YESAYA 37

Igara Ɔkarɛ Yesaya Kuka

1 Gɔ i Igara Xezekiya ɔnɔ nnɛgbe ne, ɔkɛkɛ ɔ̃ awu ɔsu ipundukoto ɔnyɔme ɔsɛ ɔ̃asɛ i Bosate isɔrɛyo ame. 2 Ɔpia Eliakim wɔ nto ɔnyɔ igaraiyo iso gu Sebna wɔ loɖe ratsɛrɛdze gu masɔrɛdze matɔ̃ɖedze, maturi magbe ɔɖuɖu ɔpia ipundukoto sɔ masɛ kanyaɖidze Yesaya wɔ nɖe Amoz ɔbi kɔrɛ. 3 Maɣere wũ sɔ, "Xezekiya sɔ boɣere-ɔ sɔ: Isoma, sitia gu kunuarɛ iyi iɖe nɔme, lɛ kumɛgɔ si mabi ɔɔbo ɔɣewi, ɣɛɛ ɔtalɛpo na ɔle gɔ ɔ̃aɣe ma. 4 Siainyɔ Bosate wɔ nɖe fɔ Ɣaa to ɔ̃anɔ atɔ̃me wa i kpãrɛrɛĩkpakpa wɔ i ɔ̃ ɔkɔse, Asiria igara, ɔpia sɔ ɔba ɔ̃abara Ɣaa wɔ mba ngbã aɣiãra. Iyɔ Ɣaa aanyagalagu wũ i nwa i Bosate fɔ Ɣaa ɔnɔ iso. Ne ɔso kparamakayi i maturi ma lokuti mapia ngbã iti.

5 Gɔ i Igara Xezekiya makpakpa ɔba Yesaya kɔrɛ ne, 6 Yesaya ɔɣere ma sɔ, "Bosate sɔ ne: Daanigã ala nnɛ anɔ ɔso - amusuora wa i kasasoi ga i Asiria igara ɔpia ɔba ɔ̃aɣɛ i wũ iso. 7 Kã atsue! Loto loasu siwarã lopia i ɔ̃ ame sɔ ɔ̃anɔ itɔ̃me iwɛ̃, ɔ̃akpese ɔkɛlɛ ɔ̃ karɔ̃ iso fiɛ i mmɔ ne, loatã maɖoe wũ ala ipɛmi.' "

Ma Asiriase Ɔpia Ifɔ̃ Mama

8 Gɔ kpãrɛrɛĩkpakpa ɔnɔ sɔ Asiria igara ɔɔrui i Lakis ne, ɔkpese kama, ne ɔsɛ ɔ̃anya sɔ igara to ɔkpɛ̃gu Libna.

9 Ɔwi wɔmɔ ame ne, Senakerib ɔfɔ kanya sɔ Tirxaka, Nubiase wɔ loɖe Egipte igara ka ɔsɛ ɔto ɔba ɔ̃ata kakpã i ɔ̃ iso. Gɔ ɔnɔ ngbɔ ne, ɔpia makpabo i Xezekiya kɔrɛ sɔ: 10 "Miɣere ma Yudase igara Xezekiya sɔ: Daatã kuɣɔ gɔ iso asiaiti si kusɔsɔla-ɔ si kuɣere-ɔ sɔ, 'Maibaɖi Yerusalem nrɔɔ̃ matã Asiria igara.' 11 Lofɔ loɖe sɔ ɔɔnɔ kumɛgɔ i Asiria magara ɔwɔra nrɔ̃ ɔɖuɖu manina me pelepele. Afɔ aɖe sɔ fɔ aana iɖi? 12 Nrɔ̃ mɛ i wũ mawa ɔwɔra ne, ma aɣɔ ɔɖi ma - Gozan gu Xaran gu Rezef gu Eden maturi ma i Tel Asar ne, ma aɣɔ ɔɖi ma? 13 Lɛ i Xamat igara, Arpad igara gu Sefarvayim ɔmagɛ̃ igara ɣee Xena igara ɣee Iva igara pia?"

Xezekiya Ɔkparamakayi Ɔkarɛ Ɣaa Ibuai

14 Xezekiya ɔfɔ ɔko ɔbɔrɛgu i katɔ̃memasɛdze nrɔɔ̃ ame ɔka. Kere ne ɔya ɔkɛlɛ Bosate isɔrɛyo ame ne ɔwarɛ ɔsɛ i Bosate katɔ̃. 15 Ne Xezekiya ɔkparamakayi ɔɣere Bosate sɔ; 16 "O Bosate Ɔlesate, Israel Ɣaa wɔ nsi i ɔ̃ sigaraiyara iso i makerubi kato, fɔ ɔnɔwɛ̃ fɔ nɖe Ɣaa i sigarakuɖekɔ̃ ɔɖuɖu iso i karɔ̃ iso. Fɔ lobara kato gu karɔ̃. 17 O Bosate kã atsue si anɔ, busi anɔmi, O Bosate si anyɔ; nɔ atɔ̃me wa ɔɖuɖu i Senakerib ɔsese ɔto ɔtia ala Ɣaa wɔ mba ngbã.

18 "O Bosate, gbaã iɖe sɔ Asiria magara ɔɔwɔra maturi magbe ɔɖuɖu gu ma nrɔ̃. 19 Mafuĩdza ma aɣɔ mapia i ɔtɔ ame matsuedza wã alasɔ iiɖe maɣaa maɖe, ɣɛɛ adziriku gu ata wa i maturi ɔbara ala arɔĩ maɖe. 20 Kiniɔ ne Bosate, bo Ɣaa, ɖi bo bɔrɛgu i ɔ̃ nrɔɔ̃ ame si kayiiso sigarakuɖekɔ̃ ɔɖuɖu aatsue sɔ fɔ ɔnɔwɛ̃, O Bosate fɔ nɖe Ɣaa.

Yesaya Kanya Ga Ɔsia Igara

21 Ne Yesaya, Amoz ɔbi ɔsia Xezekiya kanya sɔ: "Bosate, Israel Ɣaa sɔ: Gɔ akparamakayi atã me i Senakerib Asiria igara iso ɔso ne, 22 itɔ̃me nɛ i Bosate ɔɣɛ ɔsegu i ɔ̃ iso i ngbe ne:

"Zion Ɔbitɛ kagbɔɔ

sɛ ɔnyɔ-ɔ pupurii fiɛ ɔsɛ ɔbara-ɔ aɣiãra.

Yerusalem Ɔbibirɔ̃gomi

to ɔkɛkɛlɛdza iti ɔnyɔ gɔ ato atere.

23 Nna iso aɣɛ amusuora fiɛ atitia?

Nna iso akɔlɛ fɔ silɔ

fiɛ akɔlɛ anɔ i katoikɔlɛso ame anyɔ?

Israel Ɔsekelea iso iɖe ata aya!

24 Aki i fɔ maɖabo ma apia katɔ̃me iso

atitia Sate.

Aɣɛ ana sɔ,

'Losu wũ ayebi wũ kubore

losakɛ abe atititɛ̃,

ta Lebanon kube atititɛ̃.

Lotu ɔ̃ seder adziri wa lokɔlɛ aɖo,

ɔ̃ sivɛi dzɛ nlɛ siɖo.

Lobo ta ɔ̃ atititɛ̃ wa mpia i kadzorokɔ̃

ɔ̃ ipo nɛ nlɛ iɖo ame.

25 Loɔkuri atubiɔ i mafɔ nrɔ̃ iso

fiɛ lonɛ ndu i mmɔ.

Ku ngba kunu ne,

loɔsɔ̃ra Egipte siwore ɔɖuɖu.'

26 "Miinɔ?

Ta kokooko losɛ ne.

Kokowi loɖo ne;

kiniɔ ne, loɔtã iba i ne ame,

sɔ ɔɔkpesera simagɛ̃siare dzɛ matsue abere maki malɔ

ata akpe.

27 Maɔfɔ ɔle i ma maturi iso,

mayu ɔriinyɔ kunuarɛ to ma.

Mase lɛ sikua i iputu ame,

lɛ ayatati fɔrɔfɔrɔa,

lɛ sikua nto sire i isã,

siɔɣɔ kɔraa fiɛ siamɔ.

28 "Ɣɛɛ loɣe fɔ kasɛkɔ̃

ɔwi wɔ asɛ aba fiɛ asɛ abɔrɛ

ku sikpã dzɛ ato arɛ̃ i wũ iso.

29 Gɔ arɛ̃ sikpã i wũ iso

fiɛ fɔ inyɔso ɔɔbo me i atsue ame,

loapia-ɔ wũ gɔdai i ɔɣɔ̃ ame

lopia-ɔ wũ ikpo i kanya ame,

lotã akpese

i ɔri wɔ aki aba iso.

30 "O Xezekiya, nnɛgbe loaɖe-ɔ ikparĩ ne:

"Ikɔlɛ ne, aaɖe ɔraɖui wɔ lore ɔ̃ mɔmɔ i iputu ame

fiɛ ikɔ nyɔare ne, nnɛ lotata ibɔrɛ i nnɛmɔ iso.

Ɣɛɛ ikɔ tɛare ne, aapɛ ɔraɖui asɔrɛ̃ ɔraɖui,

aakpɛ̃ wain kukpɛkɔ̃ aɖe wã abi.

31 Ɔkpɛ ɔwɛ̃ ana ne, mma lokuti i Yuda ɔkparɛ ame

siɖu to siabo karɔ̃, maɣɔ̃ abi i kato lɛ kudziri awe.

32 Maturi kutia aabɔrɛ i Yerusalem

fiɛ Zion Kube iso i mma lokuti ikuri aabɔrɛ.

Bosate Ɔlesate kubɛ

loatã iba i ne ame.

33 "Ne ɔso lɛgbe i Bosate ɔɣɛ i Asiria igara iso ne:

"Ɔ̃ibabo i ɔmagɛ̃siare wɔgbe ame

ɣee ɔpɛ sirɛ̃ i ngbe.

Ɔ̃ibaba ɔ̃ katɔ̃ ku akpiraifɔra

ɣee ɔtu atɔrɛ̃ku ɔpiɛtɛ i ɔ̃ iso.

34 Ɔri wɔ iso ɔki ɔba iso ɔ̃akpese;

ɔ̃ibabo i ɔmagɛ̃siare wɔgbe ame."

Bosate loɣɛ ngbɔ.

35 "Loaya loku ɔmagɛ̃siare wɔgbe lofɔ wũ,

ala wũ mɔmɔ ɔso gu wũ ɔɖabo David ɔso!"

36 Ne Bosate kpabo ɔbɔrɛ ɔsɛ ɔ̃aɖoe Asiria makpakpɛ̃dze kukpi kulafa gu fasinafasina-iru i ngbegɔ masikanya. Gɔ mata ku kaɖesɛã ne, makpise kerekere maɖe i mmɔ! 37 Ne ɔso Asiria igara Senakerib ɔsamera ɔ̃ makpakpɛ̃dze. Ne ɔkpese ɔkɛlɛ kaa i Niniwe ɔsɛ ɔ̃asɛ i mmɔ.

38 Iyi iwɛ̃ gɔ ɔto ɔsɔrɛ i ɔ̃ kuɣɔ Nisrox iyo ne, ɔ̃ mabirɛrɛĩ Adramalex gu Sarezer ɔsu ipɛmi maɖoe wũ matere makɛlɛ Ararat karɔ̃ iso fiɛ ɔ̃ ɔbi Esar-Xadon ka ɔɖe sigara i ɔ̃ kama ne.