1 "Wũ ɔɖabo wɔ nsɛ lopia ɔle i ngbe ne,

nwɔ loɖi losɛ loipia kuɣɛ.

Loasu wũ Siwarã losia wũ iso

fiɛ ɔ̃asu atɔ̃meiɣɛ i ɔri iso ɔbɔ nɖebi.

2 Ɔ̃ibakɔlɛ silɔ kato ɣee ɔlakulu,

ɣee ɔkɔlɛ silɔ i sivurã iso.

3 Ɔ̃ibafɛ̃ tsatsa ɔkua wɔ loɣɔ

fiɛ ɔ̃ibanidza ikatisɛ nɛ nto itsue iro.

I ɔnukuareiɖe iso ɔ̃aɣɛ atɔ̃me i ɔri iso.

4 Nrɔɔ̃ iibafɛ̃ wũ ɣee ɔyu katetere

gbɔgbɔɔgbɔ ɔsɛra atɔ̃meiɣɛ i ɔri iso ifɔ kayi.

Ndukilɔnrɔ̃ aasu ɔriinyɔ mapia i ɔ̃ mmara ame."

5 Bosate wɔ nɖe Ɣaa sɔ -

nwɔ lobara kato fiɛ ɔwarɛ kuɖokpo,

nwɔ lowarɛ karɔ̃ fiɛ ara ɔɖuɖu ɔbɔrɛ i kã ame,

nwɔ nsɛ ɔtã karɔ̃ iso maturi siwarã,

ɔtã mma nsɛ masɛ i kã iso ngbã:

6 "Mme Bosate lokpere-ɔ i sibɔlɔlɔ ame.

Loamɔɛ̃-ɔ i kɔrɔ̃ lola.

Loamɔɛ̃-ɔ lola fiɛ loabara-ɔ

ndamu lotã maturi

gu ikpawaĩ lotã maɣɔsɔrɛdze,

7 sɔ aabusi anɔmi wa lobiɛ,

aaɖi mma mapia i iyo

aaɖi mma mapia i akpo ame fiɛ masi i idududu ame.

8 "Mme nɖe Bosate, wũ iyere i mmɔ ne!

Loibasu wũ kuwarɛ lotã ɔmama

ɣee wũ ile lotã aɣɔ.

9 Nyɔ, ara wa loɣɛ losɛ ɔɔba i ne ame,

Ara ɣɛtɛ loto loɖi kayi;

fiɛ iagodɛ̃ ibɔrɛ ne,

loɔɖi ne kayi lotã mi."

10 Mika ɔnɔ ɣɛtɛ mitã Bosate,

mile wũ mibɔrɛgu i karɔ̃ kuwirikɔ̃,

mile wũ mi ma nsɛ mikɛlɛ ɔpo iso gu ara ɔɖuɖu wa mpia i ɔ̃ ame,

mi ndukilɔnrɔ̃ gu mma nsi me iso.

11 Tã fafuĩ ame gu ɔ̃ simagɛ̃ si makɔlɛ ma silɔ;

tã kusɛkɔ̃ ngbegɔ i Kedar kasɛkɔ̃ si kuna isoɣɔ.

Tã Sela maturi si mana isoɣɔ;

tã mala kulu i abe atititɛ̃.

12 Tã masu ile matã Bosate

si mapɛ ɔ̃ ile imomo i ndukilɔnrɔ̃ iso.

13 Bosate aasɛ ɔbɔrɛ lɛ ɔrɛrɛ̃ barani,

lɛ kpãrɛrɛĩ ne, ɔ̃apia so ɔtɔ;

ɔ̃ala kulu ɔrɔ kakpã

fiɛ ɔ̃aɖe ɔ̃ matsirise iso.

14 "Lolo iɔna ɔpã,

loɔlokanana fiɛ lopia so i ɔyuɛ ame.

Ɣɛɛ kiniɔ lɛ ɔrɔ̃go wɔ i kuɣe ɔɔpɛgu ne,

loalakulu, loto ɔle fiɛ loawarã lokuti.

15 Loanina abe gu kubemi iso

lotã sɔ wã iso sikua ɔɖuɖu aakore;

loatã siwore ɔkpese ndukilɔnrɔ̃

lotã atubu ɔsɔ̃.

16 Loakɔ manɔbiɛdze lokigu i siri dzɛ maisɛ manya,

siri dzɛ maiɣe iso loakɔ ma;

loakpesera idududu ikpawaĩ i ma katɔ̃

lokpesera ngɔi nyanyariã mise sɔlɔsɔlɔ.

Ara wagbe loabara ne;

loibanyua ma losɛ.

17 Ɣɛɛ mma lofɔ aɣɔ maɖe,

mma nsɛ maɣere adziriku sɔ, 'Bo maɣaa miɖe,'

aakpese simasima i kunuarɛ siare ame.

18 "Minɔ, mi matsuetɛ̃se;

minyɔ, mi manɔbiɛdze, si minya!

19 Nna nɖe nɔbiɛdze fiɛ iiɖe wũ ɔɖabo

fiɛ atsue ɔtɛ̃ wũ lɛ ɔɖabo wɔ lopia katɔ̃me?

Nna i anɔmi ɔbiɛ lɛ nwɔ loipia kuɣɛ,

anɔ ɔbiɛ wũ lɛ Bosate ɔɖabo?

20 Miɔnya ara gbodzoo, ɣɛɛ miipia kanya;

mi atsue ɔbusi, ɣɛɛ miito minɔ kuira."

21 Ibo Bosate anɔ

ala ɔ̃ sibɔlɔlɔ ɔso

sɔ ɔ̃abara ɔ̃ mmara mimɔ milɛ ɔnyɔ.

22 Ɣɛɛ maturi ma ara mayu, fiɛ masore ma irabiara maruigu maɖe,

mamɔɛ̃ ma ɔɖuɖu mapia i abiɔ ame

ɣee makɔla ma i ayorɛ ame.

Maɔkpese ara wa mayu,

kuwɛ̃ na gɔ loafɔ ma;

maɔkpese ara wa masore,

kuwɛ̃ na gɔ loaɣɛ sɔ, "Kpesegu ma kɛlɛgu."

23 Mi nna loanɔ nnɛgbe

ɣee ɔkã atsue kukaakɔ i ɔwi wɔ nto ɔba ame?

24 Nna loɖi Yakob ɔtã mayu

fiɛ Israel ɔtã sɔ masore maruigu?

Iiɖe Bosate ɔɖe

nwɔ iso bobara ikpi ɣɛɛ?

Alasɔ maisɛ i ɔ̃ siri iso;

maibara i ɔ̃ mmara iso.

25 Ne ɔso ɔfedza ɔ̃ sikpã dzɛ mba ɔtɔ

kakpã inukutuso.

Ifu ma iso lɛ itɔkpe, ɣɛɛ mainɔkarɔ̃;

ɔtsuedza ma, ɣɛɛ iibo ma i ɔtu ame.