1 Mose ɔɣere Israel mabi sɔ: Si iba sɔ ɔrɛrɛ̃ ɔyiri ɔrɔ̃go fiɛ ɔwi kama ɔnya ira nɛ ɔ̃ito ɔɖuɛ i ɔrɔ̃go iso ne, ɔrɛrɛ̃ sɛ ɔtsɛrɛ isɛ̃so ɔko ɔpia i ɔrɔ̃go nrɔɔ̃ ame fiɛ ɔrɛrɛ̃ aaɖi wũ ɔbɔrɛgu i ɔ̃ iyo. 2 Si ɔrɔ̃go ɔrui i ɔrɛrɛ̃ wɔmɔ iyo kama fiɛ ɔsɛ ɔ̃ayiri ɔrɛrɛ̃ mama 3 fiɛ ɔrɛrɛ̃ nyɔare wɔgbe ana iisito ɔɖuɛ wũ ne, ɔsɛ ɔtsɛrɛ isɛ̃so ɔko ɔpia i ɔrɔ̃go nrɔɔ̃ ame. Si ɔrɛrɛ̃ ɔɖi wũ ɔri ɔbɔrɛgu i ɔ̃ iyo ɣee ɔrɛrɛ̃ ɔkpi ne, 4 iyɔ ɔ̃ ɔrã ɖeakatɔ̃ wɔ losɛ̃ wũ siina ɔri ɔyiri wũ ana gɔ maɔpukutura ɔrɔ̃go. Ito iaɖe inyanyara i Bosate anɔ. Midaabara ikpi nyanyariã i karɔ̃ ga i Bosate mi Ɣaa to ɔ̃atã mi lɛ kaɖekɔ̃ ame.

5 Mose ɔɣere Israel mabi sɔ: Si ɔrɛrɛ̃ ɔyiri ɔrɔ̃go i siɣɛtɛso ame ne, ɔrɛrɛ̃ iibasɛ kakpã ame ɣee maibatã wũ karabara kukawɛ̃. Ikote sɔ ɔ̃awe i iyo ikɔ iwɛ̃ wɔlɔlɔ i iwarã ame, si ɔpia ɔ̃ ɔre wɔ ɔ̃ɔyiri isoɣɔ.

6 Si anyɛ ira atã ɔturi ɔrere ne, daafɔ ɔ̃ kukɔtɛ ata anyɔ - idaaɖe kato ikɔtɛta kɔraa - apia lɛ ayaikama. Ala ito iase lɛ amɔɛ̃ nnɛ ɔ̃abara ɔ̃aɖe asu lɛ ayaikama.

7 Si ɔrere ɔmɔɛ̃ ɔnyii Israelse sɔ gbɔgbɔɔgbɔ matã kuso i ɔ̃ iti, ne ɔbara wũ lɛ ɔsande ɣee ɔrɔdɛ̃ wũ ne, maaɖue turiyudze wɔmɔ. Ikote sɔ miaɖi iranyanyariã i mi ndɛ̃.

8 Ise ɔnyɛrɛtɛa iso ne, nyɔ sɔ abara lɛ kumɛgɔ i masɔrɛdze, mma nɖe ma Levise sɛ maɣere-ɔ pɛpɛɛpɛ. Ikote sɔ miabara i mmara mɛ lotã ma iso kukaakɔ. 9 Minyigi nnɛ i Bosate mi Ɣaa ɔbara Miriam i ɔri, ɔwi wɔ miɔbɔrɛ i Egipte karɔ̃ iso kama mito miba.

10 Si anyɛ ira igbã irere atã fɔ ɔnyii ne, daabo i ɔ̃ iyo kame asɛ afɔ nnɛ ɔsu ɔto ɔɣedza so i kama. 11 Tuĩ ya i inyamɔ, si atã nwɔ ato anyɛ ira atã si ɔsu nnɛ ɔto ɔɣedza so i kama, ɔbɔ-ɔ ɔ̃ mɔmɔ.

12 Si ɔrɛrɛ̃ wɔmɔ ɖe wɛrɛba ne, daatã nnɛ ɔɣedza so i kama si ise i fɔ kɔrɛ arɛ kaɖe si kasɛ̃. 13 Kpeseragu arapia tã wũ ku kutsuɛ, si ɔ̃awo ɔsu ɔfu so ɔrɛ. Iyɔ ɔto ɔ̃afere-ɔ kusɛkusɛ fiɛ maanyɔ ne lɛ sibɔlɔlɔ ira i Bosate mi Ɣaa anɔ.

14 Daaɖe ɔpaase wɔ nɖe wɛrɛba gu ɣiãni amumu, fɔ ɔnyii Israelse ɔɖe oo ɣee ɔfɔ wɔ nsi i mi ɔmagɛ̃ ɔwɛ̃ ame ɔɖe. 15 Tã wũ ɔ̃ ikpɛnɛ biara kuso fiɛ kuɣɛ̃ aabo iyo alasɔ wɛrɛba ɔɖe fiɛ ne iso ɔto ɔsiaiti. Si iiɖe ngbɔ ne, ɔto ɔ̃abiɛ ɔkpere Bosate ɔta ɔya i fɔ iso fiɛ ito iaɖe iɣɛrɛ nɛ loaɖe ikpi itã-ɔ.

16 Maibaɖue ɔse i ikpi nɛ i ɔ̃ ɔbi ɔbara iti fiɛ maibaɖue ɔbi i ikpi nɛ i ɔ̃ ɔse ɔbara iti. Bowũ ɔbiara aakpi i ikpi nɛ ɔ̃ mɔmɔ ɔbara iti.

17 Daakpa anɔ afu i ɔfɔ ɣee ɔsekpibi itɔ̃me nɛ loya iso. Ɣee daafɔ kpisere ɔkati lɛ ayaikama. 18 Minyigi sɔ miɖe masande i Egipte karɔ̃ iso fiɛ Bosate mi Ɣaa ɔɖi mi ɔbɔrɛgu i mmɔ. Ne ɔso nto loɣere mi sɔ mibara nnɛgbe ne.

19 Si ato asasa fɔ ɔraɖui i kakpɛkɔ̃ ame fiɛ aɣara ɔmɔbu ne, daasikpese asɛ sɔ aasu wũ. Nyua sɛ mafɔ gu masekpibi gu makpisere, si Bosate mi Ɣaa aafere-ɔ kusɛkusɛ i fɔ nrɔɔ̃ karabara ɔɖuɖu iso. 20 Si misɔrɛ̃ mi nnɔĩ abi i adziri iso ne, midaasikpese miasiai sɔ miasɔrɛ̃ nwa lokuti. Nyua nwa lokuti si aɖe mafɔ gu masekpibi gu makpisere ɔkpɛ. 21 Si ɔɔsasa ara i fɔ wainkakpɛkɔ̃ ame ne, daasisɛ ɔkpɛ nyɔare sɔ aasasa. Nyua nwa lokuti si aɖe mafɔ gu masekpibi gu makpisere are. 22 Midaaɣara kuiyikuiyi sɔ miɔɖe masande i Egipte karɔ̃ iso minya. Nnɛgbe ɔso nto lotã mi mmara mɛgbe ne.