YESAYA 14

Ɣaa Maturi To Maakpese Maba Yuda

1 Ɣɛɛ Bosate to ɔ̃anyɔ Yakob nnya;

ɔto ɔ̃aledza Israel iɖi itã so,

ɔkpesera ma ɔ̃asɛra i ma mɔmɔ karɔ̃ iso.

Mafɔ to maaba maabua i ma iso

masu so mabara mawɛ̃ ku Yakob iyo.

2 Nɖebi to maakɔ ma

mabɔ ma mɔmɔ kasɛkɔ̃.

Fiɛ Israel kaɖe aafɔ nɖebi mɛ matã so

mabara ma masanderɛrɛ̃ gu masanderɔ̃go i Bosate karɔ̃ iso.

Mma lomɔɛ̃ ma i kakpã ame aakpese ma masande

fiɛ maaɖe mma lobara ma ɔtile iso.

3 Iyi nɛ i Bosate aaɖi-ɔ ɔbɔrɛgu i inyɛwe gu iɖaa gu karabara teteree ga masia-ɔ iso lɛ ɔsande awe ne, 4 miaka aɣiãra kuka gɔgbe i Babilonia igara iso sɔ:

"Ɔtilese kawirikɔ̃ ɔɔba

ɔ̃ sikpã lalaa ɔɔtuĩ!

5 Bosate ɔɔfɛ̃ matilese ɔsɛdziri,

ɔ̃ɔbiɛ mma nto maɖeiso kugarapɛ,

6 gɔ masu mawuĩ maturi i sikpã ame

mamatãra i karɔ̃ dzinitii

fiɛ masia ɔkpatɔrɛ̃ i nɖebi iso i sikpã ame

ku anɔmi rɛtɛa wa nna katuĩ.

7 Nrɔ̃ ɔɖuɖu ɔɔna iwarã gu isobuɛ;

matsɛ aka ika.

8 Sisɛsɛi gu Lebanon seder adziri

to ana isoɣɔ i fɔ iso aɣɛ sɔ,

"Kiniɔ gɔ maɔbɔ-ɔ karɔ̃ ne,

dzirikɛse kuwɛ̃ iisito ɔba ɔ̃atu bo ɔfere i karɔ̃."

9 Ta ikpibiɔ ka ito inyɔ ɔri

itã fɔ iba;

iɔtara makpise siwarã iɣedza sɔ maafɔ-ɔ.

Mma ɔɖuɖu loɖe matɔ̃ɖedze i kayiiso i ngbe;

itã sɔ maɔta i ma sigaraayara iso -

mma ɔɖuɖu loɖe sigara i nɖebi iso.

10 Ma ɔɖuɖu aatɔrã,

maaɣere-ɔ sɔ,

"Fɔ wũ ɔle ɔɔro-ɔ iso lɛ ɔro bo iso;

ɔɔkpese lɛ bo!"

11 Masora-ɔ gu fɔ ilɛlɛ ɔɖuɖu makɛlɛgu ikpibiɔ,

gu fɔ siwɛ̃ masango;

arɔrɛ̃ loaɖe fɔ ɔkala

fiɛ kurɔrɛĩ loaɖe fɔ ɔkati wɔ loafu-ɔ.

12 Nyɔ kumɛgɔ akpase abɔrɛ i kato,

O kaya iwãmi, ɔɖesɛrã ɔbi!

Maɔkpasera-ɔ mawuĩ i karɔ̃,

fɔ wɔ fɔ losia nɖebi ɔkpatɔrɛ̃!

13 Aɣɛ i fɔ ɔtu ame sɔ,

"Loaya lokɛlɛ kato;

loakɔlɛ wũ sigaraiyara

ikɔlɛ iɖo Ɣaa awãmi;

loasɛ i wũ sigaraiyara iso i isarɛ kube iso,

i kube sekelea gɔ lokɔlɛ kuɖo itititɛ̃.

14 Loaya lokɛlɛ adɔdɔ itititɛ̃;

loabara so lɛ Kuɖokpo Sate."

15 Ɣɛɛ makpasera-ɔ mabɔ i ikpibiɔ ame,

ta ikpibiɔ kawodorokɔ̃.

16 Mma lonya-ɔ sɛ manyɔ-ɔ tuee,

fɔ mmɔ iba ɔbara ma ɣii makarɛ so sɔ;

"Iiɖe ɔrɛrɛ̃ wɔgbe lotidza karɔ̃

fiɛ ɔtã sigarakuɖekɔ̃ ɔti makpakpa?

17 Ɔrɛrɛ̃ wɔ lotã kayiiso ɔkpese ikpakpi,

nwɔ losamera kã simagɛ̃siare,

fiɛ ɔsɛ̃ sɔ ɔ̃ibanyua mma ɔmɔɛ̃ i kakpã ame makɛlɛ ma aɖe?"

18 Nɖebi magara ɔɖuɖu rɛ i magara kabiarakɔ̃,

ɔbiara i ɔ̃ ikpibiɔ ame.

19 Ɣɛɛ mafuĩdza-ɔ maɖi i fɔ ikpibiɔ ame

lɛ idzirikpa nɛ loilɛ;

mma maɖoe aafu-ɔ iso,

mma lokpi kutɔfɔkpi,

mma lokpase makɛlɛ atawo ame

lɛ kpise wɔ mabibio ala ngba.

20 Aibawe i mma mabiara ame

alasɔ ɔɔnina fɔ karɔ̃

fiɛ aɖoe fɔ maturi.

Maisibarɔ

matilese ɔkparɛ iyere manya.

21 Miledza ngbegɔ miaɖoe ɔ̃ mabi misɛ

ala ma mawa akpi ɔso;

maisibata mafɔ nrɔ̃ matã so

maɖaɛ simagɛ̃siare i karɔ̃ iso kakɔi biara.

22 "Loata loya i ma iso,"

Bosate Ɔlesate loɣɛ,

"Loatu mma lokuti gu Babilonia iyere loɖi,

ɔ̃ mawa gu ɔkparɛ"

Bosate loɣɛ.

23 "Loakpesera wũ kutikuku kawekɔ̃

gu iba karɔ̃;

loasu ibubu nɛ loawɔra wũ lofiɛ wũ,"

Bosate Ɔlesate loɣɛ.

Kaɣɛkasɛ I Asiria Iso

24 Bosate Ɔlesate ɔɔkã sɔ;

"Gbaã ne, nnɛ i mme loɖo ne, ngbɔ iase ne,

fiɛ kumɛgɔ lobie sɔ ise ne, ngbɔ iase ne.

25 Loawɔra Asiria i wũ karɔ̃ iso;

i wũ abe iso ne, loatuĩ ɔkpatɔrɛ̃ i ɔ̃ iso.

Loasisi ɔ̃ sisande ɔnyigbã i wũ maturi iso

fiɛ loasisi sisande ato i ma amɔiti."

26 Nnɛgbe loɖo lotã kayiiso ɔɖuɖu ne;

fiɛ ne nɖe kɔrɔ̃ gɔ lonabarã losia i nɖebi ɔɖuɖu iso ne.

27 Alasɔ Bosate Ɔlesate ɔɖo ira, nna loawo wũ ɔkpɔkpɔtɔra?

Ɔ̃ɔnabarã ɔ̃ kɔrɔ̃, nna loawo kɔ̃ ɔfirikira?

Kaɣɛkasɛ I Ma Filistise Iso

28 Kaɣɛkasɛ gagbe ɔba ku ikɔ nɛ i igara Axaz ɔkpi.

29 Mi ma Filistise ɔɖuɖu ne, midaana isoɣɔ,

sɔ kadziri ga mato mapɛ mi ala ɔɔfɛ̃;

alasɔ kabɛku to kaabɔrɛ i aɣɛ wamɔ kayirinɔ,

fiɛ kã abi aaɖe kabiɛtɛ ga mba ɔle gbaã fiɛ kasɛ kata puĩ puĩ.

30 Mawɛrɛba ame mawɛrɛba aana ma mabɔi aɖera kaɖekɔ̃,

fiɛ mma i ara ɔnya aarɛ i isobuɛ ame.

Loasu kukã lowɔra-ɔ ta siɖu ame;

kuaɖoe fɔ maturi ma lokpi makuti.

31 Mibiɛ lo, ɔka! Si awana lo, ɔmagɛ̃siare!

Ma Filistise, mi ɔɖuɖu miwɛnɛkɛ̃ mifere i karɔ̃ lɛ nnɔĩ!

Kuyɔ to kuta kubɔrɛ i kato isɛ lipii,

fiɛ ɔturi nyɔkɔtɔã kuwɛ̃ na i ma ndɛ̃.

32 Mme mmuai maatã

mma i kaɖe gamɔ ɔpia-ɔ?

"Bosate ɔɔɣedza Zion ngba i karɔ̃,

fiɛ i ɔ̃ ɔmagɛ̃ ame ne, ɔ̃ maturi ma manyɛdɛ̃ aana isobuɛ."