1 O Bosate, fɔ nɖe wũ Ɣaa;

loakɔlɛ-ɔ kato lole fɔ iyere,

alasɔ i ara ibara ku ɔnukuare i ɔri iso kukaakɔ ame ne,

ɔɔbara awawãra,

ara wa aɖo kokooko.

2 Akpesera ɔmagɛ̃siare isekpe,

ɔmagɛ̃siare wɔ ibere ɔki ilɔ akpesera ikpakpi,

mafɔ kawɛrɛkɔ̃ ga ibere ɔki ilɔ ɔɔkpese ɔmagɛ̃siare wɔ nsiina;

maisibatsue wũ manya.

3 Ne ɔso maturi ma mba ɔle aawarɛ-ɔ;

kaɖe ga loisɛ kawarɛ ara simagɛ̃ aanigã-ɔ.

4 Aɖe kawɛrɛkɔ̃ atã wɛrɛba,

kawɛrɛkɔ̃ atã nwɔ i ara ɔnya ku ɔ̃ inyaa ɔwi,

kawekɔ̃ gu awɛ ɔwi

gu ɔyu wɔ lofɔ wũ gɔ kuɣɛ̃ ɔbe.

Matilese to mawarã fofaafofaa

lɛ awɛ nto akpɛ̃ afere i ibere iso

5 fiɛ ana lɛ ɔtɔwiri i fafuĩ ame awe.

Alora mafɔ iwɔdzɔ;

lɛ kumɛgɔ i idɔdɔ sɛ ibɔ kuɣɛ̃ ɔle karɔ̃,

ngbɔ alora matilese ɔnɔ ne.

6 Kube gɔgbe iso i Bosate Ɔlesate aatu

ɔpɔrɔ̃ ɔtã maturi ɔɖuɖu gu aɖera wa mba iɖa,

ndã mɛ maɔɣedza ina ɔpã aasia iso -

sina dzɛ nlɛ siɖo gu ndã mɛ nlɛ miɖo.

7 Kube gɔgbe iso i Bosate aakɛkɛ

ara wa masu mafu maturi ɔɖuɖu iso,

ɔkati wɔ masu mafu nɖebi ɔɖuɖu iso;

8 ɔto ɔ̃ame kukpi kayi daaro.

Bosate wɔ Nsiguso aanukutu nnɔmɛ

ɔɖi i maturi ɔɖuɖu katɔ̃;

ɔ̃aɖi ɔ̃ maturi kunuarɛ

i karɔ̃ ɔɖuɖu iso.

Bosate loɣɛ.

9 Ɔwi wɔmɔ ame ne, maaɣɛ sɔ,

"Gbaã ne, bo Ɣaa i ngbe ne;

bosiaiti i ɔ̃ iso fiɛ ɔɖi bo.

Bosate i ngbe ne, bosiaiti i ɔ̃ iso;

mitã bona isoɣɔ si bolɛlɛ i ɔ̃ iɖi ame."

10 Bosate kɔrɔ̃ to kuasia i kube gɔgbe iso;

ɣɛɛ matutuĩ sikpatɔrɛ̃ i ma Moabse iso

lɛ masɛ mabibio sikua i aku kawirikɔ̃ fiɛ sibu.

11 Mato maawarɛ ma nrɔɔ̃ masɔ̃

lɛ nwɔ nto ɔba ɔ̃aɣa ndu.

Ɣaa to ɔ̃abɔ ma katoikɔlɛso karɔ̃,

atoasɔ masu ma nrɔɔ̃ mato mabara ara i kasɔla ame.

12 Ɔto ɔ̃abibiɛ mi kubereku kɔlɛa gɔ lobɛ

ɔ̃arara kɔ̃ i karɔ̃;

ɔ̃abibiɛ kɔ̃ ɔbɔ karɔ̃,

kukpese ɔsebu.