1 Ne Mose ɔɣɛ sɔ: Kiniɔ ne, Israel Kaɖe, minɔ mmara gu asɛ̃ra wa nto loba loate mi. Misiai wã si miasɛ ngbã fiɛ miasɛ miafɔ karɔ̃ ga i Bosate, mi mawa Ɣaa, to ɔba ɔ̃asu ɔtã mi. 2 Midaabua kuira i mmara mɛ loatã mi iso fiɛ midaaɖi kuira i me ame ana. Ɣɛɛ mibara i Bosate mi Ɣaa mmara mɛ nto lotã mi iso.

3 Mi mɔmɔ minya nnɛ i Bosate ɔbara i Baal Peor. Bosate mi Ɣaa ɔwɔra ɔturi biara wɔ losiai Baal i mi ndɛ̃ i Peor. 4 Ɣɛɛ mi ɔɖuɖu ma lomɔɛ̃ Bosate mi Ɣaa ɔri mito ɔkpese mipia ngbã nɔme.

5 Minyɔ, loɔte mi mmara gu asɛ̃ra lɛ kumɛgɔ i Bosate wũ Ɣaa ɔɣere me. Si miabara i me iso i karɔ̃ ga ame mito miabo miafɔ ame. 6 Mi anɔ si asia i me iso kukaakɔ. Nnɛgbe loate nɖebi sɔ miba karɔ̃inɔ gu iwola. Mato maanɔ mmara ɔɖuɖu mɛgbe ne mato maaɣɛ sɔ, "Gbaã ne kaɖe siare gagbe ba karɔ̃inɔ gu iwola." 7 Kaɖe kukawɛ̃ iisɛkatɔ̃ sɔ ma aɣɔ ɔbore amatã ma lɛ kumɛgɔ i Bosate bo Ɣaa ɔmatã bo ɔwi ɔrere si bokparamakayi botã wũ. 8 Kaɖe kukawɛ̃ mama iimɔ kumɛɔ sɔ kaba mmara gu asɛ̃ra bɔlɔlɔa lɛ mmɛ igbã losu losɛ i mi anɔ nɔme.

9 Miɣara so si minyɔ so iso kukaakɔ kere, sɔ miibaɣara ara wa minya ku mi anɔmi ɣee mitã abɔrɛ i mi situ ame, ɔwi kumɛgɔ mipia ngbã. Misu wã mite mi mabi, si ma wũ maasu mate ma kama mabi. 10 Minyigi iyi nɛ miya i Xoreb kube kɔrɛ, i Bosate mi Ɣaa anɔ. Ɔwi wɔmɔ ɔɣere me sɔ, "Sa maturi kanya i wũ anɔ si loɣere ma wũ atɔ̃me. Si maatsue kumɛgɔ maawarɛ me ku kunigã ayi kumɛgɔ mapia ngbã i karɔ̃ iso fiɛ si maasu mate ma mabi." 11 Mibore miba ne miya i kube karɔ̃ gɔ ɔtɔ ɔla ɔ̃atsue valavala ikɛlɛ kato ku adɔdɔ kpinakpina gu idududu kpirikpiria. 12 Kere ne Bosate ɔɖe mi ika ɔbɔrɛgu i ɔtɔ ame. Minɔ ɔ̃ silɔ gu atɔ̃me ɣɛɛ miinya ɔ̃ mɔmɔ kuseme kukuwɛ̃. Silɔ kere lobɔrɛ i mmɔ. 13 Ɔɣere mi ɔ̃ ndamu, mmɛ nɖe Mmara Miweo mɛ ɔɣere mi sɔ mibara misia fiɛ ka ɔtsɛrɛ me ɔsia i ata wã anyɔ iso. 14 Ɔwi wɔmɔ ame ne Bosate ɔɣere me sɔ, lote mi mmara gu asɛ̃ra si miabara i wã iso, i karɔ̃ ga mito miawara Yordan ɔwore miafɔ.

15 Iyi nɛ i Bosate ɔɖe mi ika ɔbɔrɛgu i ɔtɔ ame, i Xoreb kube iso ne, miinya kuseme kukuwɛ̃. Ne ɔso minyɔ so kukaakɔ. 16 Ne ɔso midanina so sɔ miabara irapɔa mitã so. Midaabara irapɔa kumiamia i kuseme kurere kanya, lɛ ɔrɛrɛ̃ ɣee ɔrɔ̃go 17 ɣee bɔi i karɔ̃ iso ɣee karodzai ga nsɛ kafɛrɛrɛ i ɔwiri ame karere kumiamia oo 18 irakpɛã oo ɣee afara arere i ndu ame, ne midaabara kuiwɛ̃ kumiamia mitã so. 19 Ne si minyɔ kato fiɛ minya kuɣɛ̃ gu ɔgbaleti gu awãmi - kato ara ɔɖuɖu - ne, midaatã akpadzɛ̃ mi apia i ilainyɔ ame fiɛ miabɔitikarɔ̃ sɔ miasumu wã. Ala Bosate mi Ɣaa ne, ɔbara wã ɔtã nɖebi ɔɖuɖu mɛ mpia i kato kayirinɔ ɔso. 20 Ɣɛɛ mi ne, Bosate ɔsu mi ne ɔɖi mi ɔbɔrɛgu i inyɛwe ame i Egipte karɔ̃ iso, ngbegɔ lose lɛ ibɔra kawanɛkɛ̃rakɔ̃ ɔtɔ i ɔferewu ame. Si miɖe ɔ̃ mɔmɔ kaɖekɔ̃ maturi lɛ kumɛgɔ miɖe kiniɔ.

21 Bosate ɔnagu me sikpã ala mi ɔso fiɛ ɔkã ndamu ɔɣɛ sɔ loibawara Yordan ɔwore fiɛ loasia kukpa i karɔ̃ sɛɛ ga i Bosate mi Ɣaa to ɔsu ɔtã mi lɛ mi kaɖekɔ̃ iso. 22 Nto loakpi i karɔ̃ ga i ngbe fiɛ loibawara Yordan ɔwore. Ɣɛɛ mi ne ka mito miba miawara mikɛlɛ miasu karɔ̃ sɛɛ gamɔ. 23 Minyɔ so kukaakɔ sɔ miibaɣara ndamu mɛ i Bosate mi Ɣaa ɔbaragu mi. Midaabara irapɔa i kuira kumiamia ame, nnɛ i Bosate mi Ɣaa ɔsɛ̃ ɔtã mi. 24 Ala Bosate mi Ɣaa ne, ɔse lɛ ɔtɔ wɔ nsɛ ɔtsuedza ara, Ɣaa wɔ nsɛ ɔkpɛ̃ sirerɛ gbaã ɔɖe ɔso.

25 Si miɔɣe mabi mifɔ mawa fiɛ miɔsɛ i karɔ̃ iso, itã ɔwi dzoroo kama ne - si miba mianina fiɛ mibara arapɔa igbã irere, mibara iranyanyariã i Bosate mi Ɣaa anɔ ne, mito miapia wũ sikpã. 26 Nto lokpere kato gu karɔ̃ sɔ aɖe me aɖansiɛ i mi iso nɔme, sɔ mito miawɔ mala, mibɔrɛ i karɔ̃ ga mito miawara Yordan ɔwore misɛ miafɔ iso. Miibasɛ i kã iso ina ɔpã ɣɛɛ Ɣaa to ɔ̃awɔra mi. 27 Bosate to ɔ̃asamera mi ɔpia i nɖebi mama maturi ame. Iyɔ mi maturi irɛ̃saã loakuti miwe ngbã, i nɖebi mɛ ame i Bosate aasa mi ɔkɛlɛgu ndɛ̃. 28 I mmɔ ne mito miasumu aɣɔ wa maturi ɔsu adziri gu ata mabara ala. Aɣɔ wa loisɛ anya ara ɣee anɔ ara, aisɛ aɖe aɖera ɣee anɔ ara ɔfiã. 29 Ɣɛɛ si mibie Bosate mi Ɣaa i mmɔ, ne mibie wũ ku mi ɔtu ɔɖuɖu ku mi ɔkala ɔɖuɖu ne, mito mianya wũ. 30 Si ara wagbe ɔɔba i mi iso fiɛ miɔbo i imɔrɛ̃ ame ne, katsɔrakɔ̃ ne mito miaba i Bosate mi Ɣaa kɔrɛ fiɛ miawarɛ wũ. 31 Ala Bosate mi Ɣaa ba nnyainyɔ ɔso. Ɔ̃ibanyua mi ɔsɛ ɣee ɔwɔra mi fiɛ ɔ̃ibaɣara ndamu mɛ ɔbaragu mi mawa, mmɛ iso ɔsiaita ku ndamu ɔtã ma.

32 Mikarɛ kiniɔ ise i kokowi ara wa loba dzoroo fiɛ mi ɔwi minɔ. Midzuĩ ara wa loɔba ita i ɔwi wɔ i Ɣaa ɔbara ɔturi awune ɔpia i karɔ̃ iso. Mikarɛ ara wa loɔba i kato kawirikɔ̃ kawɛ̃ ikɛlɛ kamama. Ira siare iwɛ̃ ɔɔba lɛ nnɛgbe igbã inya? Ɣee ɔwɛ̃ ɔɔnɔ itɔ̃me nɛgbe igbã ɔnɔ? 33 Maturi mama kumawɛ̃ iinɔ Ɣaa ɔɖeika ɔbɔrɛgu i ɔtɔ ame, manya lɛ mi fiɛ miwe ngbã. 34 Ɣaa ɔwɛ̃ ɔɔsu kaɖe ɔtã so nga ɔɖi ɔbɔrɛgu i kaɖe mama ame, iki i ilainyɔ ame, iki i awawãkparĩ ame gu ara wa mba ɣii, iki i kakpã ame, ɔ̃ kɔrɔ̃ teterea gu kɔ̃ ame ɔle siare ɣee iki i afɔ̃ra siare arabarara ame, lɛ ara ɔɖuɖu wa i Bosate mi Ɣaa ɔbara ɔtã mi i Egipte karɔ̃ iso minya ku mi mɔmɔ anɔmi ame?

35 Matã minya ara wagbe si miatsue sɔ Bosate ɔnɔwɛ̃ nɖe Ɣaa, kuwɛ̃ mama siina i ɔ̃ kama. 36 Ɔtã minɔ ɔ̃ silɔ ɔbɔrɛ i kato si ɔte mi ara gɔ miawarɛ wũ. Ɔtã minya ɔ̃ ɔtɔ sekelea i karɔ̃ iso fiɛ minɔ ɔ̃ atɔ̃me mibɔrɛgu i ɔtɔ ame. 37 Ala ɔɖuɛ mi mawa ɔso ne, ɔɖi ma siɣekparɛ i ma kama fiɛ iki ɔ̃ Anɔ ne ɔkɔ mi ku ɔ̃ ɔle siare ɔɖi mi ɔbɔrɛgu i Egipte karɔ̃ iso. 38 Ne ɔsa maturi nɖebi siare mɛ mba ɔle maɖo mi ɔɖi i mi katɔ̃. Si ɔkɔ mi ɔbɔ i ma karɔ̃ ame si ɔsu ɔtã mi lɛ kaɖekɔ̃, lɛ ise nɔme.

39 Mitsue si misu mipia i ɔtu ame nɔme sɔ Bosate ɔnɔwɛ̃ nɖe Ɣaa i kato gu karɔ̃ pelepele. Ɣaa mama kuwɛ̃ siina. 40 Mibara i mmara gu asɛ̃ra wa loto lotã mi nɔme iso, si irabiara aalɛgu mi kukaakɔ gu mi siɣekparɛ i mi kama ana. Miasɛ ngbã idzoro i karɔ̃ ga i Bosate mi Ɣaa to ɔba ɔ̃asu ɔtã mi iso ɔwi ɔɖuɖu."

41 Kere ne Mose ɔɖi simagɛ̃siare itɛ i Yordan ɔwore kuɣɛ̃kabɔrɛkɔ̃ isɛ ɔsɛ, 42 itã si ɔrere ɔɖue ɔturi fiɛ iiɖe sɔ ɔbara adzuni ɔsɛ sɔ ɔ̃aɖue wũ fiɛ ne, ɔ̃atere ɔkɛlɛ simagɛ̃siare dzɛmɔ ɔwɛ̃ ame iyɔ si ɔ̃aɖi ɔ̃ ngbã. 43 Simagɛ̃siare loɖe ndzɛgbe ne: Bezer itã Ruben kamele i fafuĩ kabetɛfɛkɔ̃ ame gu Gad kamele ɔmagɛ̃siare loɖe Ramot i Gilead ibuiti ame fiɛ Manase kamele ɔmagɛ̃siare loɖe Golan i Basan ibuiti ame.

44 Mmara mɛgbe i Mose ɔsu ɔtã Israel mabi ne. 45 Nwagbe nɖe asɛra gu asɛ̃ra gu Mose mmara mɛ ɔsu ɔtã Israel mabi, ku ɔwi wɔ maɔbɔrɛ i Egipte karɔ̃ iso ne. 46 Maba maawe i kagbolomi ame imatã Bet Peor i Yordan kuɣɛ̃kabɔrɛkɔ̃ isɛ. Karɔ̃ gagbe ɔɖe ma Amorise Igara Sixon kare, nwɔ loɖe sigara i Xesbon iso fiɛ Mose gu Israel mabi ɔɖe wũ iso gɔ mabɔrɛ i Egipte karɔ̃ iso mato maba. 47 Mafɔ igara Sixon karɔ̃ gu Og wɔ nɖe ma Basanse igara karɔ̃. Ma loɖe ma Amorise magara inyɔ i Yordan ɔwore kuɣɛ̃kabɔrɛkɔ̃ isɛ. 48 Karɔ̃ gagbe ɔta i Aroer i Arnon Ɔwore Kawɛlagbolomi sitsueiti, isɛ iabo Sirion kube gɔ marɔ sɔ (Xermon kube ana kɔrɛ). 49 Nrɔ̃ mɛ nfere i Yordan ɔwore kuɣɛ̃kabɔrɛkɔ̃, isɛ iabo kato ikɛlɛ Araba Ɔpo kanya i kala isɛ gu Pisga kube sikparuɛ kayirinɔ kɔrɛ ɔɖuɖu ɔbua.