1 Ne Mose ɔɣere Israel kaɖe ana sɔ: Si miɔbo i karɔ̃ ga i Bosate mi Ɣaa to ɔba ɔ̃asu ɔtã mi lɛ kaɖekɔ̃ fiɛ miɔfɔ kã fiɛ ka misi i kã iso ne, 2 misu siraɖui ɔɖuɖu dzɛ miapia i karɔ̃ ga i Bosate mi Ɣaa to ɔtã mi iso abi ɖeakatɔ̃ awɛ̃ mipia i kasɛsɛ ame. Iyɔ si mikɛlɛ kakɔi kawɛ̃ ga i Bosate mi Ɣaa to ɔ̃aɖi lɛ ɔ̃ Iyere kawekɔ̃. 3 Iyɔ si aɣere sɔrɛdze wɔ nsi i kanya ɔwi wɔmɔ ame sɔ, "Loto loɣere Bosate fɔ Ɣaa nɔme sɔ, loɔba i karɔ̃ ga i Bosate ɔkã ndamu ɔtã bo mawa sɔ ɔ̃atã bo iso." 4 Sɔrɛdze to ɔ̃afɔ kasɛsɛ i fɔ nrɔɔ̃ ame fiɛ ɔ̃asu ɔsɛ i karɔ̃ i Bosate fɔ Ɣaa isɔrɛkasege katɔ̃. 5 Iyɔ aato aaɣɛ i Bosate fɔ Ɣaa anɔ sɔ, "Wũ ɔse ɔɖe Aramse wɔ lowe ɔla ɔ̃ɔkiki. Ne ka ɔso ɔkɛlɛ ɔsɛ ɔ̃ɔsɛ i Egipte karɔ̃ iso. Maturi kɛkɛĩ maɖe ne masɛ i mmɔ, ne makpese maturi ma losi gu kaɖe ga lowe ɔle gbaã. 6 Ɣɛɛ ma Egiptese ɔbara bo amumuɔ fiɛ mawedza bo inyɛ, matã bobara karabara teteree. 7 Kere ne bobiɛ kaku bokpere Bosate bo mawa Ɣaa, ne ɔnya bo ɔɣiã gu ikpɛkpɛ̃ gu inyɛwe, ne ɔnɔ bo silɔ ne. 8 Ne ɔso Bosate ɔɖi bo ɔbɔrɛgu i Egipte karɔ̃ iso ku kɔrɔ̃ ame ɔle siare gu kɔrɔ̃ teterea gu afɔ̃ra siare gu awawã akparĩ gu ara wa mba ɣii. 9 Ɔkɔ bo ɔbɔ i kakɔi gagbe, ne ɔsu karɔ̃ gagbe ɔtã bo, karɔ̃ sɛɛ ku iɖa. 10 O Bosate kiniɔ ne, losu ɔraɖui ɖeakatɔ̃ wɔ lona i fɔ karɔ̃ ga atã me ame lobɔ-ɔ." Su kasɛsɛ sɛ i Bosate fɔ Ɣaa anɔ si asumu wũ. 11 Iyɔ ne mi gu ma Levise gu mafɔ ma mpia i mi kɔrɛ, aana isoɣɔ i ara sɛɛ wa i Bosate mi Ɣaa ɔtã mi gu fɔ iyomaturi.

12 Ikɔ tɛare nɖe ikaweova ikɔ. Si miɖi mi ɔraɖui biara ikaweova i ikɔ nɛgbe ame misɛ ise. Si misu wã mitã ma Levise gu mafɔ gu masekpibi gu makpisere si ma wũ maaɖe ara mami i mi simagɛ̃ ame. 13 Iyɔ ne kparamakayi i Bosate fɔ Ɣaa anɔ sɔ, "Loɔɖi fɔ ikaweova sekelea i wũ iyo fiɛ loɔsu lotã, ma Levise gu mafɔ gu masekpibi gu makpisere i nwa ɔɖuɖu atã mmara kanya. Loipɛ lofiriki i fɔ mmara kama ɣee loiɣara kumiwɛ̃. 14 Loiɖe ikaweova sekelea kuiwɛ̃ ku ɔwi wɔ lopia i isoma ame ɣee loiɖi lotã ala ɔturi kukpi ɔso fiɛ loiɖi kuiwɛ̃ lobɔrɛgu iyo, ɔwi wɔ loisekele fiɛ loisɔrɛ kuiwɛ̃ lotã kpise. Loɔwarɛ Bosate wũ Ɣaa ne lobara irabiara nɛ aɣere me. 15 Nyɔ sese i karɔ̃ bɔrɛgu i kato, fɔ kawekɔ̃ sekelea, si afere fɔ maturi Israel kusɛkusɛ. Ana ne fere karɔ̃ ga asu atã bo kusɛkusɛ, lɛ aɣɛ asɛ ku ndamu atã bo mawa fiɛ kaɖe karɔ̃ sɛɛ ku iɖa."

16 Mose ɔɣɛ sɔ: Bosate mi Ɣaa to ɔɣere mi nɔme sɔ misiai asɛ̃ra gu mmara mɛgbe, si mimɔɛ̃ me kukaakɔ mila ku mi ɔtu ɔɖuɖu gu mi ɔkala ɔɖuɖu. 17 Miɔɣɛ misiaita nɔme sɔ Bosate nɖe mi Ɣaa. Ne mito miasɛ i ɔ̃ siri iso fiɛ miamɔɛ̃ ɔ̃ asɛ̃ra, mmaraisi gu mmara mila fiɛ miawarɛ wũ. 18 Ne Bosate ɔɔsiaita nɔme sɔ ɔ̃ maturi miɖe, ɔ̃ karana nyaa miɖe lɛ kumɛgɔ ɔɣɛ ɔsɛ, sɔ si miamɔɛ̃ ɔ̃ mmara ɔɖuɖu mila. 19 Ɔ̃ɔsiaita sɔ ɔ̃atã male mi, miafɔ iyere fiɛ miana kuwarɛ miɖo nɖebi ɔɖuɖu mɛ ɔbara fiɛ miaɖe maturi sekelea mitã Bosate mi Ɣaa lɛ kumɛgɔ ɔɣɛ ɔsɛ.