1 Nwagbe nɖe ndamu atɔ̃menyia wa i Bosate ɔɣere Mose sɔ ɔbaragu Israel mabi i Moab karɔ̃ iso. Ndamu mɛgbe i Bosate ɔsu ɔbua i mmɛ ɔbaragu ma i Xoreb Kube kɔrɛ.

2 Mose ɔkpere Israel kaɖe ɔɖuɖu fiɛ ɔɣere ma sɔ:

Minya ku mi anɔmi nnɛ i Bosate ɔbara Egipte Igarakpakpa gu ɔ̃ makpakpa ɔɖuɖu gu ɔ̃ karɔ̃ ɔɖuɖu. 3 Mi mɔmɔ minya ku mi anɔmi amɔrɛã siare gu awawã akparĩ wamɔ gu ara siare wa mba ɣii gbaã. 4 Ɣɛɛ ipɛ i nɔme ne Bosate iitã mi adzuni wa nsɛ anɔkarɔ̃ ɣee anɔmi wa nsɛ anya ara ɣee atsue wa nsɛ anɔ ara. 5 Akɔ sina wa ame lokɔ mi lokigu i fafuĩ ame ne, arapia iikpi mi iso ɣee ndokota iiro i mi ngba. 6 Miiɖe boɖoboɖo kuwɛ̃ fiɛ miinɛ wain kuwɛ̃ ɣee ndã mama mɛ mabura. Lobara nnɛgbe si miatsue sɔ Mme nɖe Bosate mi Ɣaa.

7 Gɔ mibo i ngbe ne, Sixon wɔ nɖe Xesbon igara gu Og wɔ nɖe Basan igara ɔbɔrɛ maba maakpɛ̃ kakpã ku bo ɣɛɛ boɖe ma iso. 8 Bofɔ ma karɔ̃ fiɛ boɣɛ kã botã Ruben kamele, Gad kamele gu Manase kamele kasɛ lɛ ma kaɖekɔ̃.

9 Misiai si misɛ i ndamu mɛgbe atɔ̃menyia iso kukaakɔ, si miana katɔ̃ isɛ i irabiara nɛ miabara ame. 10 Nɔme mi ɔɖuɖu ɣɛ i Bosate mi Ɣaa anɔ, ku mi matɔ̃ɖedze gu maturi siare, mi makpakpa gu karabaramatɔ̃ɖedze gu Israel marɛrɛ̃ mama. 11 Misakanya ku mi mare gu mabiɛtɛ gu mafɔ ma nsi i mi nsɛkɔ̃ fiɛ masɛ makɛ ndɔrɛ̃, masore ndu matã mi. 12 Miɣɛ i ngbe nɔme sɔ miabara kanyakawɛ̃ gu ndamu ku Bosate mi Ɣaa, ndamu mɛ Bosate to ɔbaragu mi nɔme fiɛ ɔto ɔnyi me ku ndamu ikã. 13 Ɔto ɔ̃asiaita i mi iso nɔme lɛ ɔ̃ maturi fiɛ ɔ̃aɖe mi Ɣaa, lɛ kumɛgɔ ɔɣɛ ɔsɛ ɔtã mi. Ana ne lɛ ɔkã ndamu ɔtã mi mawa, Abraham gu Isak gu Yakob. 14 Iiɖe mi ɔnɔwɛ̃ kere nto lobaragu atɔ̃menyia wagbe ku ne ndamu. 15 Mi ma nɣɛ i ngbe ku bo nɔme i Bosate bo Ɣaa anɔ ɣɛɛ ku mma nna i ngbe nɔme ana.

16 Mi mɔmɔ miɣe kumɛgɔ bowe i Egipte karɔ̃ iso gu kumɛgɔ bosɛ boki i nrɔ̃ mɛ i ɔri iso ame fiɛ boba i ngbe. 17 Minya anyanyara kumiamia gu arapɔa wa masu adziri gu ata gu sikãfudza gu sikãrɛtɛa mabara ala i ma ndɛ̃. 18 Minyɔ kukaakɔ sɔ ɔrɛrɛ̃ ɣee ɔrɔ̃go ɣee kalɛ ɣee kamele i mi ndɛ̃ i ngbe nɔme, kuwɛ̃ ɔtu daafiriki i Bosate bo Ɣaa kama. Si ɔsɛ ɔ̃asumu nɖebi mɛmɔ aɣɔ. Minyɔ sɔ kuwɛ̃ daase lɛ ɔɖu wɔ loabɔ kabiɛtɛ gamɔ igbã i mi ndɛ̃.

19 Si ɔturi wɔmɔ igbã ɔnɔ ndamu mɛgbe atɔ̃me ne, ɔsɛ ɔkpere kusɛkusɛ ɔfere so. Ne ɔsɛ ɔbu sɔ, "Nto loawe i isobuɛ ame, atoasɔ lokɛlɛ i katɔ̃ nsɛ i wũ mɔmɔ ɔri iso." Nnɛgbe to iabɔ kukpakpi i karɔ̃ ku ndu gu karɔ̃ korea iso. 20 Bosate iibabie sɔ ɔ̃asu ɔtsɛ ɔturi wɔmɔ kuiyikuiyi. Bosate to ɔ̃anagu nwɔmɔ sikpã teteree, lɛ kumɛgɔ ɔtɔ ɔnyagɛmi ɔɣa fiɛ ɔ̃atsuedza wũ ɔwɔ. Sigbarĩ ɔɖuɖu dzɛ matsɛrɛ mapia i ɔko wɔgbe ame to siaba i ɔ̃ iso. Bosate to ɔ̃awɔra ɔrɛrɛ̃ wɔmɔ iyere ɔɖi i kayiiso. 21 Bosate to ɔ̃aɖi wũ ɔbɔrɛgu i kumele ɔɖuɖu i Israel ame, ɔsu kukpakpi ɔpɛ nwɔmɔ. Iaba i ɔ̃ iso, i ndamu sigbarĩ ɔɖuɖu dzɛ matsɛrɛ mapia i Mmara Ɔko wɔgbe ame kanya.

22 Mi mabi ma loaba i mi kama siɣekparɛ gu mafɔ ma loabɔrɛ i nrɔ̃ dzoroa iso, maba i ɔwi kama to maanya kukpakpi gu sinyɛ dzɛ i Bosate ɔtã aba i karɔ̃ iso. 23 Karɔ̃ ɔɖuɖu aakpese ɔtɔwiri lɛ mma gu kuɖu nto atsue. Maibapia kuira, kuira iibare, sikua kusiwɛ̃ iibawo ɔre i kã iso. Ito iase lɛ Sodom gu Gomora gu Adma gu Zeboim iwɔra, mma i Bosate ɔkpasera i sikpã teterea ame. 24 Nɖebi ɔɖuɖu to miakarɛ sɔ, "Be ɔso i Bosate ɔbara karɔ̃ gagbe kumɛɔ? Be ɔso ɔna sikpã teterea ngbɔ?"

25 Ne mmuai to miaɖe sɔ, "Ala maturi magbe ɔsɛ̃ Bosate, ma mawa Ɣaa ndamu ɔso. Ndamu mɛ ɔbaragu ma, ku ɔwi wɔ ɔɖi ma ɔbɔrɛgu i Egipte karɔ̃ iso. 26 Mafiriki masumu aɣɔ mama fiɛ mabɔ ati karɔ̃ matã wã. Maɖe aɣɔ wa maisumu manya fiɛ Bosate iiɖi wã ɔtã ɔ̃ maturi. 27 Ne ɔso i Bosate ɔna sikpã teterea i karɔ̃ gagbe iso. Ne ɔkpadzɛ̃ sigbarĩ ɔɖuɖu dzɛ matsɛrɛ mapia i ɔko wɔgbe ame ɔfere i kã iso. 28 Bosate ɔna sikpã gbaã fiɛ i ɔ̃ sikpã teterea ame ne, ɔrui maturi ɔɖi i ma karɔ̃ iso. Ne ɔfuĩdza ma ɔpia i karɔ̃ mama iso, lɛ kumɛgɔ ise kiniɔ."

29 Ara wa lowɛrɛ ɖe Bosate bo Ɣaa are. Ɣɛɛ ara wa maɖi mate ɖe bo gu bo mabi are ɔwi daaro. Ise sɔ si boasiai mmara mɛgbe atɔ̃me ɔɖuɖu ɔwi biara.