MOSE V 2

Israel Mabi Ɔlala Makiki i Fafuĩ Ame

1 Mose ɔsɔgu sɔ: Kere ne bopɛ bofiriki botsueiti i fafuĩ ame isɛ, iki i ɔri wɔ nkpa Ɔpo Rɛtɛa kɔrɛ, lɛ kumɛgɔ i Bosate ɔɣere me. Bowe bola boɔsɛ boɔkiki i Seir kabemi karɔ̃ iso ifɔ ɔwi gbodzoo.

2 Kere ne Bosate ɔɣere me sɔ, 3 "Iɔfɔ ɔwi, gɔ miɔkiki i kabemi karɔ̃ ame, kiniɔ ne mifiriki miki i katikpe isɛ. 4 Tã maturi silɔ dzɛgbe. 'Ka mito miba miaki i mi manyii ibuiti ame, mma nɖe Esau ɔkparɛ fiɛ masi i Seir. Mato maanigã mi ɣɛɛ midzuɛ̃ so kukaakɔ. 5 Midaapia ma sikpã sɔ miakpɛ̃ kakpã alasɔ loibatã mifɔ ma karɔ̃ kukawɛ̃, nane kɛkɛĩ sɔ miasia kukpa iso. Loɔsu Seir kabemi karɔ̃ lotã Esau sɔ kaɖe ɔ̃ kare. 6 Mitã ma kuso i sikãfudza ame, i aɖera wa miaɖe gu ndu mɛ mianɛ iti.' "

7 Bosate mi Ɣaa ɔɔfere kusɛkusɛ i mi nrɔɔ̃ ame karabara ɔɖuɖu iso. Ɔ̃ɔnyɔ mi iso i mi irisɛ iki i fafuĩ siare wɔgbe ame. Akɔ sina wagbe ne Bosate mi Ɣaa, ɔɔwegu mi fiɛ kuira iinya mi.

8 Ne ɔso boki bofe bo manyii Esau ɔkparɛ ma nsi i Seir. Bonyua Araba ɔri wɔ lobɔrɛ i Elat gu Ezion Geber bosɛ fiɛ boki i fafuĩ ame ɔri wɔ nkpa Moab.

9 Kere ne Bosate ɔɣere me sɔ, "Midaaɖaa ma Moabse ɣee midaapia ma sikpã si miakpɛ̃ kakpã. Midaabara ne alasɔ loibatã mi ma karɔ̃ kukakɔi. Loɔsu Ar karɔ̃ lotã Lot ɔkparɛ lɛ ma kare."

10 (Ma Emise losɛ i mmɔ manya. Maɖe maturi ma lowe ɔle fiɛ masi gbodzoo fiɛ makɔlɛ lɛ ma Anakse. 11 Lɛ ma Anakse ne, ma wũ masɛ masu ma lɛ ma Refaise ɣɛɛ ma Moabse ɔkpere ma sɔ ma Emise. 12 Ma Xorise ɔsɛ i Seir saa ɣɛɛ Esau ɔkparɛ mabi ɔsa ma maɖi i mmɔ. Mawɔra ma Xorise i ma katɔ̃ fiɛ masɛ i ma kasɛkɔ̃, lɛ kumɛgɔ Israel mabi ɔbara i karɔ̃ ga i Bosate ɔtã ma lɛ ma kare.)

13 Ne Bosate ɔɣɛ sɔ, "Mita si miwara Zered Kagbolomi kiniɔ." Ne ɔso bowara kagbolomi.

14 Akɔ sitɛ-farafana lofe ita i ɔwi wɔ borui i Kades Barnea gbɔgbɔɔgbɔ bowara Zered Kagbolomi. Ɔwi wɔgbe ame ne ɔɣekparɛ wɔ loɖe makpakpɛ̃dze ɔɖuɖu, ɔɔkpi mabɔrɛ i kasɛkɔ̃ ame, lɛ kumɛgɔ i Bosate ɔkã ɔtã ma. 15 Bosate kɔrɔ̃ ɔta kuya i ma iso gbɔgbɔɔgbɔ ɔ̃ɔwɔra ma pelepele ɔɖi i kasɛkɔ̃ ame.

16 Kiniɔ ne ɔwi wɔ i makpakpɛ̃dze magbe matsɔra ɔɔkpi mabɔrɛ i maturi ame ne, 17 Bosate ɔɣere me sɔ, 18 "Nɔme ne miaki i Ar kɔrɛ i Moab ibuiti ame. 19 Si mibo ma Amonse kɔrɛ ne, midaaɖaa ma ɣee midaapia ma sikpã sɔ miakpɛ̃ kakpã. Ala loibatã mifɔ karɔ̃ ga nɖe ma Amonse kare kukawɛ̃ ɔso. Loɔsu kã lotã Lot ɔkparɛ lɛ ma kare."

20 (Mmɔ ana ne manyɔ ne sɔ ma Refaise karɔ̃ kaɖe, mma losɛ i mmɔ saa ɣɛɛ ma Amonse ɔkpere ma sɔ ma Zamzumse. 21 Maɖe maturi ma mba ɔle fiɛ masi gbodzoo fiɛ makɔlɛ lɛ ma Anakse. Bosate ɔwɔra ma i ma Amonse katɔ̃ mma losa ma maɖi fiɛ mafɔ ma karɔ̃ masɛ iso. 22 Bosate ɔɔbara ngbɔ ame ɔtã Esau ɔkparɛ, mma losɛ i Seir, gɔ ɔwɔra ma Xorise ɔɖi i ma katɔ̃. Masa ma Xorise maɖi ne maɔsɛ i ma kasɛkɔ̃ ipɛ ɔwi wɔ matsɛrɛ nwagbe. 23 Ma Avitse ne, masɛ i simagɛ̃ kosoi ame ikɛlɛ ta Gaza. Ma Kaftorise ma lobɔrɛ i Kaftor karɔ̃ iso ɔba maawɔra ma Avitse fiɛ mafɔ ma karɔ̃ masɛ iso.)

Israel Mabi Ɔɖe Igara Sixon Iso

24 Mose sɔ: "Mita si miɣo ɔri miwara Arnon Kawɛlagbolomi kiniɔ. Minyɔ, loɔsu Sixon wɔ nɖe Amorise fiɛ ɔɖe Xesbon igara lopia i mi nrɔɔ̃ ame gu ɔ̃ karɔ̃. Mita kakpã i ɔ̃ iso, si mitsɛ karɔ̃ ifɔ. 25 Ita i nɔme ne loatsɛ itã sɔ maturi i nɖebi mɛ i kayiiso aanigã mi ku itiikpakpa. Mato maanɔ mi iso atɔ̃me fiɛ maati makpakpa ku ifɔ̃, mawe i ibo gu ibɛbɛrɛ ame ala mi ɔso."

26 Mme Mose losese makpabo lobɔrɛgu i Kedemot fafuĩ ame, sɔ makɛlɛ Sixon wɔ nɖe Xesbon igara kɔrɛ itã isobuɛ. Si maɣere wũ sɔ, 27 "Tã bo ɔri si boki i fɔ karɔ̃ ame bofe. Boaki i ɔvurã iso kere fiɛ boibafiriki boki i kubena iso ɣee kuɖearɔ̃ iso. 28 Rɔdɛ̃ aɖera wa boaɖe tã bo gu ndu mɛ boanɛ i wã kuso i sikãfudza ame. Tã bo boki bofe ala ngba kere. 29 Bara tã bo lɛ kumɛgɔ i Esau ɔkparɛ ma nsi i Seir gu ma Moabse ma nsi i Ar ɔbara matã bo - gbɔgbɔɔgbɔ bowara Yordan ɔwore bobo i karɔ̃ ga i Bosate bo Ɣaa to ɔtã bo ame." 30 Ɣɛɛ Sixon, Xesbon igara ɔsɛ̃ ɔ̃itã bo ɔri sɔ boki i ɔ̃ karɔ̃ iso bofe. Ala Bosate mi Ɣaa ɔɔbara Sixon siwarã sɔ siwe ɔnɔle fiɛ ɔ̃ ɔtu ɔsɛ̃ isɛɛ. Bosate ɔbara wũ ngbɔ si ɔsu wũ ɔpia i mi nrɔɔ̃ ame lɛ ɔ̃ɔbara kiniɔ.

31 Bosate ɔɣere me sɔ, "Nyɔ, ka nto losu Sixon gu ɔ̃ karɔ̃ lotã mi. Kiniɔ ka mitsɛ ikpɛ̃ si mifɔ ɔ̃ karɔ̃."

32 Ɔwi wɔ Sixon gu ɔ̃ makpakpɛ̃dze ɔɖuɖu ɔbɔrɛ maba maasarɛgu bo ne, bokpɛ̃ kakpã i Yaxaz.

33 Bosate bo Ɣaa, ɔsu Sixon ɔpia i bo nrɔɔ̃ ame, boɖue wũ, ne boɖue ɔ̃ mabibirɛrɛĩ gu ɔ̃ makpakpɛ̃dze ɔɖuɖu bosakanya. 34 Bokpɛ̃gu ɔ̃ simagɛ̃ ɔɖuɖu, bowɔra ma marɛrɛ̃ i marɔ̃go gu mabiɛtɛ pelepele ku ɔwi wɔmɔ. Boikuti gbanadze kuwɛ̃. 35 Ɣɛɛ mabɔi gu kakpãramɔɛã i simagɛ̃ ame ne, nwa bona bomɔɛ̃ ne bosore wã boruigu botã so. 36 Bosate bo Ɣaa ɔsu ma ɔɖuɖu ɔpia i bo nrɔɔ̃ ame. Ɔmagɛ̃ kuwɛ̃ iiwe ɔle ɔɖo bo, ita i Aroer i Arnon kawɛlagbolomi ame kuruɛ ikɛlɛ ɔmagɛ̃siare wɔ mpia i kagbolomi ndɛndɛ̃ isɛ iabo Gilead. 37 Ɣɛɛ lɛ kumɛgɔ i Bosate bo Ɣaa ɔɣɛ kanya ne, miibo ma Amonse karɔ̃ kukawɛ̃ ame ɣee miibo i karɔ̃ ga mpia i Yabok ɔwore sikpokpo isɛ ɣee simagɛ̃ dzɛ i abemi ame.