1 Mose ɔɣere Israel mabi sɔ: Masɔrɛdze, ma nɖe ma Levise - gbaã ne gu ma Levise kamele maturi ɔɖuɖu ne - maibatã ma karɔ̃ ɣee kaɖekɔ̃ i Israel. Ma ne, maaɖe ara mabɔrɛgu i asɔrɛ wa masɛ matsuedza matã Bosate ame, ala ne nɖe ma kaɖekɔ̃ ne. 2 Maibawe kaɖekɔ̃ kukawɛ̃ i ma manyii ndɛ̃. Bosate nɖe ma kaɖekɔ̃ lɛ kumɛgɔ ɔɣɛ ɔsɛ ma.

3 Nwagbe nɖe masɔrɛdze kaɖekɔ̃ si maturi ɔsu nantsuĩrɛrɛ̃ ɣee sɛrɛrerɔ̃ maba maasɔrɛ. Wã nɖe bɔi amɔiti gu kanyala gu ayirira. 4 Miasu mi geɖebu ɔraɖui ɖeakatɔ̃ gu ndã ɣɛtɛ gu nnɔĩ gu sɛrɛrerɔ̃ siwɛrɛ̃* ɖeakatɔ̃ dzɛ miakparɛ̃ mitã ma. 5 Ala Bosate mi Ɣaa loɖi ma gu ma ɔkparɛ ɔbɔrɛgu i kumele ɔɖuɖu ame, sɔ mala maɔsumu i Bosate iyere iso ɔwi biara ɔso.

6 Si Levise ɔwɛ̃ ɔbɔrɛ i ɔmagɛ̃ ɔrere wɔ ame ɔsi i Israel fiɛ isia i ɔ̃ ɔtu iso, ne ɔba kakɔi kawɛ̃ ga i Bosate to ɔ̃aɖi ne, 7 ɔ̃awo ɔsumu i mmɔ i Bosate ɔ̃ Ɣaa iyere ame, lɛ ɔ̃ manyii ma Levise ɔɖuɖu ma nto masumu i Bosate anɔ i mmɔ. 8 Ɔ̃afɔ araɖea kusime kuwɛ̃ lɛ masɔrɛdze mama kaɖekɔ̃ ame, atoasɔ ɔ̃ɔfɔ kuso gɔ mana i iyomaturi karana ga marɔdɛ̃ ame.

9 Si mibo i karɔ̃ ga i Bosate mi Ɣaa to ɔtã mi ame ne, midaasore anyanya kubarara gɔ i nɖebi maturi to mabara i mmɔ. 10 Mi kuwɛ̃ daasu ɔ̃ ɔbibirɛrɛĩ ɣee ɔbibirɔ̃gomi ɔsɔrɛ lɛ isɔrɛ i ɔtɔ ame i mi ndɛ̃. Ngbɔ ame si midaabara sibɔipɛ ɣee awara gu akparĩ karɔ̃ iɖi gu kabuɛ ku wã igbã. 11 Midabara kanyaipia ɣee kpise ikpere ara ɣee siwarã ikpere fiɛ kuwɛ̃ daaɖi sise i kpise kanya. 12 Ɔrere wɔ nsɛ ɔbara ara wagbe ne, anyanyara aɖe atãBosate. Ala anyanyara wagbe ɔso i Bosate mi Ɣaa to ɔ̃asa nɖebi mɛmɔ maturi ɔɖi i mi katɔ̃ ne. 13 Iikote sɔ iɣɛrɛ aawe i mi iso i Bosate mi Ɣaa anɔ.

14 Ne Mose ɔɣɛ sɔ, nɖebi mɛ karɔ̃ mito miba miafɔ maturi ɔfɔ mawase ɣee sibɔmapɛdze maɖe. Ɣɛɛ mi ne, Bosate mi Ɣaa iitã mi ɔri sɔ mibara kumɛɔ. 15 Bosate mi Ɣaa to ɔ̃asese mi kanyaɖidze lɛ me ɔbɔrɛgu i mi mɔmɔ maturi ame. Ikote sɔ miakã wũ atsue.

16 Ala iyi nɛ misakanya i Xoreb kube kɔrɛ miɣɛ sɔ, "Tã sɔ boisibanɔ Bosate bo Ɣaa ɔɖeika ɣee bonya ɔtɔ siare wɔgbe ana, si iiɖe ngbɔ boto boakpi."

17 Kere ne Bosate ɔɣere me sɔ, "Nnɛ mato maɣɛ lɛ. 18 Loasese ma kanyaɖidze lɛ fɔ awe lobɔrɛgu i ma maturi ame. Loaɣere wũ nnɛ sɔ ɔɣɛ fiɛ ɔ̃aɣere maturi irabiara nɛ loɣere wũ. 19 Si ɔrere iisɛ ɔkã wũ atɔ̃me wa i kanyaɖidze sɛ ɔɣɛ i wũ iyere ame atsue ne, mme wũ mɔmɔ loakpadzɛ̃ wũ kutsue. 20 Ɣɛɛ si kanyaɖidze ɔrere ɔwararã ɔɖeika i wũ iyere ame gɔ loiɣere wũ sɔ ɔbara ngbɔ ne, ikote sɔ maaɖue wũ. Ɣee kanyaɖidze wɔ loaɖeika i aɣɔ mama iyere ame ne ikote sɔ maaɖue wũ."

21 Mito miaɣere so sɔ, "Nda boawo ɔtsue si itɔ̃me iibɔrɛ i Bosate kɔrɛ?" 22 Si kanyaɖidze ɔɖeika i Bosate iyere ame fiɛ nnɛ ɔɣɛ iiba i ne ame ɣee iiba gbaã ne, iyɔ itɔ̃me nɛ Bosate iiɣɛ iɖe. Kanyaɖidze wɔmɔ ɔɖeika i ɔ̃ mɔmɔ ɔle ame. Iyɔ midaanigã wũ.