1 Mose ɔɣere Israel mabi sɔ: Si miwarɛ Bosate mi Ɣaa kukaakɔ fiɛ misiai ɔ̃ mmara ɔɖuɖu mɛ lotã mi nɔme kukaakɔ ne, Bosate mi Ɣaa to ɔ̃atara mi ɔsia i kakɔlɛkɔ̃ miɖo nɖebi ɔɖuɖu i karɔ̃ iso. 2 Si miwarɛ Bosate mi Ɣaa ne, kusɛkusɛ ɔɖuɖu gɔgbe aaba i mi iso fiɛ kuasiai mi:

3 Mito miana kusɛkusɛ i ɔmagɛ̃siare ame gu i karɔ̃ iso.

4 Maafere mi kusɛkusɛ sɔ miaɣe mabi ɔsi fiɛ maafere mi ɔraɖui kusɛkusɛ i karɔ̃ iso. Maafere mi mabɔi - manantsuĩ abi gu masɛrɛ abi kusɛkusɛ i wã akuri ame.

5 Maafere mi kasɛsɛ gu ikɔkɔ nɛ ame masɛ makɔtɛ ɔraũ mafere kusɛkusɛ.

6 Maafere mi kusɛkusɛ si mibɔrɛ fiɛ maafere mi kusɛkusɛ si mikpese.

7 Bosate to ɔ̃atã sɔ matsirise ma loata maya i mi iso ne, mato maaɖe ma iso i mi anɔ. Mato mabɔrɛ maba i ibaba iwɛ̃ ɣɛɛ mato matere i mi kɔrɛ i ababa gbodzoo iso makɛlɛ.

8 Bosate to ɔ̃afere mi araɖea kasɛkɔ̃ gu irabiara nɛ iso miasia mi kɔrɔ̃ iso kusɛkusɛ. Bosate mi Ɣaa to ɔ̃afere mi kusɛkusɛ i karɔ̃ ga ɔto ɔtã mi iso.

9 Si mimɔɛ̃ Bosate mi Ɣaa mmara mila fiɛ misɛ i ɔ̃ siri iso ne, Bosate to ɔ̃asɛra mi lɛ ɔ̃ maturi sekelea, lɛ kumɛgɔ ɔɣɛ ɔsɛ ku ndamu. 10 Iyɔ kayiiso maturi ɔɖuɖu to maanya sɔ Bosate iyere sia i mi iso fiɛ mato maanigã mi. 11 Bosate to ɔ̃atã mi ara sɛɛ gbodzoo, miɣe mabi ɔsi fiɛ miana araɖea gbodzoo i karɔ̃ iso gu mabɔi abi gbodzoo ana, i karɔ̃ ga ɔkã ndamu ɔtã mi mawa sɔ ɔ̃atã mi.

12 Bosate to ɔ̃abusi kato gu ɔ̃ ara gbodzoo iyo fiɛ ɔ̃asese kado ɔpɛ ɔfere i karɔ̃ iso i ɔwi iso. Ɔto ɔ̃afere kusɛkusɛ i mi nrɔɔ̃ ame karabara ɔɖuɖu iso. Mito mianyɛ ara mitã nɖebi gbodzoo maturi fiɛ miibawãnyi kuira i kuwɛ̃ kɔrɛ. 13 Bosate to ɔ̃abara mi iti ɣɛɛ iiɖe ɔkã. Si mikã Bosate mi Ɣaa mmara mɛ lotã mi nɔme atsue kukaakɔ fiɛ misiai me ne, mito miasia i kato ɔwi biara miibase i karɔ̃ kuiyikuiyi. 14 Midaasɛnɛkɛ̃ i mmara mɛ lotã mi nɔme kumiwɛ̃ iso, mikɛlɛ kuɖearɔ̃ ɣee kubena iso, sɔ miasiai aɣɔ mama fiɛ miasumu wã.

15 Ne Mose ɔkɛlɛgu i katɔ̃ sɔ: Ɣɛɛ ne, si miiwarɛ Bosate mi Ɣaa fiɛ miisiai ɔ̃ mmara gu asɛ̃ra ɔɖuɖu wa nto lotã mi nɔme iso kukaakɔ ne, sigbarĩ ɔɖuɖu dzɛgbe to siaba i mi iso:

16 Sigbarĩ aaba mi iso i ɔmagɛ̃siare ame fiɛ sigbarĩ aaba mi iso i karɔ̃ ame.

17 Sigbarĩ aaba i mi kasɛsɛ gu ikɔkɔ nɛ ame masɛ makɔtɛ ɔraũ mafere iso.

18 Sigbarĩ aaba i mi iso sɔ miibana mabi miɣe masi fiɛ araɖea ana iibalɛ. Mi manantsuĩ gu masɛrɛ iibaɣe abi masi.

19 Sigbarĩ aaba i mi iso si mibɔrɛ mito mikɛlɛ fiɛ sigbarĩ aaba i mi iso si mikpese mito miba.

20 Bosate to ɔ̃abɔ sigbarĩ i mi iso. Ikpɔkpɔtɔ to iaba fiɛ miana imɔrɛ̃ i irabiara nɛ miasia mi nrɔɔ̃ iso. Ito iaba gbɔgbɔɔgbɔ miawɔ fiɛ miawɔ pelepele ɔluwɛ̃, ala ikpi nɛ mibara gɔ misɛ̃ wũ ɔso. 21 Bosate to ɔ̃asese sinyɛpɛ̃ gbɔgbɔɔgbɔ, ɔwɔra mi i karɔ̃ ga mito miba miabo fiɛ miafɔ iso. 22 Bosate to ɔ̃akpadzɛ̃ ɔnyɛ wɔ loatã mikore ku atikesi gu sosina imumu gu ɔtɔwiri kpaã ɔbɔ i mi iso. Ɔto ɔ̃atã kado iibapɛ, iatã siraɖui dzɛ nɣɛ i karɔ̃ iso ɔbara foe sibu. Ara wagbe aamɔrɛ̃dza mi gbɔgbɔɔgbɔ miwɔ. 23 Kuɖokpo gɔ i mi kato to kuabara lɛ ayiwa loɣa afɔ kato fiɛ karɔ̃ to kaakore lɛ ibɔrakpinaa awe. 24 Bosate to ɔ̃atã kado wɔ loapɛ i mi karɔ̃ iso ɔkpese ɔsebu gu iwarĩ; ato aapɛ abɔrɛ i kuɖokpo gbɔgbɔɔgbɔ miawɔ.

25 Bosate to ɔ̃atã maɖe mi iso i mi matsirise anɔ. Mito miaki i ibaba iwɛ̃ isɛ miba ɣɛɛ mi matsirise ɔso ne mito miarui mitere i ababa gbodzoo iso. Iyɔ ito iabara karɔ̃ sigarakuɖekɔ̃ ɔɖuɖu ɣii si manya nnɛ loba i mi iso. 26 Mi makpise aakpese aɖera matã ɔwiri ame kurodzai gu karɔ̃ iso kuputubɔi. Kuwɛ̃ iibawe ɔ̃anigiridza kɔ̃ fiɛ kuatere. 27 Bosate to ɔ̃atã aramua wa igbã loba i ma Egiptese iso gu akpo gu sosina ikɛkɛ ibara ayɛi gu isowɔrɔ̃ nɛ maibawo ɔsa ɔba i mi iso. 28 Bosate to ɔ̃atã kulala ɔnyɛ gu anɔmi ibiɛ gu adzuni ikpɔkpɔtɔ ɔba i mi iso. 29 Kakɔme kerebee ne, mito mianyɔnyɔ ɔri lɛ nɔbiɛdze awe i idududu ame. Miibana katɔ̃ isɛ i irabiara nɛ miabara ame. Iyi biara ne, maabɔ mi karɔ̃ fiɛ maayu mi, kuwɛ̃ na ɔ̃afɔ mi.

30 Ato aakarɛ ɔrɔ̃go si ayiri ɣɛɛ ɔrɛrɛ̃ mama to ɔ̃asɛ ɔ̃amɔɛ̃ ɔrɔ̃go ɔrɛgu wũ. Mito miatsue iyo ɣɛɛ miibasɛ i ne ame. Mito miakpɛ̃ wainkakpɛkɔ̃ ɣɛɛ wã adziribi iibapɛgu mi kanya kɔraa. 31 Maato maaɖue mi manantsuĩ i mi anɔmi ame ɣɛɛ sina iibapɛgu mi ɔnyagɛmi. Mato maasu ɔfirimu i mi kɔrɛ ku soɔle fiɛ maibakpesera wũ mabɔ. Mato maasu mi masɛrɛrerɔ̃ matã mi matsirise fiɛ kuwɛ̃ iibafɔ ma. 32 Mato maasu mi mabibirɛrɛĩ gu mabibirɔ̃gomi matã kaɖe mama maturi. Gɔ mito mianyɔ ɔri, mianyɔ ɔri siefe sɔ maakpesera ma mabɔ ku ikpɛnɛ biara, kuira na miawo ɔbara. 33 Maturi ma miiɣe to maaɖe mi ɔraɖui, nwɔ lobɔrɛ i mi karabara ame i karɔ̃ iso. Miibana kuira iɖo ɔtile gu iyikaibɔkarɔ̃ mi ayi ɔɖuɖu. 34 Ara wa igbã mianya to atã mikpɔkpɔtɔ i adzuni ame. 35 Bosate to ɔ̃atã aramua wa nsɛ abo so fiɛ ana kua, ɔmu agɛgɛ̃ gu ngba gu mi iso ɔɖuɖu, iɣa ita i iti ikɛlɛ ngbatata iso.

36 Bosate to ɔ̃atã makɔ mi gu mi igara wɔ misɛ, makɛlɛgu karɔ̃ ga miiɣe fiɛ mi mawa ana iiɣe iso. Mmɔ mito miasumu maɣaa mama, aɣɔ wa masu adziri gu ata mabara. 37 Nɖebi ɔɖuɖu mɛ maturi i karɔ̃ ga iso Bosate aasamera mi ɔkɛlɛgu ne, sitsue aabɔrɛ ma ku ifɔ̃. Mato maabara mi aɣiãra fiɛ maama mi.

38 Mito miapia ɔɖui gbodzoo i karɔ̃ ame ɣɛɛ kɛkɛĩ kere miana i kasasakɔ̃, alasɔ kugbadzedzei to kuaɖe wũ. 39 Mito miakpɛ̃ wainkukpɛkɔ̃ fiɛ miabara karabara i kɔ̃ iso ɣɛɛ miibana ndã minɛ ɣee misa aɖedziribi kanya, alasɔ arɔrɛ̃ to aaɖe wã. 40 Nnɔĩ adziri to aawe i mi karɔ̃ ɔɖuɖu iso ɣɛɛ miibabara nnɔĩ iso karabara alasɔ abi to aakpakpase. 41 Mito miawe mabibirɛrɛĩ gu mabibirɔ̃gomi ɣɛɛ miito miamɔɛ̃ ma mila alasɔ mato maakɛlɛ sisande ame. 42 Kugbadzedzei akuri to aafɔ mi adziri ɔɖuɖu gu mi siraɖui dzɛ i mi karɔ̃ iso.

43 Ɔfɔ wɔ nsi i mi kɔrɛ to ɔ̃ana ara ɔbua ɔledza ina ɔbua ɔɖo mi. Ɣɛɛ mito miafɛ̃ miba karɔ̃ miledza karɔ̃ iba. 44 Ɔfɔ to ɔ̃anyɛ sikã ɔtã mi ɣɛɛ miito mianyɛ mitã wũ. Ɔfɔ to ɔ̃aɖe iti ɣɛɛ mito miaɖe ɔkã.

45 Mose ɔɣere Israel mabi sɔ: Sigbarĩ ɔɖuɖu dzɛgbe to siaba i mi iso. Sito siasiai mi simɔɛ̃ mi gbɔgbɔɔgbɔ miawɔ. Ala miiwarɛ Bosate mi Ɣaa, misiai mmara gu asɛ̃ra wa ɔtã mi ɔso. 46 Sigbarĩ ɔɖuɖu dzɛgbe to siaɖe ikparĩ gu ira nɛ mba ɣii, itã mi gu mi ɔkparɛ ɔwi daaro. 47 Ala miisumu Bosate mi Ɣaa ku isoɣɔ gu ilɛlɛ ku ɔwi wɔ mina isaruɛ ɔso. 48 Ne ɔso ne i kukã gu kutukã gu isɔ̃isɛ gu i siwɛrɛba ame ne, mito miasumu matsirise ma i Bosate sɛ ɔsese i mi iso. Ɔto ɔ̃asu ibɔrakpinaa ato ɔsia i mi simɔ iso gbɔgbɔɔgbɔ ɔ̃ɔwɔra mi.

49 Bosate to ɔ̃atã kaɖe dzoroa maturi, i karɔ̃ kawirikɔ̃ isɛ, ɔba maata maya i mi iso, lɛ kumɛgɔ finikpo sɛ ɔso ɔba karɔ̃ ɔmɔɛ̃ ira. Kaɖe ga siɖe miibanɔkarɔ̃. 50 Kaɖe gagbe maturi na nnyainyɔ fiɛ mana kuwarɛ matã ɔkpakpa ɣee maisɛ manyɔ makoso nnya. 51 Mato maawe mi ayomabɔi abi maɖe mi araɖea i karɔ̃ iso gbɔgbɔɔgbɔ miawɔ. Maibakuti mi geɖebu araɖea kuawɛ̃ ɣee ndã ɣɛtɛ ɣee nnɔĩ ɣee manantsuĩ abi kuawɛ̃ ɣee mi masɛrɛ abi i ma akuri ame gbɔgbɔɔgbɔ maabara mi miwɔ. 52 Mato maaki malɔ matɛ̃ mi mapia i ɔmagɛ̃siare biara wɔ i karɔ̃ ame, gbɔgbɔɔgbɔ abere tiria wa lokɔlɛ fiɛ misiaiti i wã iso, to aarɔ̃ i karɔ̃ ɔɖuɖu iso. Matsirise to maaki malɔ matɛ̃ mi simagɛ̃siare ɔɖuɖu mapia, i karɔ̃ ga i Bosate mi Ɣaa to ɔ̃asu ɔtã mi ame.

53 Ala kumɛgɔ i mi matsirise ɔki malɔ matɛ̃ mi mapia i simagɛ̃ ame ɔso ne, mito miaweinyɛ fiɛ mito miawe mi mɔmɔ mabi, mabibirɛrɛĩ gu mabibirɔ̃gomi ma i Bosate mi Ɣaa ɔtã mi somina. 54 Ta ɔrɛrɛ̃ wɔ nto so fiɛ ɔɣɔ, ɔba kayiribielea ɔɖo i mi ndɛ̃, iisito ɔ̃anyɔ ɔ̃ mɔmɔ ɔnyibirɛrɛ̃ ɣee ɔ̃ ɔre wɔ ɔsɛ ɔɖuɛ ɣee ɔ̃ mabi ma mpia ngbã nnya. 55 Ɔ̃ibatã ma ndɛ̃ kuwɛ̃ ɔ̃ ɔbi sosina dzɛ ɔto ɔwe. Ito iaɖe nnɛ ɔɖuɖu ɔba fiɛ ikuti ala inyɛwe nɛ i mi matsirise ɔbɔ i mi iso, ala kumɛgɔ maki malɔ matɛ̃ mi mapia i mi simagɛ̃siare ɔɖuɖu ame. 56 Ɔrɔ̃go wɔ nto so fiɛ ɔɣɔ, ɔba kayiribielea ɔɖo i mi ndɛ̃ - fiɛ ɔto so fiɛ ɔba so sɔ ɔ̃ibasu ɔ̃ kukpatata kunu ɔsia i karɔ̃ iso ɔnya ne - ɔto ɔ̃abara ɔ̃ ɔrã wɔ ɔsɛ ɔɖuɛ gu ɔ̃ mɔmɔ ɔbibirɛrɛĩ ɣee ɔbibirɔ̃gomi ɔyiriɖo 57 i ɔbi wɔ ɔɣe gu kama ara wa lobɔrɛ i ɔɣekoto ame. Ala ɔbara adzuni sɔ ɔ̃awe wã i iwɛrɛ ame, ala kukã gu imɔrɛ̃ nɛ matsirise ɔbɔ i mi iso, i simagɛ̃siare itɛ̃ipia ame ɔso.

58 Si miisiai mmara mɛgbe atɔ̃me ɔɖuɖu, nwa matsɛrɛ mapia i ɔko wɔgbe ame kukaakɔ ne fiɛ miiwarɛ iyere nɛ nɖe ikpawaĩ gu ifɔ̃ra - Bosate mi Ɣaa - 59 Bosate to ɔ̃asese sinyɛpɛ̃ nyanyariã i mi gu mi ɔkparɛ iso. Sito siaɖaa mi gu kukpakpi dzoroo gu sinyɛ dzɛ loabo mi fiɛ siawe i mi iso ina ɔpã. 60 Ɔto ɔ̃akpadzɛ̃ sinyɛ nyanyariã ɔɖuɖu dzɛ igbã, ɔtã siba i ma Egiptese iso, ɔbɔ i mi iso. Sinyɛ dzɛ minigã fiɛ siawe i mi iso miibawo sɛ̃ ɔsa. 61 Bosate to ɔ̃akpadzɛ̃ sinyɛ agbãagbã gu kukpakpi gɔ maitsɛrɛ kuira iso, i Mmara Ɔko wɔgbe ame, ɔbɔ i mi iso gbɔgbɔɔgbɔ miawɔ. 62 Mi ma losi gbodzoo lɛ awãmi i kuɖokpo ne, mi irɛ̃saã kere loana ngbã mikuti alasɔ miiwarɛ Bosate mi Ɣaa. 63 Kumɛgɔ iwe Bosate ɔmɛrɛ̃ fiɛ ɔtã mi mina ara misɛ katɔ̃ fiɛ misi gbodzoo ne, ngbɔ ame ito iawe wũ ɔmɛrɛ̃ sɔ ɔ̃anina mi fiɛ ɔ̃awɔra mi ne. Mato maarui mi maɖi i karɔ̃ ga mito miba miabo mifɔ iso.

64 Iyɔ Bosate to ɔ̃asamera mi mikɛlɛ nɖebi mama maturi ndɛ̃, ita i karɔ̃ kawirikɔ̃ kawɛ̃ ikɛlɛ kamama. Mmɔ mito miasumu maɣaa mama - aɣɔ wa mabara ala adziri gu ata, nwa i mi ɣee mi mawa iiɣe. 65 Miibana kaɣɔ gu isobuɛ, kawãrakɔ̃ kukawɛ̃ na miasia kakpatata. Mmɔ i Bosate to ɔ̃atã sɔ miala miɔtata so i adzuni ame fiɛ miabusi anɔmi i ɔriinyɔ ame siefe fiɛ mi situ to siata siya. 66 Mito miawe i ifɔ̃ ame ɔwi biara fiɛ ito mi ku ikpɛnɛ ku kasɛ̃ ame ɔso, misiina ɔriinyɔ i mi ngbã ame ɖuɖuuɖu. 67 Ku kaya ne mito miaɣɛ sɔ, "Tee kutsuɛ kere ka iɖe fiɛ!" fiɛ ku kutsuɛ ne, miaɣɛ sɔ, "Tee kaya kere ka iɖe fiɛ!" ala ifɔ̃ nɛ loyi i mi situ ame gu ara wa igbã mito minya ɔso. 68 Bosate to ɔ̃akpesera mi ɔkɛlɛgu Egipte karɔ̃ iso, i nduisoabuɛ ame. Irisɛ nɛ loɣɛ sɔ midaasisɛ kuiyikuiyi ana. Mmɔ mito miasu so mirɔdɛ̃ mitã mi matsirise, lɛ marɛrɛ̃ masande gu marɔ̃go masande ɣɛɛ kuwɛ̃ iibaɣa mi.