YESAYA 21

Kaɖikate I Babilon Ibiɛ Iso

1 Kaɣɛkasɛ i Fafuĩ wɔ mpia i Ɔpo kuruɛ i ngbe ne:

Lɛ kagbadadururu sɛ kafuri i kala isɛ karɔ̃ iso ne,

ngbɔ i nwɔ nto ɔba ɔ̃akpɛ̃ mi aabo mi iso ɔbɔrɛ i fafuĩ ame isɛ ne,

ɔ̃abɔrɛ i karɔ̃ ga mba ifɔ̃ iso.

2 Kaɖikate teterea ga maɖi mate me ne;

nwɔ nsɛ ɔɖi maturi ɔtã sɛ ɔɖi maturi ɔtã, nwɔ nsɛ ɔbodza ara sɛ ɔbodza ara,

Elam, ta kakpã! Media, kilɔ wũ ku akpadza!

Loatuĩdza imararãso nɛ ɔɖuɖu ɔbɔ.

3 Ne ɔso lona isobo

kayiri to kaɖo me lɛ yirise wɔ i kuɣe to kuɖoɖo;

lokpɔkpɔtɔ i nwa loto lonɔ iti,

nwa loto lonya to ibara me ɣii.

4 Ɔtu ɔbiɛ me iso,

ifɔ̃ to itã me loti lokpakpa;

kutsuɛ gɔ loto lonyɔ ɔri lotã

ɔɔkpese ifɔ̃ra itã me.

5 Matu sipɔrɔ̃

masia ɔpɔrɔ̃ iso sikati,

maɖe ara manɛ ara!

Makpakpɛ̃dze makpakpa, mita,

mipia akpirafɔra nnɔĩ.

6 Bosate ɔɣere me sɔ,

"Kɛlɛ sɛ aatã dzuɛ̃se si ɔdzuɛ̃

si ɔɣere-ɔ irabiara nɛ ɔnya.

7 Si ɔnya abuɛ wa i apɔngɔ sɛ akpadzɛ̃

gu apɔngɔ sibole,

gu maturi ma nsi i mafirimu iso,

ɣee masi i kapuapɔngɔ iso ne,

tã ɔnyɔ tuee,

ɔnyɔ tuee kukaakɔ."

8 Ne dzuɛ̃se ɔla kulu ɔɣɛ sɔ,

iyi biara ne, wũ Sate, nsɛ loya i kadzuɛkɔ̃;

kasɛ̃ biara ne, nsɛ losɛ i wũ kadzuɛkɔ̃.

9 Nyɔ, ɔrɛrɛ̃ ɔwɛ̃ si i ibuɛ nɛ i apɔngɔ sɛ akpadzɛ̃ ame ɔto ɔba

gu apɔngɔ ɔbole.

Ne ɔtã mmuai ɔsese sɔ,

'Babilon ɔɔbiɛ, ɔ̃ɔbiɛ!

Ɔ̃ aɣɔpɔa gu awea ɔɖuɖu

ɔɔsasame afere i karɔ̃!' "

10 Oo wũ maturi ma mali mapɛyu i imɔtu,

loaɣere mi nnɛ lonɔ

lobɔrɛgu i Bosate Ɔlesate kɔrɛ,

lobɔrɛgu i Israel Ɣaa kɔrɛ.

Kaɣɛkasɛ I Edom Iso

11 Kaɣɛkasɛ i Duma iso ne:

Ɔwɛ̃ to ɔkpere me ɔbɔrɛgu i Seir*21.11 Seir: Ne ame nɖe Edom ne. sɔ,

"Dzuɛ̃se, iɔkuti kɛkɛĩ i kaɖe aasɛ̃!

Iɔkuti kɛkɛĩ i kaɖe aasɛ̃?"

12 Dzuɛ̃se ɔtã mmuai sɔ,

"Kaɖe ɔɔro ɔsɛ̃, ɣɛɛ kato kaaro ana.

Si abie sɔ aakarɛ ne, karɛ;

si aledza ikpese iba."

Kaɣɛkasɛ I Arabia Iso

13 Kaɣɛkasɛ i Arabia iso i ngbe ne:

Mi ma Dedanse kapuapɔngɔ ɔbole,

ma lobara ma kawãrakɔ̃ i Arabia kakpirikpirikɔ̃,

14 mibɔ mma i ɔme to ɔkore ndu;

mi ma nsi i Tema,

mibɔ maturiterea aɖera.

15 Mato matere ipɛmi,

ipɛmi nɛ matara masɔ̃ ma,

i kuta gɔ makpadzɛ̃ mato kanya

gu kakpã ɔle kanya.

16 Ne Sate ɔɣere me sɔ, "I ikɔ iwɛ̃ kama lɛ ɔɖabo wɔ mpia i awɔba ame aaka ne, Kedar adzodzo gu agbaragbara ɔɖuɖu to aalo. 17 Kedar makpãrɛrɛĩ ma nsɛ mapɛ kuta aakuti kɛkɛĩ." Bosate wɔ nɖe Israel Ɣaa loɣɛ.