YESAYA 36

Ma Asiriase Ɔpia Yerusalem Ifɔ̃

1 I akɔ aweo-ana i Igara Xezekiya sigaraiɖe ame i Yuda ne, Asiria igara Senakerib ɔta kakpã i Yuda simagɛ̃ ɔɖuɖu dzɛ matsue abere mapia fiɛ ɔɖe ma iso. 2 Ne Asiria igara ɔpia ɔ̃ kpãrɛrɛĩkpakpa gu makpakpɛ̃dze gbodzoo ɔbɔrɛgu i Lakis ɔkɛlɛgu igara Xezekiya i Yerusalem. Gɔ kpãrɛrɛĩkpakpa ɔtuĩ i Itubu nɛ i kato i Raforedze Iputu ame ɔri iso ne, 3 Eliakim, Xilkiya ɔbi wɔ nto ɔnyɔ igara iyo iso, Sebna wɔ nɖe ratsɛrɛdze gu Yoax, Asaf ɔbi wɔ nɖe ratsɛrɛsɛse ɔbɔrɛ masɛ maatu wũ.

4 Kpãrɛrɛĩkpakpa ɔɣere ma sɔ, "Miɣere Xezekiya sɔ,

" 'Asiria igara ɔkpakpa siare sɔ: Be iso ane aɣɛ fiɛ aba katetere ngbɔ? 5 Fɔ sɔ aba adzuni gu kakpã ɔle, ɣɛɛ atsuɛwo kere aɖe. Be iso apiɛtɛ ɔso ata aya me iso? 6 Kiniɔ ne, nyɔ Egipte iso asiaiti, kabebeisɛi gamɔ, ga loatsue nwɔ lopiɛtɛ kã iso kɔrɔ̃! Ngbɔ i Egipte igara Igarakpakpa se ɔtã mma ɔɖuɖu losiaiti i ɔ̃ iso ne. 7 Fiɛ si aɣere me sɔ, "Bosate Ɣaa iso bopiɛtɛ" ne, iiɖe ɔ̃ kusɔrɛkɔ̃ gu isɔrɛkusege i Xezekiya ɔmɔɛ̃ ɔɖi? Ne ɔɣere Yuda gu Yerusalem maturi sɔ, "Yerusalem isɔrɛyo isɔrɛkasege gagbe iso ikote sɔ misɔrɛ."

8 " 'Kiniɔ ne, miba mianya wũ ɔkɔse, Asiria igara si miɣɛ mitã so: Loatã-ɔ apɔngɔ kukpi kunyɔ si aawo maturi ɔsɛra i wã iso pɛ! 9 Nda aabara aakpɛ̃gu wũ ɔkɔse kpãrɛrɛĩ kosore ɔwɛ̃, atoasɔ asiaiti i Egipte iso sɔ ɔ̃atã-ɔ apɔngɔ gu kubore? 10 Ana ne, abu sɔ ɔta kere lota loba lokpɛ̃gu karɔ̃ gagbe lowɔra kã sɔ Bosate kɔrɔ̃ na i ne ame? Bosate mɔmɔ loɣere me sɔ lota i karɔ̃ gagbe iso si lowɔra kã.' "

11 Ne Eliakim, Sebna gu Yoax ɔɣere kpãrɛrɛĩkpakpa sɔ, "Boto-ɔ i kukpa ne ɖegu bo ika i Aram siɖe ame ne boto bonɔ. Daaɖe bo ika i si Hebrise ame sɔ mma nsia i ibere iso aanɔ."

12 Ɣɛɛ kpãrɛrɛĩkpakpa ɔtã mmuai sɔ, "Iiɖe mi ɔkɔse gu mi kɔrɛ kere i wũ ɔkɔse ɔpia me sɔ loɣere ara wagbe, ɣɛɛ ta marɛrɛ̃ ma nsi i ibere iso fiɛ lɛ mi awe ne maaɖe ma ɔdziriso manɛ ma mɔmɔ kuru kɔrɛ iɖe ɔpia me."

13 Ne kpãrɛrɛĩkpakpa ɔla kulu i si Hebrise ame ɔɣɛ sɔ, "Minɔ Asiria igara siare itɔ̃me! 14 Igara sɔ: Midaatã Xezekiya si ɔsɔsɔla mi, ɔ̃ibawo mi ɔfɔ! 15 Midaatã Xezekiya si ɔtã mi katetere si misiaiti i Bosate iso si ɔɣere mi sɔ, 'Bosate to ɔ̃aɖi bo, ɔ̃ibasu ɔmagɛ̃siare wɔgbe ɔpia i Asiria igara nrɔɔ̃ ame.'

16 "Midaakã Xezekiya atsue. Asiria igara sɔ: Mibaragu me isobuɛ si mibɔrɛ miba wũ kɔrɛ. Iyɔ mi ɔbiara to ɔ̃aɖe ara i ɔ̃ mɔmɔ wainabi gu abo gu ɔnɛ ndu i ɔ̃ mɔmɔ atawo ame, 17 gbɔgbɔɔgbɔ loaba loakɔ mi lokɛlɛgu karɔ̃ ga nse lɛ mi kare - karɔ̃ ga iso i geɖebu ɔraɖui gu ndã ɣɛtɛ, aɖera gu waĩnkukpɛkɔ̃ pia.

18 "Midaatã Xezekiya si ɔsɔsɔla mi gɔ ɔto ɔɣɛ sɔ, 'Bosate to ɔ̃aɖi bo.' Karɔ̃ kawɛ̃ kuɣɔ ɔɔɖi ma kubɔrɛgu i Asiria igara nrɔɔ̃ ame kunya? 19 Xamat gu Arpad aɣɔ ɣɛɛ? Lɛ i Sefarvayim aɣɔ pia? Maɔɖi Samaria mabɔrɛgu i wũ nrɔɔ̃ ame? 20 Nrɔ̃ mɛgbe ɔɖuɖu kamele aɣɔ loɔwo ma karɔ̃ ɔfɔ ɔbɔrɛgu i wũ nrɔɔ̃ ame? Ne iyɔ nda i Bosate aaɖi Yerusalem ɔbɔrɛgu i wũ nrɔɔ̃ ame?"

21 Ɣɛɛ maturi ɔɖuɖu ɔlokanana, maipia wũ kanya alasɔ ma igara ɔɣere ma sɔ, "Midaapia wũ kanya."

22 Ne Eliakim, Xilkia ɔbi wɔ nto ɔnyɔ igaraiyo iso, Sebna, ratsɛrɛdze gu Yoax, Asaf ɔbi wɔ nɖe ratsɛrɛsɛse ɔkɛkɛ ma arapia fiɛ makɛlɛ Xezekiya kɔrɛ masɛ maaɣere wũ nwa i kpãrɛrɛĩkakpa ɔɣɛ ne.