1 Kaɣɛkasɛ i Tiro iso:

Tarsis nduisoabuɛ, mimararã so

alasɔ mawɔra Tiro

gɔ mainyua iyo ɣee nduisoabuɛ kayakɔ̃:

Ta Kipro karɔ̃ iso ne,

itɔ̃me nɛgbe ɔɔbo ma i kutsue.

2 Milo, mi ma nsi i ndukilɔkarɔ̃ iso

gu mi kuɣamaɖese ma i Sidon,

ma i ɔpo iso masɛdze ɔɔbara maranase.

3 I ɔpo siare iso ne,

araɖea to aabɔrɛ i Sixor aba

nwa ana ɔbɔrɛ i kukpɛkɔ̃ gɔ i Nil ɔkpokpo

mabɔ sɔ ɔ̃akpese kuɣakaɖekɔ̃ itã kayiiso nɖebi.

4 O Sidon, kunuarɛ si kukpɛ̃-ɔ, ɔmagɛ̃siare wɔ i ibere ɔki ilɔ i ɔpo kuruɛ,

alasɔ ɔpo ɔɔɖe ika ɔɣɛ sɔ,

"Loikpɛ̃ kuɣe ɣee loɣe ɔbi lonya;

loikararã mabibirɛrɛĩ ɣee mabibirɔ̃gomi lonya."

5 Si itɔ̃me ɔbo Egipte ne,

ɔtu aabiɛ ma i nnɛ manɔ i Tiro iso.

6 Wara kɛlɛ Tarsis;

miwãna, mi ma karɔ̃ i ndu ɔki milɔ.

7 Mi isoɣɔ lalaa ɔmagɛ̃siare

ɔmagɛ̃siare kuere, kuere

gɔ loɖi ngba ɔkɛlɛ

ɔsɛ ɔ̃asɛ nrɔ̃ dzoroa iso ɔɖe i ngbe?

8 Nna loɖo nnɛgbe i Tiro

wɔ nsɛ ɔmɔɛ̃ sigara iso,

nwɔ kuɣamaɖese nɖe igara mabi,

fiɛ ɔ̃ kuɣamaɖese ɔfɔ iyere i kayiiso ɔɖuɖu?

9 Bosate Ɔlesate loɖo ne,

sɔ ɔ̃abɔ katoikɔlɛso biara nɛ lobɔrɛ i karana ame

fiɛ ɔ̃abɔ mma ɔɖuɖu lofɔ iyere i kayiiso karɔ̃.

10 Kpɛ̃ fɔ karɔ̃ lɛ masɛ makpɛ̃ i Nil ɔwore ɔkpokpo

Tarsis ɔbirɔ̃gomi,

alasɔ asiina nduisoabuɛ kayakɔ̃

11 Bosate ɔɔnabarã ɔ̃ kɔrɔ̃ ɔsia i ɔpo iso

ɔtã sɔ ma sigarakuɖekɔ̃ to kuti teteree.

Ɔ̃ɔtã silɔ i Foenisia iso

sɔ mawɔra ɔ̃ simagɛ̃siare dzɛ mba ɔle.

12 Ɔɣɛ sɔ, "Fɔ isoɣɔ lalaa si ka ituĩ,

O Sidon Ɔbitɛ, maɔfere-ɔ i karɔ̃!

Ta si akɛlɛ Kipro,

mmɔ kɔraa ne, aibana isobuɛ."

13 Nyɔ ma Babilon maturi karɔ̃

Mmagbe siina i kuira ame!

Ma Asiriase ɔɔkpesera mmɔ

fafuĩ ame kubɔibi kawekɔ̃.

Matsue ma adzarara kɔlɛa wa iso maasia maapɛ akpira mapia i ɔ̃magɛ̃ ame

mawɔra ma simagɛ̃ dzɛ mba ɔle

makpesera sɛ̃ ikpakpi.

14 Tarsis nduisoabuɛ, mibiɛ,

mawɔra mi simagɛ̃ dzɛ i abere ɔki alɔ!

15 Ɔwi wɔmɔ ame ne, mao maaɣara Tiro akɔ sikɔdzɛ wa loaɖe lɛ igara agbanayi. Ɣɛɛ akɔ sikɔdzɛ kawirikɔ̃ ne, ito iaba i Tiro iso lɛ ɔnɔ wɔ maɖi i ɔrɔ̃go wɔ nsɛ ɔsiai marɛrɛ̃ ame sɔ:

16 "Su fɔ siwɛ̃ sango si asɛ aki ɔmagɛ̃siare ame,

Oo ɔrɔ̃go wɔ nsɛ ɔsiai marɛrɛ̃ fiɛ maɔɣara wũ;

sa siwɛ̃ sango si aka kuka kukaakɔ

si maasu manyigi-ɔ."

17 Akɔ sikɔdzɛ kama ne, Bosate to ɔ̃ate Tiro kasɛã gu karoa. Ɔ̃akpese ɔkɛlɛ ɔ̃ marɛrɛ̃ isiai karabara ame, ɔɖegu kayiiso sigarakuɖekɔ̃ ɔɖuɖu asɔrɔ̃. 18 Tiro kusia gu sikã dzɛ ɔna i ɔ̃ kuɣaiɖe ame ne, maasu matã Bosate; maibasu masɛ ɣee masia kɔrɔ̃ masɛ. Ɔ̃ kusia gɔ ɔna ne, maasu matã mma nsɛ masumu Bosate sɔ maasu maɣa ala araɖea gbodzoo gu arapia sɛɛ matã so.