1 Kuwa kɔdzɛ gɔmɔ ame iyi sinyɔnaare iso ne, Israel mabi ɔba maasa so kanya. Manyikanya, mapia ipundusikoto gɔ maɖi sise mafere i ati iso. 2 Israel mabi ɔɖe katɔ̃ maɖi so ise i mafɔ ɔɖuɖu kɔrɛ. Ne Israel mabi ɔta maya fiɛ maɖi ma akpi wa mabara gu ma mawa ɔtile maɣɛ. 3 Maya i ngbegɔ ame maɣɛ fiɛ maka Bosate, ma Ɣaa Mmara Ɔko matã ma, ifɔ siɖɔwũ itɛ. Siɖɔwũ itɛ mama i mmara ika kama ne, maɖi ma akpi maɣɛ, ne masumu Bosate, ma Ɣaa ne. 4 Ma Levise ɔya i asɛtiĩ iso, mmɔ i Yesua, Bani, Kadmiel, Sebania, Buni, Serebia, Bani gu Kenani - ɔya ne makparamakayi ku silɔ teteree matã Bosate ma Ɣaa ne. 5 Ne ma Levise - Yesua, Kadmiel, Bani, Xasabneya, Serebia, Xodia, Sebania gu Petaxia - ɔlakulu maɣɛ sɔ, "Mita miya si mile Bosate, mi Ɣaa, nwɔ mpia ɔwi daaro ikɛlɛ ɔwi daaro."

"Maale fɔ iyere nɛ mba ɔle, fiɛ maakɔlɛ ne kato maɖo kusɛkusɛ gu ile ɔɖuɖu.

6 Fɔ ɔnɔwɛ̃saã nɖe Bosate. Fɔ lobara kato, ta kato dzoroo gu kã awãmi akuri ara ɔɖuɖu. Fɔ lobara karɔ̃ gu ɔpo gu ara ɔɖuɖu wa mpia i karɔ̃ iso gu ɔpo ame. Fɔ nsɛ atã irabiara ngbã. Kato ara akuri siare sɛ asumu-ɔ.

7 "Fɔ nɖe Bosate, Ɣaa, nwɔ loɖi Abram fiɛ akɔ wũ abɔrɛgu i Ur i Kaldea karɔ̃ iso fiɛ afirikira ɔ̃ iyere sɔ Abraham. 8 Anya ɔ̃ ɔtu sɔ ɔɖe ɔnukuare ɔtã-ɔ fiɛ akãgu wũ ndamu, sɔ aasu ma Kanaanse, ma Xitise, ma Amorise, ma Perizise, ma Yebuse gu ma Girgasise nrɔ̃ atã ɔ̃ ɔkparɛ. Ɔɔmɔɛ̃ fɔ kaɣɛkasɛ ala alasɔ ase bɔlɔlɔ.

9 "Anya kumɛgɔ i bo mawa ɔwe inyɛ i Egipte karɔ̃ iso. Anɔ ma ibiɛ kulu i Ɔpo Rɛtɛa kanya. 10 Abara awawã akparĩ gu awawãra siare asu ata aya i Igarakpakpa iso gu ɔ̃ maɖabo gu ɔ̃ karɔ̃ iso maturi ɔɖuɖu iso, alasɔ aɣe ma Egiptese amumuɔ gu iteso i ma iso. Iki ara wagbe iso atã fɔ iyere ɔre kayi fiɛ ise ngbɔ ipɛ nɔme. 11 Aɣɛ ɔpo ndɛ̃ i ma katɔ̃, ne maki i karɔ̃ korea iso mafe. Ɣɛɛ mma ntere masiai ma ne, atã masɛ ndu i ngɔi mɛ lowodoro lɛ kumɛgɔ i ita sɛ iwã ikɛlɛ ndu gbodzoo karɔ̃ awe. 12 Atã adɔdɔ wa lomini ibo ɔkɔ ma i ikpɛnɛ ame fiɛ kasɛ̃ ne, afiɛ ate ma ɔtɔ i ɔri wɔ maaki iso.

13 "Aso abɔrɛ i kato aba i Sinai Kube iso. Aɖe ma ika abɔrɛgu i kato. Atã ma asɛra gu mmara wa loya fiɛ ase bɔlɔlɔ fiɛ atã ma asɛ̃ra gu mmaraisi wa nlɛ. 14 Atã matsue fɔ iwarãyi sekelea fiɛ atã ma mmaraisi gu asɛ̃ra gu mmara akigu i fɔ ɔɖabo Mose iso. 15 Gɔ kukã ɔkpɛ̃ ma ne, atã ma aɖera wa lobɔrɛ i kato fiɛ gɔ ɔme ɔkore ma ne, atã ndu ɔbɔrɛ i ita ame mitã ma. Aɣere ma sɔ makɛlɛ masɛ maafɔ karɔ̃ ga akã ndamu ku fɔ kɔrɔ̃ gɔ akɔlɛ kato atã ma sɔ aatã ma.

16 "Ɣɛɛ ma, bo mawa ɔkɔlɛ so kato fiɛ mawe ɔnɔle, ne masɛ̃ maiwarɛ fɔ silɔ dzɛ atã ma ne. 17 Masɛ̃ sɔ maito makã atsue. Maɣara awawãra ɔɖuɖu wa abara i ma ndɛ̃. Mabara ɔnɔle fiɛ i ma itaiyaiso ame ne, maɖi tɔ̃ɖedze sɔ si ɔkɔ ma si makpese makɛlɛ ma sisande ame. Ɣɛɛ fɔ ne, Ɣaa wɔ losu akpi ɔtsɛ aɖe. Abualɛra gu nnyainyɔ ɔyi i fɔ ame, aisɛ ana sikpã malamala, ayigu kuɖɔɛ gbaã. Ne ɔso ainyua ma asɛ. 18 Atoasɔ mabara inantsuĩbi kumiamia irapɔa matã so fiɛ maɣɛ sɔ, 'Nnɛgbe nɖe mi ɣaa, nwɔ loɖi mi ɔbɔrɛgu i Egipte karɔ̃ iso ne,' ɣee si mabara imusuora gbaã ne ainyua ma asɛ.

19 "Ala fɔ nnyainyɔ siare ɔso ne ainyua ma asɛ i fafuĩ ame. Aitã adɔdɔ wa lomini aɖe ma katɔ̃ ku ikpɛnɛ ame ɔnyua ma ikɔ i ma ɔri iso ɣee aitã ɔtɔ wɔ lofiɛ ɔfere i ɔri wɔ iso maaki, ku kasɛ̃ ɔrui i ma kɔrɛ. 20 Atã sɔ fɔ Siwarã sɛɛ, si site ma ara. Aiɖi fɔ mana i ma nnya ame fiɛ atã ma ndu i ma kutukã ame manɛ. 21 Anyɔ ma iso akɔ sina gɔ mawe i fafuĩ ame, kuira iinya ma. Arapia iikpi i ma iso fiɛ ma ngba iiɣe.

22 "Atã ma sigarakuɖekɔ̃ gu nɖebi. Atã mafɔ nɖebi mɛ nse ame dzoroo ku ma nrɔ̃. Atã mafɔ Xesbon igara Sixon karɔ̃, atã mafɔ Basan igara Og karɔ̃. 23 Atã ma mabi ɔsi lɛ awãmi wa i kuɖokpo awe. Ne akɔ ma abɔ i karɔ̃ ga iso aɣere ma mawa sɔ makɛlɛ masɛ maabo si mafɔ. 24 Ma ɔkparɛ losɛ maafɔ karɔ̃. Ne asu ma Kanaanse ma nsi i karɔ̃ iso, apia i ma nrɔɔ̃ ame. Asu ma Kanaanse, ibua i ma magara iso gu ma maturi apia i fɔ maturi nrɔɔ̃ ame sɔ mabara ma lɛ maɖɔɛ. 25 Mamɔɛ̃ simagɛ̃siare dzɛ mba ɔle gu nrɔ̃ mɛ nlɛ, ne masu ayo wa ame loyigu ara sɛɛ agbaãagbã. Mafɔ abiɔ wa maɔkuri masɛ, wainnkpɛkɔ̃ gu oliva nkpɛkɔ̃ gu aɖedziribi gbodzoo. Maɖe ara, mami, mana so, ne maɖe kayi gbaã ku ara sɛɛ gbodzoo wa atã ma.

26 "Ɣɛɛ ne maikã-ɔ atsue ne mata maya-ɔ iso, makpa fɔ mmara masɛ i kama. Maɖue fɔ kanyamaɖidze ma lotã ma kuka sɔ si makpese maba fɔ kɔrɛ. Ne mabara amusuora wa nna iɣɛ. 27 Ne ɔso asu ma apia i ma matsirise nrɔɔ̃ ame fiɛ mawedza ma inyɛ. Ɣɛɛ gɔ mato mawedza ma inyɛ ne, mabiɛ malakulu makpere-ɔ. Anɔ ma kulu abɔrɛgu i kato, ne i fɔ nnyainyɔ gbodzoo ame ne atã ma maɖidze, mma loɖi ma i ma matsirise nrɔɔ̃ ame.

28 "Ɣɛɛ kumɛgɔ ame mana iwarã ne, masɛ mabara ikpi i fɔ anɔ. Kere ne anyua ma asɛ makɛlɛ maabo i ma matsirise nrɔɔ̃ ame si matsirise si maɖe ma iso. Ne gɔ mabiɛ malakulu makpere-ɔ ana ne, anɔ ma kulu i kato, ne i fɔ nnyainyɔ gbodzoo ame asɛ aɖi ma ɔwi ku ɔwi ame.

29 "Atã ma kuka sɔ si makpese maba i fɔ mmara kɔrɛ. Ɣɛɛ ne makɔlɛ so kato fiɛ maiwarɛ fɔ mmara. Maɣɛrɛ fɔ mmara mɛ nsɛ mitã ɔturi ɔwe ngbã si ɔwarɛ me. Ku ma ɔnɔle ne mapɛ ma kama mafirikira matã-ɔ, ne maka simɔ fiɛ masɛ̃ sɔ maibakã atsue. 30 Aɣara so atã ma akɔ gbodzoo. Asu fɔ Siwarã atã ma kuka akigu i fɔ kanyamaɖidze iso. Ɣɛɛ masɛ̃, mainɔ, ne ɔso asu ma apia i magbamikui nɖebi nrɔɔ̃ ame. 31 Ɣɛɛ ala fɔ nnyainyɔ gbodzoo ɔso ne, aiwɔra ma ɣee anyua ma asɛ alasɔ fɔ ne, abualɛra gu nnyainyɔ Ɣaa aɖe.

32 "Ne ɔso kiniɔ ne, Ao, bo Ɣaa, ɔsiare, ɔlesate gu Ɣaa wɔ nɖe ifɔ̃ra, fɔ wɔ nsɛ amɔɛ̃ fɔ ndamu ku fɔ kuɖɔɛ gɔ loisɛ kufiriki ala, daatã inyɛwe ɔɖuɖu nɛ loba i bo iso, bo magara, bo makpakpaturi, bo masɔrɛdze gu kanyamaɖidze, tete mɛrɛ̃ gu fɔ maturi ɔɖuɖu iso, ita i Asiria magara ɔwi iba iabo nɔme, si iɖe idzɛ i fɔ anɔmi ame. 33 Fɔ ɔkpɛ ɔya gɔ ara ɔɖuɖu wagbe ɔba i bo iso. Nnɛ ikote sɔ aabara i ɔnukuare ɔri iso iɖe abara. Bo ɣɛɛ ne, ira nɛ loilɛ bobara. 34 Bo magara, bo matɔ̃ɖedze, bo masɔrɛdze gu bo mawa mɛrɛ̃ iibara i fɔ mmara iso. Maikã fɔ mmaraisi gu fɔ kuka gɔ atã ma atsue. 35 Atoa ɔwi wɔ mapia i ma sigarakaɖekɔ̃ ame kɔraa, fiɛ mato maɖe ara sɛɛ gbodzoo wa atã ma i karɔ̃ sɛɛ ga lobɛ kafere kɔraa ne, maisumu-ɔ ɣee maifiriki i ma siri nyanyariã iso.

36 "Ɣɛɛ ka nyɔ bo, boɔkpese masande nɔme, masande i karɔ̃ ga asu atã bo mawa sɔ maɖe kã iso aɖedziribi gu ara sɛɛ mama wa kasɛ katã. 37 Ala bo akpi ɔso ne, karɔ̃ ara sɛɛ gbodzoo wa nsɛ abɔrɛ i kã ame sɛ akɛlɛ magara ma kayirinɔ asu bo apia kɔrɛ. Magara magbe sɛ maɖe bo iso gu bo ayomabɔi iso lɛ kumɛgɔ maɖɔɛ. Bopia i imɔrɛ̃ siare ame gbaã.

38 "Ara ɔɖuɖu wa loba ɔso ne, boto bokã ndamu mɛ loanyi bo, botsɛrɛ bosɛ, fiɛ bo matɔ̃ɖedze, bo ma Levise gu bo masɔrɛdze aapia kɔrɔ̃ i ne kayirinɔ."