1 Idzirikpa to iata i Yese idzirikui iso;

ɔbɔi wɔ lobɔrɛ i ɔ̃ siɖu ame aaɣɔ̃ abi.

2 Bosate Siwarã aasia i ɔ̃ iso -

iwola gu ara karɔ̃inɔ Siwarã,

adzuni itã gu ɔle Siwarã,

inɔkpa gu Bosate kunigã Siwarã.

3 Bosate kunigã aapia wũ isoɣɔ

ɔ̃ibasu anɔkunyame ɔɣɛ atɔ̃me

ɣee ɔ̃ibasu nwa ɔnɔ ɔɖaɛ atɔ̃me;

4 ɣɛɛ ɔ̃asu sibɔlɔlɔ ɔɣɛ atɔ̃me ɔtã maɣiãni,

ɔ̃asu atɔ̃meiɣɛ i ɔri iso ɔɣɛ ɔtã mawɛrɛba.

Ɔ̃asu ɔ̃ kanya ame ɔdziri ɔpɛ kayiiso;

fiɛ ɔ̃asu kanya ame siwarã ɔɖoe matilese.

5 Sibɔlɔlɔ loaɖe ɔ̃ abɔso

fiɛ ara ku ɔnukuareiɖe loaɖe ɔ̃ siwɛ̃ dzɛ loakɛrɛ ɔ̃ ɔsɔ ame.

6 Ɔgidi gu isɛrɛbi aasɛ i kasɛkɔ̃ kawɛ̃,

ɔgidi aarɛ i katepuĩ kɔrɛ,

inantsuĩbi gu dzata aaɖe ara masakanya

fiɛ kabiɛtɛi aakɔ ma.

7 Nantsuĩ gu iketeke aaɖe ara masakanya;

ma mabi ana aarɛ i kakɔi kawɛ̃,

dzata aawe sikua lɛ nantsuĩ.

8 Ɔbiɛtɛ aaɣa kaɣa i ɣɛreba iwo kanya;

fiɛ kabiɛtɛi kɛkɛĩ aapia kɔrɔ̃ i kabɛku kusɔ ame.

9 Maibabara amumuɣɔ ɣee maɖoe ma manyii

i wũ kube sekelea ɔɖuɖu iso,

alasɔ kayi ɔɖuɖu to kaayigu Bosate itsue,

lɛ kumɛgɔ i ndu ɔyi ɔpo ame.

10 Ɔwi wɔmɔ ame ne, Yese ɔɖu to ɔ̃ata ɔya lɛ kameleɖukui ɔtã nɖebi ɔɖuɖu sɔ maatere mamini wũ fiɛ ngbegɔ ɔ̃atã ma iwarã aalɛnyɔ. 11 Ɔwi wɔmɔ ame ne, Bosate to ɔ̃anabarã ɔ̃ kɔrɔ̃ ana ɔɖi ɔ̃ maturi ma lokuti mapia i Asiria, Egipte, Patros, Nubia, Elam, Babilonia,* Xamat gu ndukilɔnrɔ̃ mɛ i ɔpo siare ɔki ɔlɔ ɔbɔ so i kɔrɛ.

12 Bosate to ɔ̃akɔlɛ ɔ̃ kameleɖukui ɔtã nɖebi

ɔsa Israel mabi ma mpia i sisande ame kanya;

fiɛ ɔ̃asa Yuda kaɖe ga losasame kanya

ɔbɔrɛgu i kayiiso akpakpai kuna ɔɖuɖu.

13 Efrayim sirerɛ ikpɛ̃ aayu;

Bosate aatu Yuda matsirise ɔɖi,

Efrayim iisibakpɛ̃gu Yuda sirerɛ

ɣee Yuda ɔsɛgu Efrayim i kulu ame.

14 Maatere maso abe mabo ma Filistise iso i kuɣɛ̃iyokabokɔ̃ isɛ,

maasakanya mafɔ mma i kuɣɛ̃kabɔrɛkɔ̃ isɛ ara,

maafɔ ma Edomse gu ma Moabse ara

fiɛ ɔ̃asu ma Amonse ɔpia i ma kayirinɔ.

15 Bosate aasɔ̃ra

ma Egiptese ɔpo,

ɔ̃asu ɔ̃ kɔrɔ̃ ɔfuri ɔtɔwiri

ɔkigu i Frat ɔwore iso

ɔɣɛɣɛ wũ ɔkpesegu kuworemi kukɔdzɛ

sɔ maturi aapia ndokota masɛ mawara.

16 Ɔri siare to ɔ̃asia ɔtã ɔ̃ maturi

ma lokuti i Asiria

lɛ kumɛgɔ ise itã Israel

ku ɔwi wɔ mabɔrɛ i Egipte karɔ̃ iso.