1 "Ɣɛɛ kiniɔ ne, O Yakob wũ ɔɖabo,

Israel wɔ loɖi losɛ, kã atsue.

2 Bosate, nwɔ lobara-ɔ

fiɛ ɔsasa-ɔ i ɔɣekoto ame,

nwɔ loabuai-ɔ sɔ,

O Yakob, wũ ɔɖabo, Yesurun,* nwɔ loɖi lotã so,

daanigã!

3 Alasɔ loafere ndu i kuɣɛ̃ɖea karɔ̃ iso,

gu kuworei i karɔ̃ korea iso.

Loafedza wũ Siwarã lofere i fɔ mabi iso,

fiɛ wũ kusɛkusɛ aaba i fɔ ɔkparɛ iso.

4 Mato maare maya lɛ sikua i sikuakaɖekɔ̃ dzɛ nsɛ mapia ndu awe,

lɛ mabesibe i kuworei kuruɛ.

5 Ɔwɛ̃ to ɔ̃aɣɛ sɔ, 'Bosate ɔre loɖe';

ɔmama to ɔ̃akpere so Yakob iyere.

Ɔturi mama to ɔ̃atsɛrɛ ɔsia i ɔ̃ kɔrɔ̃ iso sɔ, 'Bosate ɔkpɛ loɖe,'

fiɛ ɔto ɔ̃asu Israel lɛ ɔ̃ iyere awe.

6 "Bosate, Israel Igara

gu Ɖidze, Bosate Ɔlesate sɔ,

Mme nɖe ɔɖeakatɔ̃ fiɛ Mme nɖe ɔtsɔra;

Ɣaa mama kuwɛ̃ siina isu iɖo me.

7 Nna nse lɛ me awe? Mitã ɔpɛ ne imomo.

Ɔɖi ne kayi si ɔfere ne i wũ anɔ

nnɛ loɔba gɔ losɛ ara karɔ̃ ta maturi ɔwi,

fiɛ be nto iaba-

aĩ, ɔnyiiɔ si ɔɖi ara wa loaba ɔɣɛ.

8 Midaanigã, midaati mikpakpa.

Loipɛ nnɛgbe imomo lotã mi fiɛ loiɖi loɣɛ kokooko ɣɛɛ?

Mi nɖe wũ maɖansiɛ. Ɣaa mama ɔwɛ̃ ɔkpese ɔpia i wũ kama?

Oɣoo, Itasiare kuiwɛ̃ mama na; loiɣe kuiwɛ̃."

9 Mma ɔɖuɖu nsɛ mabara arapɔa iiɖe kuira,

fiɛ ara wa iso masɛ mana isoɣɔ, ɖe ara siefe.

Mma nsɛ masumu wã ɔbiɛ anɔmi.

Mapia i idaatsue ame, i ma mɔmɔ kunuarɛ ame.

10 Nna nsɛ ɔbara kuɣɔ kurere ɣee ɔtore kurere,

ngɔ loisɛ kutã wũ kusia kukuwɛ̃?

11 Mato maapia aɣɔ baradze gu mma nsɛ masumu wã kunuarɛ.

Kusɛ̃marabaradze kɔraa ne maturi awune kere maɖe.

Mitã ma ɔɖuɖu si masakanya si mabɔrɛ maba.

Mato maati makpakpa fiɛ kunuarɛ aamɔɛ̃ ma.

12 Torese sɛ ɔsu ibɔra

ɔɖi atɔgiri ɔsia iso;

ɔtore irapɔa gu sisɛ̃,

ɔsu ɔ̃ kɔrɔ̃ ɔle ɔfirikira kɔrɔ̃ i ne iso.

Kukã sɛ kukpɛ̃ wũ fiɛ ɔ̃le sɛ ɔro wũ iso;

ɔme sɛ ɔkore wũ fiɛ ɔsɛ ɔfɛ̃.

13 Rawedze sɛ ɔsia isusuwɛĩ

fiɛ ɔsɛ ɔbara ira ikparĩ ku kufe.

Ɔsɛ ɔsu ɔpɛ ɔwe ne ɔɖi

iyɔ ɔ̃ɔsu isusubɔra ɔta ne.

Ɔsɛ ɔbara ne i ɔturi kumiamia ame,

ɔsɛ ɔbara ne ilɛnyɔ gbaã,

iyɔ ɔ̃ɔsu ne ɔsɛ i kayoi ame.

14 Ɔpɛ seder adziri,

ɣee ɔsu sɛsɛi ɣee oɖum.

Ne ɔsɛ ɔpia wũ, ɔsɛ ɔmɔ ɔkpese kudziri gɔ mba ɔle i apodziri ame,

ɣee ɔpia ɔvɛi ne kado ɔtã ndu fiɛ ɔmɔ ne.

15 Iɖe ɔtɔipiara itã ɔturi;

ɔsɛ ɔsu ne awɛ̃ ɔpia ɔwa ala ɔtɔ,

ne awɛ̃ ɔsɛ ɔpia i ɔtɔ ɔfɛ̃ boɖoboɖo.

Ɣɛɛ ɔsɛ ɔwe ɣaa fiɛ ɔsɛ ɔsumu wũ;

ɔsɛ ɔbara irapɔa nɛ ɔsɛ ɔbɔitikarɔ̃ ɔtã.

16 Kudziri kasɛ ne ɔsɛ ɔtsuedza i ɔtɔ ame;

ne iso ɔsɛ ɔwa ɔ̃ aɖera ne,

ɔsɛ ɔfɛ̃ ɣee ɔkorera ɔ̃ sina fiɛ ɔsɛ ɔɖe ɔmi.

Ɔsɛ ɔsu ne awɛ̃ ɔpia ɔwa ɔtɔ fiɛ ɔsɛ ɔɣɛ sɔ,

"Ɛɣɛɛ̃! Loɔfe ɔtɔ; fiɛ nto lonyɔ ɔtɔ to ɔɖi sinyagɛmi."

17 Iyɔ ɔ̃ɔsu kudziri tsɔra ɔbara ala irapɔa, ɔ̃ ɣaa.

Ɔsɛ ɔkparamakayi ɔtã ne ɔɣɛ sɔ,

"Ɖi me; fɔ nɖe wũ ɣaa."

18 Maturi magbe iiɣe kuira, maisɛ manɔ kuira karɔ̃,

ira ɔku ma anɔmi ne ɔso maibawo ɔnya

fiɛ ma adzuni ɔsɛ̃ ɔso maibawo karɔ̃ ɔnɔ.

19 Kuwɛ̃ iisɛ ɔsɛ iti ame i nnɛ ɔto ɔbara iso,

kuwɛ̃ na inɔkpa ɣee karɔ̃inɔ gɔ ɔ̃aɣɛ sɔ,

"Kɔ̃ kasɛ losu lɛ ɔtɔipiara

fiɛ kɔ̃ atɔgirĩ iso lofɛ̃ boɖoboɖo kɔraa

ne ka lofɛ̃ sina fiɛ lowe ne.

Iɖe adzunisɛ̃ra sɔ loasu kudziri tsɔra lobara irapɔa nɛ nɖe inyanyara.

Isɛɛ kuiwɛ̃ na sɔ lobɔitikarɔ̃ lotã kakolosɛi.

20 Ɔsɛ ɔɖe ndɔ̃, ɔ̃ adzunisɛ̃ra adzuni ɔɔkɔ wũ ayura gɔ ibuai siina.

Ɔ̃ibawo so ɔɖi, ɣee ɔɣɛ sɔ,

"Ɔ̃ibafɔ ne ɔpia so sɔ irapɔa nɛ mpia i ɔ̃ kɔrɔ̃ ame iiɖe ɣaa ɖuɖuuɖu."

21 Bosate sɔ, "O Yakob, nyigi ara wagbe,

alasɔ wũ ɔɖabo aɖe lo, Israel.

Mme lobara-ɔ, wũ ɔɖabo aɖe;

O Israel, loibaɣara-ɔ.

22 Lobɛ fɔ aɣɛrɛ lotara lɛ adɔdɔ awe,

fiɛ fɔ akpi lotara lɛ kaya kuɖobiobio awe.

Kpese ba i wũ kɔrɛ,

alasɔ loɔɖi-ɔ"

23 Kato i kuɖokpo, mika kuka ku isoɣɔ alasɔ Bosate lobara nnɛgbe;

karɔ̃ i kayirinɔ, lakulu teteree.

Mika kuka, abe,

apo gu kudziri biara i kame,

alasɔ Bosate ɔɔɖi Yakob,

fiɛ ɔpia wũ kuwarɛ i Israel.

24 Bosate, ɖidze, nwɔ lobara-ɔ

ta kayiri ame to ɔɣɛ sɔ,

"Mme nɖe Bosate,

nwɔ lobara ara ɔɖuɖu,

nwɔ ɔnɔwɛ̃ lowarɛ kato i kuɖokpo,

nwɔ ɔ̃ mɔmɔ lowarɛ karɔ̃ ɔfere,

25 "nwɔ nsɛ ɔkpɔkpɔtɔra mila kanyamaɖidze akparĩ

fiɛ ɔsɛ ɔbara sibɔmapɛdze madzunisɛĩ,

nwɔ nsɛ ɔwuĩ mawolai araisuã i karɔ̃

fiɛ ɔsɛ ɔkpesera ne adzunisɛ̃ra.

26 Losɛ lotã wũ maɖabo atɔ̃me ɔba i ne ame

fiɛ losɛ lotã nnɛ i wũ makpabo ɔɣɛ masɛ ɔba i ne ame.

"Nwɔ nsɛ ɔɣɛ i Yerusalem iso sɔ, 'Maturi to maasɛ i ɔ̃ ame,'

ɔɣɛ i Yuda simagɛ̃ iso sɔ, 'Mato maaɖaɛ sɛ̃,'

i ma akpakpi iso sɔ, 'Loaledza wã itsue.'

27 Nwɔ nsɛ ɔɣere ndu kawodorokɔ̃ sɔ, 'Kore si loasɔ̃ra fɔ kuworei.'

28 Nwɔ nsɛ ɔɣere Kores sɔ, 'Ɔ̃ nɖe wũ masɛrɛkɔdze

fiɛ ɔ̃abara wũ kubie ɔɖuɖu ɔwiri.

Ɔto ɔ̃aɣere Yerusalem sɔ, "Maledza wũ itsue."

Ɔto ɔ̃aɣɛ i isɔrɛyo iso sɔ, "Mipia ɔ̃ sikaĩ i karɔ̃." '