1 Mose ɔkɛlɛgu i katɔ̃ ɔɣere Israel mabi sɔ: Si kusɛkusɛ gu sigbarĩ ara ɔɖuɖu wa loɔɣere mi ɔba i mi iso fiɛ misu wã mipia i mi situ ame i kakɔi biara ga i Bosate mi Ɣaa aasamera mi ɔpia i nɖebi ame ne, 2 ana si mi gu mi mabi ɔkpese miba Bosate mi Ɣaa kɔrɛ fiɛ miwarɛ wũ ku mi ɔtu ɔɖuɖu ku mi ɔkala ɔɖuɖu, i irabiara nɛ loɣere mi nɔme, sɔ mibara kanya ne, 3 iyɔ Bosate mi Ɣaa to ɔ̃asa mi kanya ana, ɔbɔrɛgu nɖebi ɔɖuɖu mɛ ɔsamera mi ɔpia ame. Ne ɔ̃anyɔ mi nnya fiɛ ɔ̃asɛra mi isaruɛ. 4 Atoa si masamera mi mapia i nrɔ̃ dzoroa mama i karɔ̃ iso ne, Bosate mi Ɣaa to ɔ̃asa mi kanya ɔbɔrɛgu i mmɔ ɔkpesera mi ɔbɔ. 5 Bosate to ɔ̃akɔ mi ɔbɔ i mi mawa karɔ̃ iso fiɛ miafɔ kã. Ɔto ɔ̃atã mina isaruɛ miɖo fiɛ miasi miɖo kumɛgɔ mi mawa ɔse. 6 Bosate mi Ɣaa to ɔ̃afirikira mi gu mi sikparɛ situ fiɛ miaɖuɛ wũ ku mi situ ɔɖuɖu gu sikala ɔɖuɖu fiɛ miasɛ ngbã. 7 Bosate mi Ɣaa to ɔ̃abɔ sigbarĩ ɔɖuɖu dzɛgbe i mi matsirise ma lotsiri mi fiɛ mato matã miweinyɛ iso. 8 Mito miawarɛ Bosate fiɛ miasiai ɔ̃ mmara ɔɖuɖu mɛ nto lotã mi nɔme ana. 9 Iyɔ Bosate mi Ɣaa to ɔ̃atã mina isaruɛ miɖo i mi nrɔɔ̃ karabara ɔɖuɖu ame. Mito miana isaruɛ miɣe mabi masi fiɛ miana manantsuĩ gu masɛrɛ gbodzoo fiɛ miana araɖea gbodzoo i karɔ̃ iso. Bosate to ɔ̃anagu mi isoɣɔ ana fiɛ ɔto ɔ̃atã mi ara gbodzoo lɛ kumɛgɔ ɔna isoɣɔ ku mi mawa awe. 10 Bosate to ɔ̃ana isoɣɔ i mi iso si miafiriki misiai Bosate mi Ɣaa ku mi situ ɔɖuɖu ku mi sikala ɔɖuɖu fiɛ miawarɛ Bosate miasiai ɔ̃ mmara gu asɛ̃ra ɔɖuɖu wa matsɛrɛ mapia i Mmara Ɔko wɔgbe ame.

11 Mose ɔɣere maturi sɔ: Nnɛ loto loɣere mi nɔme sɔ mibara na ɔle kaɖu, ku karɔ̃inɔ ɣee mina ɔle kaɖu ku me iso ibara. 12 Mina i kato fiɛ miakarɛ sɔ, "Nna loaya ɔsɛ kato ɔ̃afɔ me fiɛ ɔ̃apɛ me imomo ɔtã bo si boawarɛ me?" 13 Ngbɔ ame mina i ɔpo kama fiɛ miakarɛ sɔ, "Nna loawara ɔpo ɔ̃afɔ me fiɛ ɔ̃apɛ me imomo ɔtã bo, si boawarɛ me?" 14 Oɣoo, itɔ̃me se i mi kɔrɛ i ngbe, ipia i mi kanya gu situ ame sɔ si miawarɛ me.

15 Minyɔ, nɔme nto losu ngbã gu isaruɛ, kukpi gu iwɔ losɛ i mi anɔmi. 16 Ala loɔɣere mi sɔ miɖuɛ Bosate mi Ɣaa ɔso. Si misɛ i Bosate mi Ɣaa siri iso si mimɔɛ̃ ɔ̃ mmaraisi, asɛ̃ra gu mmara mila. Iyɔ mito miasɛ ngbã miɣe misi fiɛ Bosate mi Ɣaa to ɔ̃afere mi kusɛkusɛ, i karɔ̃ ga mito miabo mifɔ iso.

17 Ɣɛɛ si mipɛ mi situ mifirikira fiɛ miiwarɛ Bosate fiɛ misɛ̃ atsueikã wũ fiɛ makpadzɛ̃ mi, mibɔ ati karɔ̃ misumu maɣaa mama ne, 18 nto loɣere mi nɔme sɔ, gbaã ne mito miawɔ. Miibasɛ ngbã idzoro i karɔ̃ ga mito miawara Yordan ɔwore mibo miafɔ iso.

19 Iyi nɛgbe ne loto lokpere kato gu karɔ̃ si maɖe aɖansiɛ i mi iso, sɔ loɔsu ara wagbe losɛ mi i anɔ ngbã gu kukpi, kusɛkusɛ gu sigbarĩ. Miɖi ngbã kiniɔ, si mi gu mi mabi aasɛ ngbã 20 si miɖuɛ Bosate mi Ɣaa. Mikã ɔ̃ silɔ atsue fiɛ miamɔɛ̃ wũ mila teteree. Ala Bosate nɖe mi ngbã fiɛ ɔ̃atã mi akɔ gbodzoo i karɔ̃ ga ɔkã ndamu sɔ ɔ̃atã mi mawa, Abraham gu Isak gu Yakob iso ɔso.