1 Mose ɔɣere Israel mabi sɔ: Miɖuɛ Bosate mi Ɣaa si mimɔɛ̃ ɔ̃ asɛra mila, si mibara i asɛ̃ra iso, ɔ̃ mmara gu ɔ̃ mmaraisi iso ɔwi biara. 2 Minyigi nɔme sɔ iiɖe mi mabi maɖe lonya fiɛ maki i Bosate mi Ɣaa ikpadzɛ̃ ame. Mi miɖe lonya ɔ̃ sipiɛse gu ɔ̃ ɔle gu ɔ̃ kɔrɔ̃ teterea ɔle, 3 akparĩ wa ɔɖi ɔte gu ara wa ɔbara i Egipte ame, Egipte Igarakpakpa gu ɔ̃ karɔ̃ wã anyɔ ɔɖuɖu, 4 nnɛ i Bosate ɔbara Egipte makpakpɛ̃dze ku ma apɔngɔ gu kubore fiɛ ɔtã masɛ ndu i Ɔpo Rɛtɛa ame. Ɔwi wɔ matere masiai mi ne, Bosate ɔwɔra ma ɔɖi pelepele. 5 Iiɖe mi mabi lonya nnɛ ɔbara ɔtã mi i fafuĩ ame, gbɔgbɔɔbgɔ miba miabo i kakɔi gagbe. 6 Ne minya nnɛ ɔbara Datan gu Abiram ma nɖe Eliab wɔ lobɔrɛ i Ruben kamele ame mabibirɛrɛĩ. Gɔ i karɔ̃ ɔwarɛ kanya kame ma, ku ma iyomaturi gu ma akpayo gu ma irabiara nɛ mba ngbã, i Israel maturi ɔɖuɖu anɔmi ame. 7 Ɣɛɛ ku mi mɔmɔ anɔmi minya kumɛgɔ i Bosate ɔbara ara siare ɔɖuɖu wagbe.

8 Mose ɔsɔgu sɔ: Ne ɔso mibara i mmara ɔɖuɖu mɛ nto lotã mi nɔme iso. Si miana ɔle misɛ mibo fiɛ miasu karɔ̃ ga mito miwara Yordan ɔwore misɛ miafɔ. 9 Si miasɛ ngbã idzoro i karɔ̃ ga i Bosate ɔkã ɔtã mi mawa sɔ ɔ̃atã ma ku ma siɣekparɛ, karɔ̃ sɛɛ ku iɖa. 10 Karɔ̃ ga mito miba miabo miafɔ iise lɛ Egipte karɔ̃ awe. Nga ame mibɔrɛ ne, si mipɛ ɔraɖui ne misɛ ku ngba mifefere ndu, lɛ i ɔraɖuiyuɛ kawĩmi ame awe. 11 Ɣɛɛ karɔ̃ ga mito miawara Yordan ɔwore miafɔ ne, abe gu kugbolomi pia ngbegɔ i kado sɛ ɔpɛ ɔtã ndu iɖe. 12 Bosate mi Ɣaa sɛ ɔsu ira i kã iso fiɛ Bosate mi Ɣaa anɔmi sia i kã iso ɔwi biara, ita i ikɔ karɔ̃kasɛkɔ̃ isɛ iabo ne kawirikɔ̃.

13 Ne ɔso misɛ i mmara mɛ nto lotã mi nɔme iso ku ɔnukuare. Si miɖuɛ Bosate mi Ɣaa si misumu wũ ku mi ɔtu ɔɖuɖu gu ɔkala ɔɖuɖu. 14 Si mibara ne iyɔ loto loatã kado ɔpɛ ɔfere i karɔ̃ iso, ku kadowi gu ku kukpɛ si miana geɖebu ɔraɖui misasa gu ndã gu nnɔĩ ana. 15 Loatã sikua ɔre i karɔ̃ iso si mi mabɔi aana araɖea. Mito miaɖe araɖea fiɛ miami.

16 Minyɔ so kukaakɔ, si iiɖe ngbɔ ne ito iatã sɔ miafiriki i Bosate kɔrɛ misɛ miasumu aɣɔ mama. 17 Si mibara ngbɔ ne Bosate to ɔ̃anagu mi sikpã. Ɔto ɔ̃asɛ̃ kato iyɔ kado iibapɛ fiɛ karɔ̃ to kaakore iyɔ ɔraɖui iibalɛ. Iyɔ iibana ɔpã fiɛ miawɔ i karɔ̃ sɛɛ ga i Bosate to ɔtã mi iso.

18 Misu wũ atɔ̃me wagbe mipia i mi situ gu adzuni ame. Minyi wã i karɔtɔ̃ si minyi wã misia i atɔ̃gbo iso lɛ ikparĩ. 19 Misu wã mite mi mabi si miɖeika i wã iso si mipia i iyo gu si misɛ i ɔri gu si mirɛ gu si mita. 20 Mitsɛrɛ wã misia i mi ayo kuyogodɔ̃ sidziri iso gu mi kuyogodɔ̃ iso. 21 Iyɔ mi gu mi mabi to miasɛ ngbã tagbaraa, i karɔ̃ ga i Bosate mi Ɣaa ɔɣɛ ɔsɛ sɔ ɔ̃atã mi mawa iso. Miasɛ i mmɔ ayi kumɛgɔ awe i kuɖokpo pia i karɔ̃ kato.

22 Mibara i mmara ɔɖuɖu mɛgbe iso lɛ nto lotã mi si misiai me kukaakɔ. Miɖuɛ Bosate mi Ɣaa si misɛ i ɔ̃ siri ɔɖuɖu iso si mipɛ mimatã i ɔ̃ iso. 23 Iyɔ Bosate to ɔ̃asa maturi ɔɖuɖu magbe ɔɖi i mi katɔ̃. Mito miaba fiɛ miafɔ nrɔ̃ mɛ nɖe maturi ma lomɔ maɖo mi fiɛ maba ɔle maɖo mi mire. 24 Karɔ̃ kakɔi biara ngbegɔ miasia kukpa to kakpese mi kare. Mi karɔ̃ to kaata i fafuĩ ame i kagbalɔ, ikɛlɛ Lebanon abe kɔrɛ i katikpe isɛ fiɛ ita i Frat Ɔwore i kuɣɛ̃kabɔrɛkɔ̃, ikɛlɛ iabo i Ɔpo Siare iso i kuɣɛ̃kabokɔ̃ isɛ. 25 Kakɔi biara ngbegɔ miasɛ i karɔ̃ iso ne Bosate mi Ɣaa to ɔ̃atã maturi ɔwe ifɔ̃ fiɛ maanigã mi i karɔ̃ ɔɖuɖu iso, lɛ kumɛgɔ ɔɣɛ ɔsɛ fiɛ kuwɛ̃ iibawo ɔtuĩdza mi.

26 Minyɔ, nɔme ne nto losu kusɛkusɛ gu sigbarĩ losɛ i mi i katɔ̃. 27 Kusɛkusɛ kuaɖe si misɛ i Bosate mi Ɣaa mmara mɛ nto lotã mi nɔme iso. 28 Ɣɛɛ si misɛ̃ Bosate mi Ɣaa mmara iso ibara fiɛ mipɛ mifiriki i ɔri wɔ loɣere mi nɔme iso, ne misumu aɣɔ mama wa miiɣe ne, sigbarĩ siaɖe. 29 Si Bosate mi Ɣaa ɔɔkɔ mi ɔbɔ karɔ̃ ga mito miba miafɔ ne, mipɛ kusɛkusɛ imomo i Gerizim Kube iso, si mipɛ sigbarĩ imomo i Ebal Kube iso. 30 Lɛ miɣe ne, abe wagbe pia i Yordan ɔwore kuɣɛ̃kabokɔ̃ isɛ, i ma Kanaanse karɔ̃ ame, ibore imatã More siɖum adziri. Abe pia ito ikɛlɛ kuɣɛ̃kabokɔ̃ isɛ, i ma Kanaanse ma nsi i Araba ibuiti i Gilgal ɔmagɛ̃ awo ame. 31 Ka mito miba miawara Yordan ɔwore mibo mifɔ karɔ̃ ga i Bosate mi Ɣaa to ɔsu ɔtã mi. Si miɔfɔ kã fiɛ ka misi i mmɔ ne, 32 minyɔ sɔ mibara i asɛ̃ra ɔɖuɖu gu mmara ɔɖuɖu mɛ nto lotã mi nɔme iso.