2 SAMUEL 2

Masɛra David Sigara I Yuda

1 I Saul gu Yonatan kukpi kama ne, David ɔkarɛ Bosate sɔ, "Loya lokɛlɛ Yuda ɔmagɛ̃ ɔwɛ̃ ame?"

Ne Bosate ɔɣere wũ sɔ, "Ya kɛlɛ."

Ne David ɔkarɛ sɔ, "Lɛ si lokɛlɛ?"

Ne Bosate ɔɣere wũ sɔ, "Kɛlɛ Xebron."

2 Ne ɔso David ɔya ɔkɛlɛ Xebron ku ɔ̃ mare inyɔ ɔɖuɖu, Axinoam wɔ lobɔrɛ i Yezrel gu Abigail wɔ loɖe Nabal, Karmelse wɔ loɔkpi ɔre. 3 Ɔkɔ marɛrɛ̃ ma lowegu wũ, ɔbiara gu ɔ̃ iyomaturi masɛ maasɛ i Xebron gu simagɛ̃ dzɛ loki silɔ mmɔ ame. 4 Ne Yuda marɛrɛ̃ ɔba Xebron maba maasɔla David nnɔĩ sɔ ɔɖe sigara i Yuda iyo iso ne.

Gɔ maɣere David sɔ Yabes Gilead marɛrɛ̃ lobiara Saul ne, 5 David ɔpia makpabo Yabes Gilead marɛrɛ̃ kɔrɛ sɔ masɛ maaɣere ma sɔ, "Bosate si ɔfere mi kusɛkusɛ ala kayiribielea ga miɖi mite mi ɔkɔse Saul gɔ mibiara wũ ɔso. 6 Kiniɔ ne, Bosate si ɔnyɔ mi nnya ɔɖe ɔnukuare ɔtã mi, fiɛ mme wũ mi ara aabo me anɔ ngbɔ ala nnɛ mibara ɔso. 7 Kiniɔ ne, mina ɔtu si miwe kagbegbe alasɔ mi ɔkɔse Saul ɔɔkpi, fiɛ Yuda maturi ɔɔsɛra me sigara."

Masɛra Isboset Sigara I Israel

8 Ɣɛɛ i ɔwi wɔgbe ame ne Abner wɔ nɖe Ner ɔbibirɛrɛĩ fiɛ ɔɖe Saul makpakpɛ̃dze ɔkpakpa ɔkɔ Saul ɔbibirɛrɛĩ Isboset ɔkɛlɛgu Maxanayim. 9 Ɔsɛra wũ sigara i Gilead gu Asuri gu Yezreel, i Efrayim ana gu Benyamin gu Israel ɔɖuɖu iso.

10 Isboset wɔ loɖe Saul ɔbibirɛrɛĩ ɔfɔ akɔ sina fiɛ masɛra wũ sigara i Israel, fiɛ ɔɖe sigara akɔ anyɔ. Yuda iyo ɣɛɛ ne, masiai David. 11 David ɔɖe sigara i Xebron i Yuda iyo iso akɔ akɔdzɛ gu awa akuɔ.

Kakpã Ga Loba I Israel Gu Yuda Ndɛ̃

12 Iyi iwɛ̃ ne, Abner wɔ nɖe Ner ɔbibirɛrɛĩ gu Isboset wɔ nɖe Saul ɔbibirɛrɛĩ makpakpɛ̃dze ɔbɔrɛ i Maxanayim makɛlɛ Gibeon. 13 Yoab wɔ ɔnyi loɖe Zeruya gu David makpakpɛ̃dze ɔbɔrɛ masɛ maasarɛgu ma i Gibeon ibu kanya. Ikuri iwɛ̃ ɔsɛ i ibu kasɛ kawɛ̃, mma ana ɔsɛ i kasɛ nyɔare.

14 Ne Abner ɔɣere Yoab sɔ, "Tã botã maporoporoi ɔgba si mate ma sirɛrɛ̃ i bo anɔ."

Ne Yoab ɔtã mmuai sɔ, "Ilɛ, tã ma ɔri."

15 Ne ɔso mata maya ne maka marɛrɛ̃ iweo-inyɔ maɖi i Benyamin gu Isboset, Saul ɔbibirɛrɛĩ kasɛ fiɛ maka iweo-inyɔ ana maɖi i David kasɛ. 16 Ma ɔbiara ɔmɔɛ̃ ɔ̃ ɔlaa i iti, ɔtsue wũ itekpe i iwãgɛsɛ ne ma ɔɖuɖu ɔrɔ̃ makpi ne. Ne ɔso masɛ marɔ mmɔ i Gibeon sɔ Xelkat-xazurim.*2.16 Xelkat-xazurim: Atekpe karɔ̃

17 Kakpã ga losiai ɔwe ɔle ku iyi nɛmɔ, David makpakpɛ̃dze ɔɖe Abner gu Israel makpakpɛ̃dze iso.

18 Zeruya mabibirɛrɛĩ itɛ ɔɖuɖu ɔwe i mmɔ ma nɖe Yoab, Abisai gu Asaxel. Asaxel ɔla ɔ̃atere ise lɛ kasɔlɔ. 19 Asaxel ɔtere ɔsiai Abner gɔ ɔ̃imani ɔki i kuɖearɔ̃ ɣee kubena.

20 Abner ɔfiriki ɔnyɔ wũ ne ɔkarɛ sɔ, "Fɔ aɖe i mmɔ, Asaxel?"

Ne ɔtã mmuai sɔ, "Mme loɖe."

21 Ne Abner ɔɣere wũ sɔ, "Firiki kɛlɛ kuɖearɔ̃ ɣee kubena iso, tere siai ɔporoporoi mama i kama si aɖoe wũ afɔ ɔ̃ akpakpɛ̃ra bowũ." Ɣɛɛ Asaxel iikpese itere isiai wũ i kama.

22 Abner ɔledza isɛ̃ itã Asaxel sɔ, "Kpese me i kama, si atã loɖoe-ɔ ne, loibawo fɔ nyiibi Yoab ɔnyɔ i katɔ̃."

23 Ɣɛɛ Asaxel ɔsɛ̃ sɔ ɔ̃ibakpese, ne ɔso Abner ɔsu ɔ̃ ifele ɔdziri ɔtuĩ wũ i kayiri ɔbɔrɛ wũ i kama ɔbɔrɛ ɔrɔ̃ i mmɔ ɔkpi ɔluwɛ̃. Si kpakpɛ̃dze biara ɔbo ngbegɔ i Asaxel ɔrɔ̃ kakpã ne, ɔtuĩ.

24 Ɣɛɛ Yoab gu Abisai ɔtere masiai Abner fiɛ gɔ kuɣɛ̃ ka kuto kubo iyo ne, maba maabo Amma kabemi iso i Gia kɔrɛ i ɔri wɔ nkpa Gibeon karɔ̃kpia iso. 25 Benyamin makpakpɛ̃dze ɔki maya Abner i kama. Mapɛ ibo mamini Abner i kabemi itititɛ̃.

26 Ne Abner ɔkpere Yoab ɔɣɛ sɔ, "Ipɛmi si iwɔra maturi kayi daaro? Aito atsue sɔ nnɛgbe to iawiri i kaɖo ame ɣɛɛ? Ku me ɔwi aaɣere fɔ makpakpɛ̃dze sɔ makpese i ma manyii Israel mabi i kama?"

27 Ne Yoab ɔtã mmuai sɔ, "Lotarĩgu Ɣaa sɔ si adaakpere me ne, tee wũ makpakpɛ̃dze aatere masiai ma gbɔgbɔɔgbɔ kaɖe aasɛ̃."

28 Ne ɔso Yoab ɔfɛ̃ kadadã, ne makpakpɛ̃dze ɔɖuɖu ɔtuĩ fiɛ maisitere masiai ma manyii Israel mabi ɣee makpɛ̃gu ma.

29 Kasɛ̃ gamɔ ɔɖuɖu ne, Abner gu ɔ̃ makpakpɛ̃dze ɔsɛ maki i Araba, mawara Yordan ɔwore masɛ makɛlɛ i katɔ̃ maki i Bitron ɔɖuɖu ka masɛ maabo Maxanayim.

30 Ne Yoab ɔkpese Abner i kama fiɛ ɔsa makpakpɛ̃dze kanya ne. Asaxel kama ne, David makpakpɛ̃dze iweo-kaiwɛ̃ loyu. 31 Ɣɛɛ David makpakpɛ̃dze ɔɖoe ma Benyaminse alafa atɛ gu sikuɔ ma lowegu Abner. 32 Masu Asaxel kpise masɛ maabiara i ɔ̃ ɔse ikpibiɔ ame i Betlehem. Ne Yoab gu ɔ̃ maturi ɔsɛ kasɛ̃ ɔɖuɖu masɛ maabo Xebron ku ɔɖesɛrã ne.