1 Gɔ Isboset, Saul ɔbibirɛrɛĩ ɔnɔ sɔ maɖoe Abner i Xebron ne, ɔtu ɔkpa wũ fiɛ Israel ɔɖuɖu ana ɔti. 2 Saul ɔbi ɔwe marɛrɛ̃ inyɔ ma loɖe ma maturi katɔ̃ masɛ maata mabo maturi iso mafɔ ma ara. Ɔwɛ̃ marɔ Baana fiɛ ɔnyɔare loɖe Rexab. Rimon wɔ lobɔrɛ i Beerot fiɛ ɔɖe Benyamin kamele ɔturi mabibirɛrɛĩ maɖe - masɛ manyɔ Beerot lɛ Benyamin kakpai, 3 alasɔ Beerot maturi ɔtere makɛlɛ masɛ maasɛ i Gitayim lɛ mafɔfiɛ masi i mmɔ lɛ mafɔ ipɛ i ɔwi wɔ matsɛrɛ ara wagbe.

4 (Yonatan, Saul ɔbi ɔwe ɔbibirɛrɛĩ ɔwɛ̃ wɔ loɖe bafã i ngba me minyɔ ɔɖuɖu. Ɔfɔ akɔ aru fiɛ maturi ɔbɔrɛ i Yezrel maba maaɣɛ sɔ Saul gu Yonatan ɔkpi i kakpã ame. Ɔbinyɔisose ɔputa wũ sɔ si ɔtere, ɣɛɛ gɔ ɔto ɔtere ku siwa ne, ɔbi ɔkpase, ne ɔkpese bafã ne. Ɔ̃ iyere loɖe Mefiboset ne.)

5 Rekab gu Baana ma nɖe Rimon wɔ lobɔrɛ i Beerot mabibirɛrɛĩ ɔɣo Isboset iyo ɔri masɛ maabo mmɔ kuɣɛ̃ kerebee gɔ ɔrɛ ku kakɔme ɔto ɔwarã kɛkɛĩ. 6 Mabo makɛlɛ iyo kame lɛ atitabi maaka, ne matsue wũ ipɛmi i iyiri maɖoe. Ne Rekab gu ɔ̃ ɔnyiibi Baana matere iwɛrɛ ne.

7 Maɔkɛlɛ iyo gɔ ɔrɛ i ɔ̃ karɛkɔ̃ iso i irɛyo ame. Gɔ matsue wũ ipɛmi maɖoe maro ne, matu wũ iti maruigu, masɛ ɔri kasɛ̃ ɔɖuɖu maki Araba ɔri. 8 Masu Isboset iti mabɔ David i Xebron maba maaɣere igara sɔ, "Nya Isboset, Saul wɔ nɖe fɔ tsirise fiɛ ɔbie sɔ si ɔɖoe-ɔ ɔbibirɛrɛĩ iti i ngbe ne. Nɔme ne, Bosate ɔɔti Saul gu ɔ̃ ɔɣekparɛ kuso i nnɛ mabara wũ ɔkɔse igara iti."

9 Ne David ɔtã Rekab gu ɔ̃ ɔnyiibi Baana, Rimon wɔ lobɔrɛ i Beerot mabibirɛrɛĩ mmuai sɔ, "Ayi kumɛgɔ i Bosate wɔ loɖi me ɔbɔrɛgu i wũ amɔrɛã ɔɖuɖu ame si ngbã ne, 10 gɔ ɔturi ɔba ɔ̃aɣere me sɔ, 'Saul ɔkpi' fiɛ ɔbu sɔ itɔ̃me sɛɛ iɖe ɔbɔ me ne, lomɔɛ̃ wũ sikiti loɖoe wũ i Ziklag. Ne loɖe kuso gɔ lotã wũ i ɔ̃ itɔ̃me iti ne! 11 Ne iyɔ nda loabara matilese ma lomɔɛ̃ ɔturi wɔ loibara ma ku ikpi i ɔ̃ iyo i ɔ̃ karɛkɔ̃ iso maɖoe wũ- loibakarɛ ɔ̃ ima iti lobɔrɛgu i ma nrɔɔ̃ ame loyura ma i kayi gagbe iso!"

12 Ne ɔso David ɔtã ɔ̃ maturi silɔ ne maɖoe ma, matu ma nrɔɔ̃ gu ngba matara ma masa i ibu iwɛ̃ kɔrɛ i Xebron. Ɣɛɛ masu Isboset iti mabiara i Abner ibiɔ ame i Xebron.