1 Mose ɔɣere Israel mabi sɔ: Si mita kakpã i mi matsirise iso fiɛ minya ma apɔngɔ gu kubore gu makpakpɛ̃dze gbodzoo fiɛ masi maɖo mi mare ne, midaanigã ma. Ala Bosate mi Ɣaa wɔ loɖi mi ɔbɔrɛgu i Egipte karɔ̃ iso to ɔ̃awegu mi ɔso. 2 Si ka mito mikɛlɛ kakpã ame ne, sɔrɛdze to ɔ̃aba katɔ̃ ɔɖe makpakpɛ̃dze ikuri ika. 3 Ɔto ɔ̃aɣɛ sɔ, "Israel kaɖe minɔ, nɔme misɛ kakpã i mi matsirise iso. Midaanigã, ɔtu daabiɛ mi, midaati mikpakpa ɣee midaatã sitsue si sibɔrɛ mi i ma anɔ. 4 Ala Bosate mi Ɣaa nɖe nwɔ nsɛ ɔsɛgu mi, ɔsɛ ɔkpɛ̃gu mi matsirise ɔtã mi fiɛ miaɖeiso."

5 Iyɔ matɔ̃ɖedze to maakarɛ makpakpɛ̃dze ikuri sɔ, "Ɔwɛ̃ pia i mi ndɛ̃ gɔ ɔtsue iyo kiniɔ kere fiɛ ɔ̃isekelera ne? Mitã ɔnyiiɔ si ɔkɛlɛ iyo. Si iiɖe ngbɔ si ɔkpi i kakpã ame ne, ɔturi mama ka loasekelera ɔ̃ iyo. 6 Ɔwɛ̃ ɔkpɛ̃ wainkakpɛkɔ̃ kiniɔ kere fiɛ ɔ̃itsɛ iɖe? Mitã ɔnyiiɔ si ɔkɛlɛ iyo, ɔto ɔ̃awo ɔkpi i kakpã ame iyɔ ɔturi mama ka loaɖe ne. 7 Ɔwɛ̃ pia i mi ndɛ̃ nwɔ loɔɣiɣiɛ kuyiri ku ɔrɔ̃go ɣɛɛ ɔ̃iyiri wũ? Mitã ɔnyiiɔ si ɔkɛlɛ iyo, ɔto ɔ̃awo ɔkpi i kakpã ame iyɔ ɔturi mama ka loayiri ɔrɔ̃go wɔmɔ." 8 Iyɔ matɔ̃ɖedze to maaɣɛ mabua sɔ, "Ɔrɛrɛ̃ ɔwɛ̃ pia ngbe gɔ ɔto ɔnigã ɣee ɔtu to ɔbiɛ wũ? Mitã ɔnyiiɔ si ɔkɛlɛ iyo, si ɔ̃ibabiɛ maturi tsɔra situ ana." 9 Si matɔ̃ɖedze ɔɔro ika ɔɖe makpakpɛ̃dze ne, mato maaɖi kakpãmatɔ̃ɖedze matã ikuri biara.

10 Si misɛ mito miata mibo i ɔmagɛ̃siare iso ne, mitã maturi mamɔ ɔri wɔ iso miabara isobuɛ. 11 Si mafɔ isobuɛ ɔri fiɛ mabusi ma kuyogodɔ̃ ne, maturi ma ɔɖuɖu i mmɔ to maakpese mi masande fiɛ maabara ɔɣiɛ karabara matã mi. 12 Si masɛ̃ maibaragu mi isobuɛ fiɛ makpɛ̃gu mi kakpã ne, mitɛ̃ ɔmagɛ̃siare wɔmɔ mipia. 13 Iyɔ si Bosate mi Ɣaa ɔsu wũ ɔpia i mi nrɔɔ̃ ame ne, mipɛ ipɛmi si miɖue marɛrɛ̃ ɔɖuɖu i kame. 14 Ɣɛɛ marɔ̃go, mabi, iyomabɔi gu irabiara i ɔmagɛ̃siare ame ne, misu wã lɛ kakpãramɔɛã mitã so. Ka miawo kakpãramɔɛã wa i Bosate mi Ɣaa ɔtã mi ɔbɔrɛgu i matsirise ame iso karabara ɔbara. 15 Kumɛgɔgbe miabara simagɛ̃siare ɔɖuɖu dzɛ lodzorogu mi, ndzɛ loiɖe simagɛ̃siare i nɖebi mɛ i mi kɔrɛ.

16 Ɣɛɛ simagɛ̃siare dzɛ mpia i karɔ̃ ga i Bosate mi Ɣaa to ɔ̃atã mi lɛ kaɖekɔ̃ ne, midaakuti kuira nɛ nsɛ iwarã sɔ iwe ngbã. 17 Miwɔra maturi ɔɖuɖu pelepele - ma Xitise, ma Xivise, ma Amorise, ma Kanaanse, ma Perizise gu ma Yebuse lɛ kumɛgɔ i Bosate mi Ɣaa ɔɣere mi. 18 Si iiɖe ngbɔ ne, mato maate mi sɔ misore anyanyara wa masɛ mabara i ma aɣɔ kasumu ame. Iyɔ mito miabara ikpi mita miya i Bosate mi Ɣaa iso.

19 Si mitɛ̃ ɔmagɛ̃siare mipia ɔwi ɔdzoro, ne mito mikpɛ̃gu wũ si mimɔɛ̃ wũ ne, midaaɖaɛ aɖedziri i ɔ̃ ame mipɛyu ku kaɣɛ miwɔra wã. Ala miawo wã adziribi ɔɖe. Midaapɛ wã mifere i karɔ̃. Adziri wa i karɔ̃ iso iiɖe maturi fiɛ miatɛ̃ wã mipia. 20 Ɣɛɛ miawo adziri mama wa miɣe sɔ aiɖe aɖedziri ɔɖaɛ ɔpɛyu fiɛ miasu wã mitsue akpo akuri, miki milɔ ɔmagɛ̃siare wɔ nto ɔkpɛ̃gu mi kakpã, gbɔgbɔɔgbɔ miaɖe wũ iso.