1 Mibore miba, mi nɖebi si minɔ;

mikã atsue, maturi!

Mitã karɔ̃ si kanɔ, gu nwa ɔɖuɖu mpia i kã iso.

Mitã kayiiso gu mma ɔɖuɖu lobɔrɛ i kã iso si manɔ!

2 Bosate to ɔnagu nɖebi ɔɖuɖu sikpã;

ɔ̃ sikpã teterea sia i ma makpakpɛ̃dze iso.

Ɔto ɔ̃awɔra ma pelepele;

ɔ̃aɖi ma ɔtã maɖoe.

3 Maafuĩdza ma makpise mafere,

ma makpise aafɔrɛ̃;

ma ima aabo karɔ̃ i abe iso.

4 Awãmi wa ɔɖuɖu i kuɖokpo aaɣɛ

fiɛ kuɖokpo aakarĩ lɛ ɔko;

awãmi akuri ɔɖuɖu aakpase

lɛ waĩn kudziri ayata wa loɣɔ,

lɛ aboi wa lobo ɔnyɛ i kubo iso awe.

5 Wũ ipɛmi ɔɔnɛ imi i kuɖokpo;

nyɔ, ito iso i atɔ̃meiɣɛ ame i Edom,

maturi ma loɔwɔra pelepele.

6 Bosate ipɛmi ɔpie ima,

iɖa ɔmini ne -

masɛrɛrerɔ̃ abi gu kutepuĩ ima,

akpalasa iɖa nɛ nfu i ne aka iso.

Bosate to ɔ̃afɛ̃ ara i Bozra ɔmagɛ̃ ame

gu mabɔi gbodzoo iɖoe i Edom karɔ̃ iso.

7 Ipoame manantsuirɛrɛ̃ aarɔ̃gu ma,

manantsuĩ abirɛrɛ̃ gu manantsuĩrɛrɛ̃ siare.

Ma karɔ̃ aafɔ ima lɛ ndu

iɖa aamini ma sise.

8 Alasɔ Bosate ba iyi nɛ ɔ̃atikuso,

ikɔ nɛ maati maturi kuso ala Zion iti.

9 Edom kuworei ndu aakpese kuma,

ɔ̃ ɔsebu aakpese sulfa wɔ nto ɔtsue;

ɔ̃ karɔ̃ aakpese kuma gɔ nto kutsue!

10 Ɔ̃ibanyi kasɛ̃ i kakɔ̃me;

ɔ̃ kuyɔ iibanyua ɔta kayi daaro.

Ita i ɔɣekparɛ ikpa ɔɣekparɛ ne, ɔ̃aɖe ikpakpi;

kuwɛ̃ iisibaki i ɔ̃ ame ɔnya.

11 Mmɔ aaɖe fafuĩ ame katikuku gu katikuku kosoi kasɛkɔ̃.

Katikuku siare gu kakparodza aawarã i mmɔ.

Ɣaa to ɔ̃anabarã i Edom iso

ikpɔkpɔtɔ iwɛĩ

gu ikpakpi iwɛĩ.

12 Ɔ̃ makpakpaturi iibawe kuira i mmɔ gɔ maarɔ sɔ sigarakaɖekɔ̃,

ɔ̃ magaramabi ɔɖuɖu aayu.

13 Miyu aaɣa mifu i ma magara ayo iso,

akora gu kuposɛ̃ aafu i ma ɔlekusɛkɔ̃.

Ɔ̃akpese aboroi kawɛrɛkɔ̃,

gu kutikuku kawekɔ̃.

14 Fafuĩ ame kubɔibi gu masea aasarɛ i mmɔ,

ipoame masɛrɛ aabiɛ makpɛse so

fiɛ i mmɔ i kasɛ̃ kubɔibi aawarã ana

fiɛ kuabie kawãrakɔ̃ kutã so.

15 Katikuku aabara iyo kafa aɣɔ i mmɔ,

ɔ̃abiɛ abi, ɔnyɔ wã iso i ɔ̃ abue kayirinɔ,

mmɔ i kugbererodzai aasikanya,

ɔbiara gu ɔ̃ ɔrã.

16 Nyɔ i Bosate ɔko ame si aka:

Nwagbe ɔɖuɖu kuiwɛ̃ iibayu.

Kuwɛ̃ iibanyua ne ɔnyɔare.

Alasɔ ɔ̃ kanya lotã mmara,

fiɛ ɔ̃ Siwarã loasa ma kanya.

17 Ɔ̃atã ma ma karɔ̃ ɔkpɛ;

ɔ̃ kɔrɔ̃ ɔ̃asusu karɔ̃ ɔ̃aɣɛ ala ɔtã ma.

Iaɖe ma ɔkpɛ kayi daaro daaro

fiɛ maasɛ i mmɔ ita i ɔɣekparɛ ikpa ɔɣekparɛ.