1 "Ndzo mitã mabi tsuelese,"

ngbɔ i Bosate to ɔɣɛ ne,

"mma nsɛ mabara ara wa loiɖo,

mabara kanyakawɛ̃ ga ame i wũ Siwarã iipia kɔrɔ̃,

mafu ikpi akpe akpe;

2 mma nsɛ makɛlɛ Egipte

fiɛ maisɛ makarɛ me;

mma nsɛ makarɛ sɔ Igarakpakpa si ɔdzuɛ̃ ma,

maawɛrɛ i Egipte kusɔ kayirinɔ.

3 Ɣɛɛ Igarakpakpa idzuɛ̃ aabɔ mi kunuarɛ,

Egipte kusɔ aabɔ mi kunuarɛ.

4 Atoasɔ maba makpakpa i Zoan

fiɛ mma mapia katɔ̃me ɔɔba maabo Xanes,

5 kunuarɛ aakpɛ̃ ɔbiara

ala maturi ma nna ma kusia ɔso,

maisɛ mabɔ ibuai ɣee katɔ̃ isɛ,

ɣɛɛ kunuarɛ gu isopa."

6 Kaɣɛkasɛ i Negev fafuĩ ame mabɔi iso:

Miaki i inyɛwe gu ɔɣiã karɔ̃ iso,

madzatarɛrɛ̃ gu madzatarɔ̃go karɔ̃,

kubɛku gu mabɔrɔdzuma karɔ̃,

mma mapia katɔ̃me aasore ma karana i mafirimu iso,

maasore ma ara wa lofɔ kuɣa i kapuapɔngɔ kapu iso,

makɛlɛgu karɔ̃ ga nna kusia mmɔ iso,

7 makɛlɛgu Egipte wɔ ibuai nna i kuira ame.

Ne ɔso lokpere wũ sɔ

Raxab wɔ Loisɛ ɔbara Kuira.

8 Kɛlɛ kiniɔ si atsɛrɛ asia i ita iso atã ma,

tsɛrɛ sia i kakosɛ iso,

sɔ i ayi wa nto aba ame ne,

iaɖe aɖansiɛ wa loibanukutu anya.

9 Akpekete gu mabi ma nna ɔnukuare maɖe i ngbe,

mabi ma loito mabie sɔ maakã Bosate itɔ̃me atsue.

10 Masɛ maɣere maranyase sɔ,

"Midaasinya kaɖikate!"

maɣere kanyamaɖidze sɔ,

"Midaatã bo kaɖikate i ara wa nɖe asɛɛ iso!

Miɣere bo ara wa nto alɛ ɔnɔ

miɣere bo kasɔla ara.

11 Bɔrɛ i ɔri wɔgbe iso,

daasɛ i ɔri wɔgbe iso,

si anyua bo ɔɖaa

ku Israel Ɔsekelea iso atɔ̃me!"

12 Ne ɔso Israel Ɔsekelea sɔ:

"Gɔ misɛ̃ itɔ̃me nɛgbe ɔso ne,

ɣɛɛ afɔ ɔtile apia

fiɛ asiaiti i kasɔla iso,

13 ikpi nɛgbe aakpese-ɔ

lɛ ibere kɔlɛa nɛ losia kukã fiɛ iɔre kama,

iabiɛ ɔluwɛ̃ kiniɔ kiniɔ.

14 Iabibiɛ lɛ irapɔa,

iinyɔ so nnya ibiɛ ikuti

sɔ maanya kasɛi i nnɛ lobibiɛ ame

sɔ maaɖi ala ɔtɔ i kasege ame

ɣee maka ala ndu i ndu itawo ame."

15 Bosate Wɔ Nsiguso, Israel Ɔsekelea sɔ,

"Ifiriki gu iwarã ame i mi iɖi pia,

ilokanana gu iti isia i wũ iso nɖe mi ɔle,

ɣɛɛ miibana kuiwɛ̃.

16 Miɣɛ sɔ, 'Ooɣo, boasɛ i apɔngɔ iso botere.'

Ne ɔso mito miatere!

Miɣɛ sɔ, 'Boasɛ apɔngɔ wa nsɛ atere teteree iso borui.'

Ne ɔso mma ntere masiai mi aatere teteree!

17 Maturi kakpi kawɛ̃ aatere

si ɔturi ɔwɛ̃ ɔpia ma ifɔ̃;

si maturi iru ɔpia mi ifɔ̃ ne,

mi ɔɖuɖu aatere,

gbɔgbɔɔgbɔ miakuti

lɛ afalagã ɔdziri i kube itititɛ̃,

lɛ kameleɖukui i kabemi iso."

18 Ɣɛɛ ito Bosate ɔkã sɔ ɔ̃anyɔ mi nnya;

ɔsɛ ɔta si ɔte mi sɔ mi ara ɔɖo wũ kayiri.

Alasɔ Bosate ne, Ɣaa wɔ nsɛ ɔɣɛ atɔ̃me i ɔri iso ɔɖe.

So aaɣɔ mma ɔɖuɖu nsɛ manyɔ wũ ɔri!

19 O Zion maturi ma nsi i Yerusalem, miisibabiɛ kaku. Mi ara aakpɛ̃ wũ nnya si mibiɛ mikpere wũ! Si ɔna ɔnɔ mi ikpere ne, ɔ̃atɔrã mi 20 Atoasɔ Sate ɔtã mi inyɛwe aɖera gu ibo ndu ne, ɔ̃isibasu mi maratedze ɔwɛrɛ mi, mianya ma ala mi mɔmɔ anɔmi. 21 Kuɖearɔ̃ miki oo, kubena miki oo ne, mi atsue aanɔ silɔ i mi kama sito siɣere mi sɔ, "Nya ɔri i ngbe, misɛ i ɔ̃ iso." 22 Iyɔ fɔ aɣɔ wa iso mafere sikãrɛtɛa gu sikãfudza ne, mianyɔ wã pupurii, miasu wã mifuĩdza lɛ ɔrɔ̃go wɔ i ara to afere ɔdzobo miɣere wũ sɔ, "Re me kama!"

23 Ana ne ɔto ɔ̃asese mi kado i ɔraɖui wɔ miɔpia i karɔ̃ ame iso, ɔtã sɔ aɖera wa loabo kaa aawe iɖa, asi gbodzoo. Ɔwi wɔmɔ ame ne, mi manantsuĩ aaɖe ara i aputu wa lobɛ ame. 24 Manantsuĩ gu mafirimu ma nsɛ mapupuri karɔ̃ aawe sikua gu ɔraɖui wɔ makɔtɛ masakanya fiɛ mawawarɛ ala katsue gu iɖikpuã. 25 Ɔwi wɔ maaɖue maturi gbodzoo fiɛ adzarara aabiɛ ne, ndu aabore ɔkore i abe kɔlɛa gu kubemi biara iso. 26 Ɔgbaleti aafiɛ lɛ kuɣɛ̃, fiɛ kuɣɛ̃ ifiɛ aawe ɔle ikpɛ ikɔdzɛ, lɛ akpɛnɛ akɔdzɛ kuɣɛ̃ ifiɛ, ku ɔwi wɔ i Bosate anyi ɔ̃ maturi ngbegɔ mabɛbɛ, ɔɖoe ayɛi wa ɔɖi ma.

27 Nyɔ, Bosate Iyere ɔbɔrɛ dzoroo ito iba,

ito ifu ku sikpã gu kuyɔ kpirikpirikpiri;

sikpã ɔyi wũ i kanya,

fiɛ ɔtɔ wɔ loatsuedza ara sia wũ i ɔnyagɛmi iso.

28 Ɔ̃ siwarã dzɛ ɔto ɔwarã se lɛ ndu mɛ ntere

miɔyi mibo ɔme.

Ɔto ɔtidza nɖebi i iwɔra saanu ame;

ɔpia ɔdziri i maturi anyalakpai ame

ɔdziri wɔ loakɔ ma ɔyura.

29 Fiɛ miaka kuka

lɛ kasɛ̃ ga miɖe mi iyi sekelea;

mi situ aana isɣɔ

lɛ kumɛgɔ i maturi sɛ masɛ mafɛ̃ aroi

maya Bosate kube,

makɛlɛ Israel Ita kɔrɛ.

30 Bosate to ɔ̃atã maturi ɔnɔ ɔ̃ silɔ dzɛ mba kuwarɛ

fiɛ ɔ̃atã manya ɔ̃ kɔrɔ̃ gɔ nto kuba karɔ̃

ku sikpã gu ɔtɔ wɔ nto ɔtsue,

ku adɔdɔ, kadoiɖu gu awɛ gu atumagirĩ.

31 Bosate silɔ asasamera Asiria;

ɔ̃asu ɔ̃ kugarapɛ ɔwuĩ ma ɔmatãra i karɔ̃.

32 Ipɛ biara nɛ i Bosate aapɛ ma,

ala ɔ̃ kadziri ne,

aasia i akasa gu siwɛ̃ masango wa mato masa silɔ iso,

gɔ ɔto ɔkpɛ̃gu ma ɔpɛ ma akama ala kɔrɔ̃.

33 Maɔledza Tofet* masɛ koko;

maɔledze mmɔ masɛ matã igara.

Mabara mmɔ ɔtɔ ɔwodoro fiɛ ɔbɛ ana

ala ndɔrɛ̃ gu ɔtɔ gbodzoo;

Bosate siwarã dzɛ ɔto ɔwarã

se lɛ sulfa ɔtɔ,

lopia sɛ̃ ɔtɔ.