1 Kiniɔ ne marɛrɛ̃ gu ma mare ɔbiɛ malakulu teteree mata maya i ma manyii ma Yudase iso. 2 Ma mawɛ̃ to maɣɛ sɔ, "Bo gu bo mabibirɛrɛĩ gu mabibirɔ̃gomi ɔsi gbodzoo; ikote sɔ boana geɖebu si boaɖe fiɛ boawe ngbã."

3 Mamama to maɣɛ sɔ, "Boto bosu bo nkpɛkɔ̃ gu wainnkpɛkɔ̃ gu ayo bopia i awoba ame fiɛ boto bona geɖebu boɖe ku kukãsiare ame."

4 Mamama ana ɔkpese mato maɣɛ sɔ, "Ɔnyɛ boto bosɛ boanyɛ sikã fiɛ boto botã igara toto i bo nkpɛkɔ̃ gu wainnkpɛkɔ̃ iti. 5 Atoasɔ sosina siwɛ̃ gu ima iwɛ̃ iɖe bo lɛ bo manyii ma Yudase mama awe fiɛ bo mabi ana se lɛ ma mabi awe ne, ɣɛɛ bo ne inya sɔ boasu bo mabibirɛrɛĩ gu mabibirɔ̃gomi bopia i sisande ame. Bo mabibirɔ̃gomi mawɛ̃ ka maɖe masande koko. Ɣɛɛ kuira na boabara alasɔ bo nkpɛkɔ̃ gu wainnkpɛkɔ̃ ka mipia i maturi mama nrɔɔ̃ ame."

6 Ɔwi wɔ lonɔ ma ibiɛ kulu gu atɔ̃me wagbe ne, lona sikpã gbaã. 7 Losɛ iti ame i wã iso, ne lokidza makpakpaturi gu matɔ̃ɖedze ne. Loɣere ma sɔ, "Mito miɖe mi mɔmɔ manyii amumu!" Ne ɔso lokpere isarɛ siare si lokidza ma. 8 Ne loɣere ma sɔ, "Boɔpia kubɛ lɛ kumɛgɔ ikote boɣa bo manyii ma Yudase mawɛ̃ ma marɔdɛ̃ matã nɖebi mama, boɖi i sisande ame. Kiniɔ ne mito mirɔdɛ̃ mi manyii, kɔraa si maakpese maarɔdɛ̃ ma matã bo!" Malokanana, alasɔ kuira na maawo ɔɣɛ.

9 Ne ɔso lokɛlɛgu i katɔ̃ sɔ, "Nnɛ mito mibara iilɛ. Ikote sɔ miabara ara i bo Ɣaa kunigã ame, si nɖebi mama maturi ma nɖe bo matsirise iibana ɔri wɔ iso maabara bo aɣiãra. 10 Bo gu wũ manyii to bonyɛ sikã gu geɖebu botã maturi. Ɣɛɛ mitã sɔ kusia gbodzoo ifɔ si ituĩ. 11 Mikpesera masose nkpɛkɔ̃ gu wainnkpɛkɔ̃, oliva nkpɛkɔ̃ gu ma ayo mitã ma ɔluwɛ̃. Ana ne mikpesera kusia gbodzoo gɔ mito mifɔ ma - ika kulafa nɛ mifɔ i sikã, geɖebu, ndã, nnɔĩ iso mitã ma."

12 Matã mmuai sɔ, "Boto boabara i nnɛ aɣɛ iso. Boakpesera ara botã ma fiɛ boibakpura ma kuira bobua."

Kere ne lokpere masɔrɛdze lobɔ ne lotã makpakpaturi gu matɔ̃ɖedze ɔkã ndamu sɔ maabara i nnɛ maɣɛ masɛ iso. 13 Lokpakpa wũ awu tagbaraa kafɛ̃siakɔ̃ ana ne loɣɛ sɔ, "Ɔturi biara wɔ loasɛ̃ ɔ̃ibabara i ndamu iso ne, Ɣaa si ɔkpakpa nwɔmɔ ɔɖi i ɔ̃ iyo gu ɔ̃ karana ɔɖuɖu ame lɛgbe. Ngbɔ si makpakpa ɔturi wɔmɔ igbã ara maɖi si ɔse ikunu!"

I nnɛgbe kanya ne, iturikuri ɔɖuɖu ɔtɔrã masia iso sɔ, "Si iba ngbɔ," ne male Bosate. Ne maturi ɔbara lɛ kumɛgɔ maɣɛ masɛ ne.

14 Ita i ɔwi wɔ masɛra me lɛ ma Yudase nyoisose i Yuda karɔ̃ iso ne, lobara karabara gagbe akɔ aweo-anyɔ. Ita i igara Artaxsasta sigara ɔɖewi ikɔ sinyɔva ame isɛ iabo ɔ̃ ikɔ sitɛinyɔare ame. Ɣɛɛ i akɔ wagbe ame ne, mme oo, wũ manyii oo pelepele ne, boiɖe araɖea wa masɛ mato matã nyɔisose. 15 Ɣɛɛ mma loɔɖe manyɔisose maɖe me katɔ̃ ne, makpese ato siare masia i kaɖe iso. Mafɔ sikãfudza abi sina isu ibua i araɖea gu ndã wa i kaɖe sɛ katã iso. Ma maɖabo ana kɔraa ɔɔsakara so mapia kaɖe. Ɣɛɛ mme ne, loibara ara wamɔ ala Ɣaa kunigã gɔ mpia i wũ ame ɔso. 16 Ne kanya ne, losu so lopia i ibere itsue karabara ame. Ne wũ marɛrɛ̃ ɔɖuɖu ɔsakanya i mmɔ matã karabara, boiɣa karɔ̃ kukawɛ̃ botã so. 17 Isu ibua ne, maturi kulafa kuwɛ̃ gu siru ma loɖe ma Yudase gu matɔ̃ɖedze ɔɖe ara i wũ kɔrɛ, ibua ne ngbɔ ame i mma lobɔrɛ i nɖebi mɛ loki milɔ bo kɔrɛ si maba ana ne. 18 Iyi biara ne ara wa nsɛ lotã ɔɖe nantsuĩrɛrɛ̃ ɔwɛ̃, masɛrɛrerɔ̃ ma mba iɖa maɖo ikuɔ, makɔkɔ gu iyomarodza gbodzoo mala maɔwa maɔtã me. Ayi aweo biara kama ne, loɣa ndã agbã gbodzoo losɛ. Ɣɛɛ i ara ɔɖuɖu wagbe ame kɔraa ne, loitã kaɖe ɔtã me nyoisose araɖea wa ikote sɔ maatã me kuiyikuiyi, alasɔ lonya sɔ ato ɔsi i maturi magbe iso gbaã.

19 O wũ Ɣaa, nyigi me si wũ ara si abo-ɔ anɔ i ara ɔɖuɖu wa loɔbara lotã maturi magbe iti.