1 Mose ɔɣere Israel mabi sɔ: Ɔrɛrɛ̃ wɔ magɔ̃ iki itãbi ibiɛ ɣee matu sirɛrɛ̃ maɖi iso kuwɛ̃ daabo i Bosate iturikuri ame.

2 Ɔsɔrɔ̃bi kuwɛ̃ ɣee ɔ̃ ɔkparɛ, ta i ɔɣekparɛ weova ame na ɔri mabo i Bosate maturi ame.

3 Ma Amonse ɣee ma Moabse ɣee ma ɔkparɛ kuwɛ̃ ikɛlɛ ta ɔɣekparɛ weova ame, na ɔri mabo i Bosate iturikuri ame. 4 Gɔ mibɔrɛ i Egipte karɔ̃ iso misɛ mito miba ne, masɛ̃ maitã mi ndu gu aɖera. Ne kama masɛ maasu Balaam wɔ nɖe Beor ɔbibirɛrɛĩ ɔbɔrɛ i Petor i Aram Naxaraim sɔ ɔgbarĩ mi. 5 Ɣɛɛ Bosate mi Ɣaa iikã Balaam atsue ɣɛɛ ɔfirikira sigbarĩ sikpese kusɛkusɛ kutã mi, alasɔ Bosate mi Ɣaa sɛ ɔɖuɛ mi ɔso. 6 Ayi kumɛgɔ mipia ngbã ne, midaabaragu ma kulaaipia kanyakawɛ̃ ndamu.

7 Midaatsiri ma Edomse alasɔ mi manyii maɖe. Ana ne midaatsiri ma Egiptese alasɔ miɔwe i ma karɔ̃ iso lɛ mafɔ minya. 8 Ita i ma Edomse gu ma Egiptese ɔɣekparɛ tɛare ikɛlɛ mabi ba ɔri maawe i Bosate iturikuri ame.

9 Si mibara kasɛkɔ̃ i kakpã ame i mi matsirise iso ne, mirera so kama i irabiara nɛ loisekele kɔrɛ. 10 Si ɔrɛrɛ̃ ɔrere iisekele alasɔ ɔɖi kukuritu i sirɛ ame ku kasɛ ne, ikote sɔ ɔ̃abɔrɛ i kasɛkɔ̃ ɔkɛlɛ kuaruɛ ɔ̃awe i mmɔ. 11 Ɣɛɛ si kato ikɛlɛ kutsuɛ isɛ ne ɔpie ndu, iyɔ ɔwi wɔ i kuɣɛ̃ ɔɔbo iyo ne si ɔkpese ɔba i kasɛkɔ̃ ame.

12 Miwe kakɔi i kasɛkɔ̃ kuaruɛ ngbegɔ miala miɔsɛ ɔdziriso. 13 I mi kakpã ara wa miala ame ne, mila ira kumɛgɔ miasu mikuri iwo misɛ ɔdziriso mipia fiɛ miasu mikpa sise mifu. 14 Mibara kasɛkɔ̃ sekelee alasɔ Bosate mi Ɣaa piagu mi i kasɛkɔ̃ fiɛ ɔtɛ̃ ɔkpã ɔpia mi fiɛ ɔ̃atã miɖe mi matsirise iso. Ne ɔso ikote sɔ kasɛkɔ̃ aasekele, sɔ ɔ̃ibanya inyanyara kuiwɛ̃ fiɛ ɔ̃are mi kama.

15 Si ɔsande ɔrere ɔrui ɔtere i ɔ̃ sate kɔrɛ ɔba ɔ̃atarĩgu-ɔ ne, daakpesera wũ atã ɔ̃ sate. 16 Mifɔ wũ si ɔwe i mi ndɛ̃ i kakɔi ga ɔsɛ ɔɖuɛ gu i ɔmagɛ̃ wɔ ɔsɛ ɔɖi. Midaawedza wũ inyɛ.

17 Israelse ɔrɛrɛ̃ kuwɛ̃ ɣee ɔrɔ̃go kuwɛ̃ na ɔri ɔɖe kuɣɔka ɔturi wɔ nto ɔbara asɔrɔ̃ra. 18 Iikote sɔ miasu sikã dzɛ kuɣɔka ɔrɔ̃go wɔ nto ɔsiai marɛrɛ̃ ɣee kuɣɔka ɔrɛrɛ̃ wɔ nto ɔsiai marɔ̃go ɔbara, mitã i Bosate mi Ɣaa iyo lɛ ɔ̃ ndamu mɛ ɔkã kuso. Ala Bosate mi Ɣaa ɔtsiri ma inyɔ ɔɖuɖu.

19 Si anyɛ sikã ɣee araɖea ɣee ira irere atã fɔ ɔnyii ne, daafɔ kusia kukuwɛ̃ asia i ne iso. 20 Aawo kusia ɔfɔ ɔsia i ne iso, si anyɛ ne atã ɔfɔ ɣɛɛ iiɖe i nnɛ anyɛ atã fɔ ɔnyii Israelse iso. Si mibara misia i mmara mɛgbe iso ne Bosate mi Ɣaa to ɔ̃afere mi kusɛkusɛ i irabiara nɛ miabara ku nrɔɔ̃ iso i karɔ̃ ga mito mibo miafɔ iso.

21 Si akã ndamu atã Bosate fɔ Ɣaa ne, daasɛ̃ sɔ aibabara i fɔ kaɣɛkasɛ iso. Ala Bosate mi Ɣaa to ɔ̃akarɛ ne, iyɔ ɔɔbara iɣɛrɛ nɛ nɖe ikpi. 22 Ɣɛɛ si aikã ndamu atã Bosate ne aibara ikpi. 23 Ɣɛɛ si abusi kanya aɣɛ irere ne, ikote sɔ anyɔ sɔ abara ne. Ala akã ndamu ku fɔ mɔmɔ kuɖuɛ atã Bosate fɔ Ɣaa, ɔso nyɔ sɔ abara i ne iso.

24 Si abo i fɔ ɔnyii wainkakpɛkɔ̃ ame ne, aawo adziribi ɔɖe kumɛgɔ aɖuɛ ɣɛɛ ɔri na asu kuawɛ̃ apia i kasɛsɛ ame. 25 Si asɛ ato afe i ɔrere kamɔwĩ ame ne, aawo amɔbi ɔbara ku kɔrɔ̃ ɣɛɛ ana ɔri asu kanyɔĩ arui kamɔ.