MOSE V 25

Mmara i Ɔturi Wɔ Loɣɛrɛ Ipɛ Iso

1 Mose ɔɣere Israel mabi sɔ: Si itɔ̃mekaɣɛ ɔba i maturi ndɛ̃ ne, masɛ atɔ̃mekaɣɛkɔ̃, si matɔ̃meɣɛdze aasiaita i itɔ̃me iso. Maatã nwɔ ɔkpɛ loya ibɛ iyɔ maɔtã nwɔ ɔkpɛ loiya ipɔ. 2 Si ikote sɔ maapɛ nwɔ loɖe ipɔ ne, tɔ̃meɣɛdze aatã ɔrɛ i karɔ̃ i ɔ̃ anɔ fiɛ maapɛ wũ ikpɛ nɛ lokotegu ɔ̃ iɣɛrɛ. 3 Ɣɛɛ ikote sɔ tɔ̃meɣɛdze iibatã mapɛ wũ iɖo ikpɛ sina. Si mapɛ wũ iɖo ngbɔ ne, iyɔ kato iaɖe sɔ abɔ wũ karɔ̃ i fɔ anɔ.

4 Daasu ira anyi nantsuĩrɛrɛ̃ kanya ku ɔwi wɔ ɔto ɔbara karabara i kamɔ iso.

Nnɛ i Ɔnyibirɛrɛĩ Aabara Ɔtã ɔ̃ Ɔnyibi Wɔ Lokpi Ɔre

5 Si manyibirɛrɛĩ si i kakɔi kawɛ̃ fiɛ ɔwɛ̃ ɔkpi fiɛ ɔ̃iɣe ɔbirɛrɛĩ ne, kpisere wɔmɔ si ɔdaayiri ɔrɛrɛ̃ mama wɔ loiɖe ɔ̃ ɔrã mɛrɛ̃ iyoturi. Ɔ̃ ɔrã ɔnyibi aasu wũ ɔyiri fiɛ ɔ̃abara ibiara ɔtã ɔrɔ̃go lɛ nwɔ loɔkpi awe. 6 Ɔbibirɛrɛĩ ɖeakatɔ̃ wɔ ɔrɔ̃go aaɣe ne, maasia wũ ɔ̃ ɔnyibi wɔ lokpi iyere iyɔ ɔ̃ iyere iibawɔ i Israel.

7 Ɣɛɛ, si ɔrɛrɛ̃ sɔ ɔ̃ito ɔbie sɔ ɔyiri ɔ̃ ɔnyibi ɔre ne, ɔrɔ̃go aakɛlɛ makpakpa kɔrɛ i ɔmagɛ̃ kayogodɔ̃ fiɛ ɔ̃aɣɛ sɔ, "Wũ ɔrã ɔnyibi iito ɔbie sɔ ɔ̃ ɔnyibi iyere si iwe i Israel. Wũ ɔrã ɔnyibi ɔsɛ̃ sɔ ɔ̃ito ɔbara nnɛ lokote ɔre ɔtã me." 8 Iyɔ ɔ̃ ɔmagɛ̃ makpakpa aakpere ɔrɛrɛ̃ mabɔ maɖegu wũ ika. Si ɔto iɣɛ sɔ, "Loito lobie sɔ loayiri wũ" ne, 9 ɔ̃ ɔnyibi kpisere aasɛ ɔtu wũ i makpakpa anɔmi ame. Kpisere aaɖi ɔrɛrɛ̃ kadokota kawɛ̃, ɔtua sinyatu ɔfere i ɔ̃ katɔ̃ ɔɣɛ sɔ, "Nnɛgbe masɛ mabara ɔrɛrɛ̃ wɔ loibatã sɔ ɔ̃ ɔnyibi ɔkparɛ si ɔwe ne." 10 Maakpere ɔrɛrɛ̃ wɔmɔ ɔkparɛ i Israel sɔ Ɔrɛrɛ̃ wɔ maɖi Kadokota i Kukpa Iyomaturi.

Mmara Mama

11 Ne Mose ɔɣɛ sɔ: Si marɛrɛ̃ inyɔ to makpɛ̃ fiɛ ɔrɛrɛ̃ ɔwɛ̃ ɔ̃ ɔre ɔba ɔ̃amɔɛ̃ ɔ̃ ɔrã ɔɖi i nwɔ nto ɔkpɛ̃gu wũ kɔrɛ fiɛ ɔrɔ̃go ɔmɔɛ̃ nwɔ nto ɔkpɛ̃gu ɔ̃ ɔrã sirɛrɛ̃ ne, 12 mitu ɔrɔ̃go kɔrɔ̃. Midaanyɔ wũ nnya ɖuɖuuɖu.

Ɖe Ɔnukuare i Kuɣaiɖe Ame

13 Ne Mose ɔsɔgu ɔɣɛ sɔ: Daasu ata akerera anyɔ wa lokpaki apia i fɔ akpo ame, si iwɛ̃ si iwe ɔrɔrã iɖo inyɔare. 14 Daawe ata akerera anyɔ wa lokpaki i fɔ iyo, si iwɛ̃ si imɔ fiɛ inyɔare si ise tɛmi. 15 Ikote sɔ aawe ata akerera wa lokate fiɛ aɖe ɔnukuare akerera gu nwa nsɛ masusu ala ara, si aasɛ ngbã idzoro i karɔ̃ ga Bosate mi Ɣaa to ɔ̃atã mi iso. 16 Ala Bosate mi Ɣaa ɔtsiri ɔrere wɔ nsɛ ɔbara ara wagbe fiɛ ɔsɛ ɔɖe maturi amumu ɔso.

Miwɔra Ma Amalekse

17 Mose ɔɣɛ sɔ: Minyigi nnɛ i ma Amalekse ɔbara mi ku ɔwi wɔ mibɔrɛ i Egipte karɔ̃ iso misɛ mito miba. 18 Ɔwi wɔ so ɔɔtu mi iɔɖa mi ana ne, masarɛgu mi i irisɛ ame, ne maɖue mma ɔɖuɖu logbikama. Ma Amalekse iiwe Ɣaa kunigã kukuwɛ̃. 19 Si Bosate mi Ɣaa ɔɔtã mi iwarã i mi matsirise ɔɖuɖu ma loki malɔ mi kɔrɛ, i karɔ̃ ga ɔto ɔsu ɔtã mi miasu lɛ mi kaɖekɔ̃ ne, miawɔra ma Amalekse pelepele si kuwɛ̃ iisibanyigi ma ɔnya i kayiiso ɔɖuɖu. Midaaɣara nnɛgbe!