YESAYA 18

Ɣaa Aakpadzɛ̃ Nubia Kutsue

1 Ndzo mitã kugbadzedzei karɔ̃,

i Nubia ɔwore sikpokpo

2 Mma nsɛ mapia maturi katɔme maki i ɔpo iso

masɛ i fafuĩ wɔ mafɛ̃ sikolo ame mawara ndu.

Mikɛlɛ, mi makpabo ma nsɛ mapɛ siwa,

mikɛlɛ mma iso loruɛ pɔlɔpɔlɔ fiɛ madzadzara kɔrɛ,

maturi ma masɛ manigã i kakɔi biara,

mma siɖe miito minɔ fiɛ mase dzeredzere

mma karɔ̃ i siwore ɔɣɛɣɛ.

3 Mi kayiiso maturi ɔɖuɖu

mi ma nsi i karɔ̃ iso,

si makɔlɛ kameleɖukui i abe iso ne,

mito mianya kã

fiɛ si kadadã ɔkparĩ ne,

mito mianɔ.

4 Bosate ɔɣere me sɔ,

"Loalo losɛ i wũ kasɛkɔ̃ lonyɔ ara

lɛ ipipi i kuɣɛ̃ ame,

lɛ ima idɔdɔ nɛ nsɛ ipɛ ku ɔwi wɔ i ɔraɖui ɔɔbe ɔtã isɔrɛ̃."

5 Alasɔ si ɔraɖui ɔsɔrɛ̃wi aaɣo ku ɔwi wɔ i aɣɔ̃la ɔɔkpa aro

fiɛ aɣɔla ɔɔkpese wain abi bea ne,

ɔto ɔ̃atu akpa ɔɖi ala sinyɔi

ɔtu akpa wa nto aɣa ɔruigu.

6 Maanyua ma ɔɖuɖu mafere i kube iso itã kurodzai gɔ lomɔɛ̃ ara

gu ipo ame mabɔi aɖera;

kurodzai aaɖe ma sina ku kukpɛ ɔɖuɖu,

gu ipo ame mabɔi ku kusɛ ame ɔɖuɖu.

7 Ɔwi wɔmɔ ame ne, maasu karatã mabɔ Bosate Ɔlesate,

kaabɔrɛ i mma iso loruɛ sɔlɔsɔlɔ fiɛ madzadzara kɔrɛ -

maturi ma masɛ manigã i kakɔi biara,

nɖebi ma siɖe i kuwɛ̃ iito ɔnɔ fiɛ mase dzeredzere,

fiɛ siwore ɔɣɛɣɛ ma karɔ̃.

Karatã aabɔrɛ i ma kɔrɛ kaba Zion Kube iso ngbegɔ i Bosate Ɔlesate Iyere pia.