MOSE V 27

Matsɛrɛ Bosate Mmara Masia i Ata Iso

1 Mose gu Israel makpakpa ɔɣere maturi sɔ, "Mimɔɛ̃ mmara ɔɖuɖu mɛ nto lotã mi nɔme mila. 2 Si miɔwara Yordan ɔwore mibo i karɔ̃ ga i Bosate mi Ɣaa to ɔ̃atã mi ne, misu ata wa lomɔ awɛ̃ misɛ si mibala wã ku iba fudza. 3 Mitsɛrɛ mmara mɛgbe ɔɖuɖu atɔ̃me misia i ata iso, si miɔwara ɔwore misɛ miabo i karɔ̃ ga i Bosate mi Ɣaa to ɔ̃atã mi iso. Karɔ̃ sɛɛ ku iɖa kaɖe, lɛ kumɛgɔ i Bosate mi mawa Ɣaa ɔɣɛ ɔsɛ mi. 4 Si miɔwara Yordan ɔwore ne, miɣedza ata wagbe i Ebal Kube iso, lɛ loɣere mi nɔme, si mikua wã ku iba fudza. 5 Mipɛ isɔrɛkasege ku ata i mmɔ mitã Bosate mi Ɣaa. Midaasu ibɔrakpinaa irabarara mibara kuira i ata iso. 6 Mipɛ Bosate mi Ɣaa isɔrɛkasege ku karɔ̃ ndɛ̃ ata si misɔrɛ araifɛ̃ asɔrɛ mitã Bosate mi Ɣaa i kã iso. 7 Mmɔ ne si misɔrɛ isobuɛ asɔrɛ si miɖe wã mina isoɣɔ i Bosate mi Ɣaa anɔ. 8 Ata wa miɣedza iso ne, mitsɛrɛ mmara mɛgbe atɔ̃me ɔɖuɖu kukaakɔ misia iso."

9 Kere ne Mose gu masɔrɛdze ma nɖe ma Levise, ɔɣere Israel maturi ɔɖuɖu sɔ, "Israel kaɖe, milo si mikã atsue! Kiniɔ ne miɔkpese Bosate mi Ɣaa maturi. 10 Miwarɛ Bosate mi Ɣaa si misiai ɔ̃ mmara gu asɛ̃ra wa lotã mi nɔme."

Sigbarĩ Ala Atsue Idaakã Ɔso

11 Iyi nɛmɔ ame i Mose ɔɣere maturi sɔ:

12 Si miɔwara Yordan ɔwore ne, kumele gɔgbe loaya i Gerizim Kube iso mafere maturi kusɛkusɛ ne: Kumele nɖe Simon, Levi, Yuda, Isakar, Yosef gu Benyamin. 13 Kumele gɔgbe loaya i Ebal Kube iso magbarĩ ne: Kɔ̃ nɖe Ruben, Gad, Aser, Zebulon, Dan gu Naftali.

14 Ma Levise aaɣere Israel maturi ɔɖuɖu atɔ̃me wa nsiai ku silɔ teteree sɔ:

15 "Sigbarĩ siɖe ɔturi wɔ loabara irapɔa ɣee ɔtore irapɔa nɛ nɖe inyanyara i Bosate anɔ, gɔ iɖe kusɛ̃baradze karabara - ne ɔɣedza ne i iwɛrɛ ame."

Iyɔ maturi ɔɖuɖu aaɣɛ sɔ, "Si iba ngbɔ!"

16 "Sigbarĩ siɖe ɔturi wɔ loisɛ ɔwarɛ ɔ̃ ɔse ɣee ɔ̃ ɔnyi."

Iyɔ maturi ɔɖuɖu aaɣɛ sɔ, "Si iba ngbɔ!"

17 "Sigbarĩ siɖe ɔturi wɔ nsɛ ɔrui ɔ̃ ɔnyii kume adziri."

Iyɔ maturi ɔɖuɖu aaɣɛ sɔ, "Si iba ngbɔ!"

18 "Sigbarĩ siɖe ɔturi wɔ nsɛ ɔkɔ manɔbiɛdze ɔyura i ma ɔri iso."

Iyɔ maturi ɔɖuɖu aaɣɛ sɔ, "Si iba ngbɔ!"

19 "Sigbarĩ siɖe ɔturi wɔ loiɣɛ itɔ̃me i ɔri iso ɔtã ɔfɔ gu ɔsekpibi gu kpisere."

Iyɔ maturi ɔɖuɖu aaɣɛ sɔ, "Si iba ngbɔ!"

20 "Sigbarĩ siɖe ɔturi wɔ nsɛ ɔrɛgu ɔ̃ ɔse ɔre alasɔ ɔ̃isɛ ɔpia ɔ̃ ɔse karɛkɔ̃ kuwarɛ."

Iyɔ maturi ɔɖuɖu aaɣɛ sɔ, "Si iba ngbɔ!"

21 "Sigbarĩ siɖe ɔturi wɔ nsɛ ɔrɛgu bɔi ɔrere."

Iyɔ maturi ɔɖuɖu aaɣɛ sɔ, "Si iba ngbɔ!"

22 "Sigbarĩ siɖe ɔrɛrɛ̃ wɔ nsɛ ɔrɛgu ɔ̃ ɔnyiiko, ɔ̃ ɔse ɔbibirɔ̃gomi ɣee ɔ̃ ɔnyi ɔbibirɔ̃gomi."

Iyɔ maturi ɔɖuɖu aaɣɛ sɔ, "Si iba ngbɔ!"

23 "Sigbarĩ siɖe ɔrɛrɛ̃ wɔ nsɛ ɔrɛgu ɔ̃ masɔrɔ̃go."

Iyɔ maturi ɔɖuɖu aaɣɛ sɔ, "Si iba ngbɔ!"

24 "Sigbarĩ siɖe ɔturi wɔ nsɛ ɔɖue ɔ̃ ɔnyii i iwɛrɛ ame."

Iyɔ maturi ɔɖuɖu aaɣɛ sɔ, "Si iba ngbɔ!"

25 "Sigbarĩ siɖe ɔturi wɔ nsɛ ɔfɔ kawɛrɛra karatã si ɔɖue ɔturi wɔ loiɣɛrɛ."

Iyɔ maturi ɔɖuɖu aaɣɛ sɔ, "Si iba ngbɔ!"

26 "Sigbarĩ siɖe ɔturi wɔ loisɛ ɔwarɛ mmara mɛgbe atɔ̃me, ɔbara i me iso."

Iyɔ maturi ɔɖuɖu aaɣɛ sɔ, "Si iba ngbɔ!"