MOSE V 34

Mose Kukpi

1 Kere ne Mose ɔrui i Moab katɛfɛkɔ̃ ne. Ɔya Nebo Kube ɔsɛ ɔ̃abo i Pisga Kube itititɛ̃, i Yeriko kanɔsɔ̃. Mmɔ i Bosate ɔte wũ karɔ̃ ɔɖuɖu. Karɔ̃ gagbe ɔta i Gilead ibuiti ikɛlɛ ta Dan ɔmagɛ̃ iso. 2 Ifɔ Naftali karɔ̃ ɔɖuɖu gu Efrayim gu Manase abuiti gu Yuda karɔ̃ ɔɖuɖu ikɛlɛ ɔpo wɔ mpia i kuɣɛ̃kabokɔ̃ isɛ iso. 3 Bosate ɔte Mose Yuda kagbalɔ gu ibuiti ɔɖuɖu nɛ lota i Yeriko Kagbolomi ɔmagɛ̃ wɔ masɛ marɔ sɔ, Kabɛrɛ Ɔmagɛ̃siare isɛ iabo ta Zoar ɔmagɛ̃siare kɔrɛ. 4 Kere ne Bosate ɔɣere wũ sɔ, "Karɔ̃ gagbe loɣɛ losɛ ku ndamu lotã Abraham gu Isak gu Yakob ku ɔwi wɔ loɣɛ sɔ, 'Loasu kã lotã mi ɔkparɛ' ne. Loɔtã-ɔ anya kã ku fɔ anɔmi ɣɛɛ aito aawara abo i kã ame."

5 Ne Mose, Bosate ɔɖabo, ɔkpi i Moab karɔ̃ iso lɛ kumɛgɔ i Bosate ɔ̃ɔɣɛ. 6 Bosate ɔbiara wũ i Moab karɔ̃ iso, i kagbolomi ga mpia i Bet Peor kanɔsɔ̃ isɛ. Ɣɛɛ kuwɛ̃ iiɣe ngbegɔ i ɔ̃ ikpibiɔ pia ipɛ nɔme. 7 Mose ɔfɔ akɔ kulafa gu sinyɔ fiɛ ɔkpi ɣɛɛ ɔ̃ anɔmi ɔlɛ fiɛ ɔwe ɔle ana. 8 Israel mabi ɔbiɛ Mose ayi sitɛ i Moab katɛfɛkɔ̃, gbɔgbɔɔgbɔ maro ibiɛ gu isoma ayi.

9 Kiniɔ ne Ɣaa ame iwola siwarã ɔyi Yosua wɔ nɖe Nun ɔbibirɛrɛĩ ame, alasɔ Mose ɔsia wũ nrɔɔ̃ iti. Ne ɔso Israel mabi ɔkã wũ atsue fiɛ mabara nnɛ i Bosate ɔɣere ma iki i Mose iso.

10 Ita i ɔwi wɔmɔ ne Ɣaa kanyaɖidze kuwɛ̃ iiba i Israel lɛ Mose awe. Nwɔ iBosate ɔtsue anɔ ku anɔ. 11 Ɔ̃ lobara Bosate awawã akparĩ gu ara wa mba ɣii. Nwa ɔsese wũ sɔ ɔbara ɔte Egipte Igarakpakpa gu ɔ̃ makpakpa ɔɖuɖu gu ɔ̃ karɔ̃ ɔɖuɖu. 12 Ala kuwɛ̃ iiɖi ɔle siare ɔte ɣee ɔbara afɔ̃ra wa i Mose ɔbara i Israel kaɖe ɔɖuɖu anɔ ɔnya.