YESAYA 16

Moab Aare Nrɔɔ̃

1 Misese nwɔ nto ɔɖe karɔ̃ iso

asɛrɛbi lɛ ɔɣiɛ toto,

ita i Sela iki i fafuĩ ame,

iba iabo Zion Ɔbibirɔ̃gomi kube iso.

2 Lɛ kurodzai gɔ mali maɖi i kɔ̃ arodzayo ame

fiɛ kuto kupɛ abue ne,

ngbɔ i Moab marɔ̃go aabara

i Arnon ɔwore kawarakɔ̃ ne.

3 "Tã bo adzuni,

ɖaɛ itɔ̃me.

Tã fɔ kusɔ si kuse lɛ kasɛ̃ -

si kukɔlɛ lɛ kakɔme ndɛ̃.

Kɔla maturiterea,

fiɛ daaɖi kakpã maturiterea atã.

4 Tã ma Moabse kakpã maturiterea si mawe i fɔ kɔrɛ;

fɔ ma i nwɔ nto ɔwɔra ma kɔrɛ."

Tilese kawirikɔ̃ to kaaba,

fiɛ ara inina to iatuĩ;

nwɔ nto ɔkpɛ̃gu maturi aayu i karɔ̃ iso.

5 I kuɖɔɛ ame ne, sigaraiyara aana isɛ,

fiɛ i ɔnukuare ame nwɔ lokate aasɛ ne iso

nwɔ lobɔrɛ i David ɔkparɛ ame,

nwɔ loaɣɛ atɔ̃me i ɔri iso

fiɛ ɔ̃atã sibɔlɔlɔ ɔba mala.

6 Boɔnɔ Moab katoikɔlɛso,

ɔ̃ sitatawele ɔmɔ,

ɔ̃ kɔrɔ̃ ituĩ i kagbegbe, ndamuiɖe gu ituridaawarɛ,

ɔ̃ katoikɔlɛso na i kuira ame.

7 Ne ɔso ma Moabse to mabiɛ,

ma ɔɖuɖu to mabiɛ Moab.

Wana, si amararã so

ala wainabikorea wa lobɔrɛ i Kir-Xareset ɔso.

8 Xesbon aputu ɔɔɣɔ,

Sibma wain adziri ana ɔɔɣɔ.

Mma nto maɖe nɖebi iso

ɔɔtuĩ sikpatɔrɛ̃ i wain adziri sɛɛ

wa lobo ta Yazer ku ɔwiɔ

fiɛ aɣa abo ta fafuĩ ame.

Ma akpa ɔɣa

akɛlɛ ta ɔpo katɔ̃.

9 Ne ɔso loto lobiɛ lɛ Yazer to ɔbiɛ

i Sibma wain adziri iti.

O Xesbon gu Eleale,

loabiɛ nnɔmɛ lofere mi iso!

Sima gu isoɣɔ nɛ nsɛ ila i fɔ adziribi ɔbewi

gu ɔsɔrɛ̃wi ɔɔlo.

10 Sima gu isoɣɔ ɔɔyu i fɔ adziribi nkpɛkɔ̃ ame;

kuwɛ̃ iisito ɔka aka ɣee ɔla kulu i fɔ wainnkpɛkɔ̃ ame;

kuwɛ̃ iisito ɔkã wain i fɔ wainkakakɔ̃

alasɔ loɔlora kulu.

11 Wũ ɔtu to ɔbiɛ ɔtã Moab lɛ kuka i siwɛ̃ sango iso,

wũ kame ame to ibiɛ itã Kir-Xeres.

12 Si Moab maturi ɔsɛ ma kasɔrɛkɔ̃ ne,

ɔɖaa kere mato so,

si makɛlɛ ma kasɔrɛkɔ̃ sɔ maakparamakayi ne,

kuira iibabɔrɛ i ne ame.

13 Nnɛgbe i Bosate ɔɔɣɛ koko i Moab iso ne. 14 Ɣɛɛ kiniɔ ne, Bosate sɔ, "I akɔ atɛ ame ne, lɛ akɔ wa i ɔɖabo ɔsɛ sɔ ɔ̃awe i siɖabo ame ne, Moab ɔle aaba karɔ̃ atoasɔ ɔ̃ maturi ɔsi gbaã. Mma lokuti ana ne, kɛkɛĩ gu kuturi sasoi kere maaɖe."