpia i kakotekɔ̃ gu mma i kadzorokɔ̃,

fiɛ loasa ma sinyɛ."

20 Ɣɛɛ matilese se lɛ ɔpo wɔ lonyagɛ̃ awe,

alasɔ ɔpo nyagɛã iibawo ɔsɛ kpoo,

fiɛ ɔ̃ sipotutaa sɛ siɖi aku gu iba sisɛ.

21 Wũ Ɣaa sɔ, "Isobuɛ kuiwɛ̃ na itã matilese."