1 Loaka kuka lotã wũ ɖɔɛse

loaka kɔ̃ i ɔ̃ wainkakpɛkɔ̃ iso:

Wũ ɖɔɛse ɔwe wain kakpɛkɔ̃

i kabemi kukpa gɔ lobua ilɛ iso.

2 Ɔpupuri karɔ̃ ɔɖiɖi ata,

ɔpia wain adziri wa igbã lobua alɛ.

Ɔtsue dzuɛ̃se iyo kɔlɛa ɔsia iso

fiɛ ɔbara wainkakakɔ̃ ana ɔpia.

Ɔnyɔ ɔri sɔ wain adziri aaɣɔ̃ abi sɛɛ,

ɣɛɛ abi wa loilɛ aɣɔ̃.

3 "Kiniɔ ne, mi ma mpia i Yerusalem gu ma Yudase,

miɣɛ atɔ̃me i bo gu wũ wainkakpɛkɔ̃ ndɛ̃.

4 Be mama ikote sɔ loabara lotã wũ wainkakpɛkɔ̃

fiɛ loibara lotã kã?

Be ɔso lonyɔ ɔri lotã wainabi sɛɛ

fiɛ alalaa loɣɔ̃?

5 Kiniɔ ne, loaɣere mi

nnɛ loabara wũ wain kakpɛkɔ̃:

loabiɛ ɔkpã wɔ lotɛ̃ lopia kã,

sɔ mabɔi aawe wain adziri,

loabibiɛ kã abere

sɔ maturi aanene wain iso.

6 Loabara kã kakpɛkɔ̃ ga mawɔra,

fiɛ maisisɛ makpɛ̃ kã ame, ɣee matutu wain maledza

akora gu miyu aaɣa afu kã iso

fiɛ loaɣere adɔdɔ sɔ

adaatã kado si ɔpɛ ɔfere kã iso."

7 Bosate Ɔlesate wainkakpɛkɔ̃

nɖe Israel kaɖe,

fiɛ Yuda marɛrɛ̃ nɖe

kakpɛkɔ̃ ga nsɛ kapia wũ isoɣɔ.

Ɔnyɔ ɔri sɔ maaɣɛ atɔ̃me i ɔri iso, ɣɛɛ ituriɖoe ɔnya;

ɔnyɔ sibɔlɔlɔ ɔri, ɣɛɛ kaku gu iwana ɔnya.

8 Ndzo mitã mma nto matsue ayo mabua i ayo iso

mafɔ kukpɛkɔ̃ mabua i kukpɛkɔ̃ iso

gbɔgbɔɔgbɔ karɔ̃ kukawɛ̃ iisikuti

fiɛ mi ɔnɔwɛ̃ ka misi i karɔ̃ iso.

9 Bosate Ɔlesate ɔɣɛ lonɔ sɔ:

"Gbaã ne, ayo siare ɔɖuɖu to aakpese ayoku,

fiɛ ayo sɛɛ ɔɖuɖu aase akunu.

10 Kakpɛkɔ̃ ga lomɔ siwɛ̃ ina ne, wain adzafui awɛ̃ pɛ maana makã i kã ame

fiɛ si mapɛ atita agaku aweo ne, igaku iwɛ̃ kere maana mabɛse."

11 Ndzo mitã mma nsɛ mata kaya tutuutu

matere masiai ndã mɛ maanɛ,

masɛ kasɛ̃ ɔpɛ ɔsala

gbɔgbɔɔgbɔ mami ndã.

12 Siwɛ̃ masango gu masango sɛ ala i ma kukpakpe ame,

akasa gu aroi gu ndã

ɣɛɛ mana kuwarɛ matã Bosate kurabarara,

maisɛ mawarɛ ara wa ɔbara ala ɔ̃ nrɔɔ̃.

13 Ne ɔso wũ maturi to maakɛlɛ sisande ame i kafɔrɔ̃ iso

ala ara karɔ̃ idaanɔ ɔso;

ma atakere aakpi kukã

fiɛ maturi fefea aakpi kutukã.

14 Ne ɔso ikpibiɔ ɔɔbɛbɛdza ne iyiri,

iwarɛ ne kanya titiiti;

sɔ iafɔ Yerusalem makpakpaturi gu maturi kposu

gu ne maturi ma nto makpɛ̃ gu mma nto mana isoɣɔ lalaa.

15 Ne ɔso Bosate to ɔ̃abɔ maturi anɔ karɔ̃

ɔbɔ maturi awune karɔ̃,

ɔbɔ mma nsɛ makɔlɛ so kato anɔ karɔ̃.

16 Ɣɛɛ Bosate Ɔlesate iyere aakɔlɛ kato ala atɔ̃meiɣɛ i ɔri iso ɔso,

fiɛ Ɣaa sekelea aate so i isekele gu sibɔlɔlɔ ame.

17 Iyɔ masɛrɛ aana sikua mawe lɛ ma mɔmɔ ara kaɖekɔ̃;

asɛrɛbi aɖe ara i maranase ayoku ame.

18 Ndzo mitã mma lopia ikpi kasɔla ɔwɛ̃ mato makpadzɛ̃,

fiɛ mapia ɔtile siwɛ̃ mato makpadzɛ̃ lɛ ibuɛ.

19 Mato maɣɛ sɔ, "Mitã Ɣaa si ɔpɛ siwa,

mitã ɔpɛ siwa ku ɔ̃ karabara

sɔ boanya kã.

Kabɔrɛ kaba,

mitã Israel Ɔsekelea adzuni wa ɔsɛgu si aba

sɔ boatsue wã."

20 Ndzo mitã mma nsɛ marɔ aranyanyariã sɔ isɛɛ

marɔ isɛɛ sɔ iranyanyariã,

masu idududu sɔ ɔtɔ,

masu ɔtɔ sɔ idududu,

masu ɔɖo sɔ ɔmɛrɛ̃

masu ɔmɛrɛ̃ sɔ ɔɖo.

21 Ndzo mitã mma nsɛ mabu so mawolai

fiɛ mabe anɔ i ma mɔmɔ anɔ.

22 Ndzo mitã mma nsɛ male so sɔ marɛrɛ̃ maɖe i ndã inɛ ame

gu mma lobua maɣe ndã ilupu.

23 Mma nsɛ mafɔ kawɛrɛra i mma loɖe ipɔ kɔrɛ manyua ma

ɣɛɛ masɛ̃ sɔ maibaɣɛ i ɔri iso matã mma loɖe ibɛ.

24 Ne ɔso lɛ ɔtɔ sɛ ɔtsuedza katĩ

fiɛ sikua korea sɛ sitsue i ɔtɔsinyagɛ̃mi ame ne,

ngbɔ i ma siɖu aaburi

fiɛ ɔwiri aafuri ma aɣɔ̃la lɛ ɔsebu ɔkɛlɛgu ne,

alasɔ masɛ̃ Bosate, Ɔlesate mmara

fiɛ maiwarɛ Israel Ɔsekelea itɔ̃me.

25 Ne ɔso Bosate to ɔnagu ɔ̃ maturi sikpã teteree;

ɔkɔlɛ ɔ̃ kɔrɔ̃ kato sɔ ɔ̃apɛ ma.

Abe to ati

fiɛ makpise fefere i sivurã iso lɛ aku.

Ɣɛɛ i nnɛgbe ɔɖuɖu ame ne, Bosate sikpã iiɣɔ wũ

ɣɛɛ ɔkɔlɛ ɔ̃ kɔrɔ̃ ɔto.

26 Bosate ɔkɔlɛ kɔrɔ̃ ɔkpere nɖebi mɛ lodzoro,

ɔfue ɔkpere nɖebi mɛ mpia ta karɔ̃ kawirikɔ̃

maba

matere maba mala!

27 Iisɛ iɖa ma kuwɛ̃ ɣee matura,

ma kuwɛ̃ iisɛ ɔtua sirɛ ɣee ɔrɛ sirɛ;

ma kuwɛ̃ akpadza iisɛ akurisi wũ i ɔsɔ ame,

ma ntokota siwɛ̃ ana iisɛ situ.

28 Ma mirɛ̃ ɔmiɔmiɔ̃

maɔka ma kuta mato;

ma apɔngɔ apuɛ se lɛ apɛmbɛta,

ma kubore kukai se lɛ kagbadadururu.

29 Ma ifafã se lɛ dzata

masɛ mafafã lɛ madzata poroporoi;

masɛ mawũti si mamɔɛ̃ kabɔibi

masore kã maruigu gɔ kuwɛ̃ iibawo kã ɔfɔ.

30 Iyi nɛmɔ iso ne, maafafã i kã iso

lɛ ɔpo silɔ iɖi.

Fiɛ si ɔrere ɔnyɔ karɔ̃ iso ne,

ɔ̃anya idududu gu isoma;

adɔdɔ aafu i ta kuɣɛ̃ iso sɔ iagudu.