1 Bosate sɔ,

"Kato nɖe wũ sigaraiyara,

fiɛ karɔ̃ nɖe wũ ngbaisiara.

Lɛ i iyo nɛ miatsue mitã me pia?

Lɛ i ngbegɔ loawarã aawe?

2 Wũ kɔrɔ̃ losu lobara ara ɔɖuɖu wagbe,

ne ɔso aaba are kayi ne."

Bosate loɣɛ ne.

"Ɔturi wɔ loisɛ lopia kuɣɛ i ngbe ne:

ɔturi wɔ nsɛ ɔbɔsokarɔ̃ ku kaboso i siwarã ame,

ɔsɛ ɔti ɔkpakpa i wũ itɔ̃me iso.

3 Ɣɛɛ ɔturi ɔrere wɔ nsɛ ɔsɔrɛ nantsuĩ

se kere lɛ nwɔ nsɛ ɔɖoe ɔturi awe.

Ne ɔturi wɔ nsɛ ɔsɔrɛ sɛrɛrerɔ̃ibi

se lɛ nwɔ nsɛ ɔkidza kpɛkpɛ simɔ ɔtã isɔrɛ.

Ɔturi wɔ nsɛ ɔsɔrɛ geɖebu isɔrɛ ne

ɔse lɛ nwɔ nsɛ ɔsu kparako ima ɔsɔrɛ.

Ana ne ɔturi ɔrere wɔ nsɛ ɔtsuedza inyigira kuakɔrɔ̃kɔrɔã ne,

ɔse lɛ nwɔ nsɛ ɔsumu kuɣɔ.

Maturi magbe ɔɔsu ma mɔmɔ siri,

fiɛ ma sikala sɛ sina isoɣɔ i anyanyara wa masɛ mabara iso.

4 Ne ɔso Mme wũ loaɖi inyɛwe teterea lotã ma

fiɛ loatã nnɛ mato manigã sɔ iba i ma iso.

Alasɔ gɔ lokpere ne, kuwɛ̃ iitɔrã,

gɔ loɖe ika ne kuwɛ̃ iikã atsue.

Ɣɛɛ ne mabara aranyanyariã i wũ anɔmi ame

fiɛ maɖi nnɛ loisɛ ipia me isoɣɔ."

5 Mi ma nsɛ miti mikpakpa i Bosate itɔ̃me iso,

mikã atsue si minɔ ɔ̃ itɔ̃me.

"Mi manyii ma lotsiri mi,

fiɛ masɛ̃ mi masɛ ise ala wũ iyere iti, ɔɣɛ sɔ,

'Mitã mapia Bosate kuwarɛ,

si boanya mi isoɣɔ!'

Ɣɛɛ ma bowũ nto maaɖe kunuarɛ.

6 Mikã atsue si minɔ iwɔdzɔ nɛ nto i ɔmagɛ̃siare ame,

minɔ silɔ dzɛ nto sibɔrɛ i isɔrɛyo ame!

Bosate silɔ siɖe.

Ɔto ɔãti ɔ̃ matsirise kuso iyi ku nnɛ ɔɖuɖu lokote ma.

7 "Fiɛ kuɣe aɖoɖo wũ ne

ɔ̃ɔɣe ɔbi ɔluwɛ̃.

Fiɛ ibo aaba wũ iso ne,

Yerusalem ɔɔɣe ɔbibirɛrɛĩ.

8 Nna loɔnɔ itɔ̃me nɛgbe igbã ɔnɔ?

Nna loɔnya ara wagbe igbã ɔnya?

Karɔ̃ kawɛ̃ aawo ɔre kaya ku iyi iwɛ̃?

Ɣee kaɖe kawɛ̃ aawo ɔre kaya i anɔmiikpa iwɛ̃ ame?

Ɣɛɛ iina ɔpã Zion ɔkpɛ̃ kuɣe

kere ne ɔɣe ɔ̃ mabi ɔluwɛ̃.

9 Bosate to ɔkarɛ sɔ, "Loatã kuɣe ɔwi ɔɣo

fiɛ maibaɣe ɔbi ɣɛɛ?

"Nto loasɛ̃ ɔɣekoto

gɔ Mme nsɛ lotã maɣe ɔbi?"

Mi Ɣaa loɣɛ.

10 "Mi ma ɔɖuɖu nsɛ miɖɔɛ Yerusalem itɔ̃me,

mina isoɣɔ si milɛlɛ ku wũ.

Mi ma ɔɖuɖu lobiɛgu wũ

mina isoɣɔ si milɛlɛ ku wũ.

11 Mito miameme fiɛ miami

mibɔrɛgu i ɔ̃ anyɛ kanya wa loaɣɔra mi.

Miameme mimi

fiɛ miana isoɣɔ mibɔrɛgu i ɔ̃ ara gbodzoo ame."

12 Bosate sɔ,

"Loatã wũ isobuɛ ara ɔlɛgu wũ lɛ ɔwore,

fiɛ nɖebi karana gbodzoo aabore kaba i ɔ̃ kɔrɛ lɛ kaworei ga loyi kabiɛ kawiri.

Miameme fiɛ ɔ̃amɔɛ̃ mi i nrɔɔ̃ ame

fiɛ miasɛ i ɔ̃ akpabɔ iso.

13 Loapia-ɔ kɔrɔ̃ i kayiri i mmɔ i Yerusalem,

lɛ kumɛgɔ i ɔnyi sɛ ɔpia ɔ̃ ɔbi kɔrɔ̃ i kayiri awe ne

kumɛɔ loapia mi kɔrɔ̃ i kayiri ne."

14 Si minya nnɛgbe ɔba ne mi ɔtu aana isoɣɔ

fiɛ mi akui aabo ɔle lɛ sikua dzɛ nto simɔ awe.

Iyɔ maanya maɖiite sɔ Bosate sɛ ɔla ɔ̃ maɖabo kukaakɔ

ɣɛɛ maaɖi ɔ̃ sikpã masia i ɔ̃ makpɛ̃guse iso.

15 Nyɔ lo, Bosate to ɔbagu ɔtɔ

fiɛ ɔ̃ kubore se lɛ kagbadadururu awe.

Ɔto ɔ̃abɔ ɔ̃ sikpã siteterea karɔ̃

fiɛ ɔ̃anyagɛ̃ ku ɔtɔ sinyagɛmi.

16 Bosate to ɔ̃asu ɔtɔ gu ɔ̃ ipɛmi

ɔɣɛgu maturi ɔɖuɖu atɔ̃me,

fiɛ ɔ̃aɖi ɔ̃ ipɛmi ɔsia i maturi gbodzoo iso ɔɖoe ma.

17 "Maturi ma losekelera so fiɛ mabara so sɔ makpa, si maabo kuwĩ ame fiɛ masɛ masiai ira nɛ mpia i kawĩ ndɛndɛ̃, sɔ maaɖe kparako gu kulelei gu anyanyara mama ne - ma ɔɖuɖu to maawɔ." Bosate loɣɛ ne.

18 "Alasɔ loɣe ma arabarara gu ma adzuni. Loto loba si loba loasa nɖebi gu siɖe ɔɖuɖu kanya, fiɛ maaba maanya wũ ikpawaĩ.

19 "Loabara ikparĩ i ma ndɛ̃. Loasese mma lokuti mapia ngbã mawɛ̃ makɛlɛ nɖebi kɔrɛ- i Tarsis, i Libia, i Lidia* (mma nsɛ mapɛ kuta), i Tubal, i Greeki* gu i ndukilɔnrɔ̃ mɛ mpia ta kadzorokɔ̃ ana iso. Maturi magbe iinɔ wũ iyere manɔ, fiɛ mainya wũ ikpawaĩ ana manya. Mato maapɛ wũ ikpawaĩ imomo i nɖebi ndɛ̃. 20 Mato maakɔ mi manyiibi ɔɖuɖu mabɔrɛgu i nɖebi ndɛ̃ mabɔ lɛ karatã awe katã Bosate. Maasɛ i apɔngɔ iso, kubore gu makeke iso fiɛ mawɛ̃ aasɛ i mafirimupɔngɔ iso gu kupuapɔngɔ iso maba i Yerusalem, wũ kube sekelea iso. Mato maakɔ ma mabɔ lɛ kumɛgɔ i Israel mabi sɛ mabɔ ma geɖebu asɔrɛ i Bosate isɔrɛyo ame i arɔi sekelea ame i kubarara kanya. Bosate loɣɛ. 21 Ne nto loaɖi mawɛ̃ i ma ndɛ̃ sɔ maɖe masɔrɛdze gu ma Levise." Bosate loɣɛ.

22 "Lɛ kumɛgɔ i kato ɣɛtɛ gu karɔ̃ ɣɛtɛ wa loabara aase ne, ngbɔ i fɔ iyere gu fɔ ɔkparɛ aase i wũ anɔ ne." Bosate loɣɛ. 23 Ita i Ɔgbaleti Ɣɛtɛ iyiɖea iwɛ̃ ikɛlɛ imama gu Iwarãyi iwɛ̃ ikɛlɛ imama ne, maturi awune ɔɖuɖu to maaba maabɔ ati karɔ̃ i wũ katɔ̃." Bosate loɣɛ. 24 "Ne mato maabɔrɛ masɛ maanyɔ mma lota maya me iso maɔkpi mase, ma arɔrɛ̃ iibakpi, ɣee ma ɔtɔ wɔ nto ɔtsue ana iibanyi, fiɛ maaɖe inyanyara matã maturi awune ɔɖuɖu."