1 Bosate ɔpia Natan David kɔrɛ. Gɔ ɔba ne, ɔɣere David sɔ, "Marɛrɛ̃ inyɔ ɔwe i ɔmagɛ̃ ɔwɛ̃ ame, ɔwɛ̃ ɔwe ara fiɛ ɔwɛ̃ ɔɖe wɛrɛba. 2 Ranase ɔwe masɛrɛ gu manantsuĩ gbodzoo, 3 ɣɛɛ wɛrɛba iiwe kuira iɖo sɛrɛrerɔ̃ibirɔ̃go iwɛ̃ nɛ ɔɣa. Ɔkãrarã ne fiɛ imɔ ku wũ gu ɔ̃ mabi. Ma gu ne loɖe aɖera manɛ i ikɔi iwɛ̃ ame fiɛ ila irɛ i ɔ̃ nrɔɔ̃ ame. Ise wũ kere lɛ ɔbibirɔ̃gomi.

4 "Kiniɔ ne iba sɔ risɛdze ɔwɛ̃ ɔba ranase kɔrɛ, ɣɛɛ ɔ̃imɔɛ̃ ɔ̃ mɔmɔ sɛrɛrerɔ̃ ɣee nantsuĩ ɔɖoe ɔwa araɖea ɔtã ɔfɔ. Ɣɛɛ ne, ɔmɔɛ̃ wɛrɛba isɛrɛbi ɔɖoe ɔbara ala sifɔ."

5 Sikpã ɔmɔɛ̃ David gbaã i ranase wɔmɔ iso ɔɣere Natan sɔ, "Lokã Bosate wɔ mpia ngbã sɔ ɔrɛrɛ̃ wɔ lobara ira nɛgbe ne, ikote sɔ ɔ̃akpi! 6 Ikote sɔ ɔ̃atã isɛrɛbi kuso ikpɛ ina ala nnɛ ɔbara fiɛ iikpɛ̃ wũ nnya ɔso."

7 Ne Natan ɔɣere David sɔ, "Fɔ nɖe ɔrɛrɛ̃ wɔmɔ! Bosate wɔ nɖe Israel Ɣaa sɔ, 'Losɔla-ɔ nnɔĩ lɛ igara i Israel kaɖe iso, fiɛ loɖi-ɔ lobɔrɛgu i Saul nrɔɔ̃ ame. 8 Losu mi ɔkɔse iyo lotã-ɔ fiɛ losu mi ɔkɔse mare lopia-ɔ i nrɔɔ̃ ame. Losu Israel iyo gu Yuda lotã-ɔ. Ne si nwagbe ɔɖuɖu iisi-ɔ ne, tee loatã-ɔ ara lobua. 9 Be ɔso aipia Bosate itɔ̃me kuwarɛ fiɛ abara ikpi i ɔ̃ anɔ? Awuĩ Uria, Xitise ala ipɛmi, ne asu ɔ̃ ɔre akpesera fɔ ɔre. Aɖoe wũ ala ma Amonse ipɛmi. 10 Ne ɔso kiniɔ ne, ima ifere i karɔ̃ ku ipɛmi iisibaro i fɔ iyo alasɔ aiwarɛ me, afɔ Uria ɔre akpesera fɔ mɔmɔ ɔre.'

11 "Bosate sɔ, 'I fɔ mɔmɔ iyo ame ne, loatara itikpi lopia-ɔ iso. I fɔ mɔmɔ anɔmi ame ne, loatara fɔ mare lotã ɔwɛ̃ wɔ lobore ɔmatã-ɔ fiɛ ɔ̃arɛgu ma ku kakɔme kerebee i ɔgbami. 12 Abara fɔ ɔkpɛ i iwɛrɛ ame, ɣɛɛ loabara nnɛgbe ku anɔwã i Israel ɔɖuɖu anɔ.' "

13 Ne David ɔɣere Natan sɔ, "Lobara ikpi i Bosate iso."

Ne Natan ɔtã wũ mmuai sɔ, "Bosate ɔɔsu fɔ ikpi ɔtsɛ-ɔ, aibakpi. 14 Ɣɛɛ gɔ abara nnɛgbe ne ɔɔtã sɔ Bosate matsirise si manyɔ wũ pupurii, ɔbibirɛrɛĩ wɔ maaɣe matã-ɔ to ɔ̃akpi."

15 Gɔ Natan ɔɔkɛlɛ ɔ̃ iyo kama ne, Bosate ɔsu inyɛpɛ̃ ɔpia i Uria ɔre ɔbi wɔ ɔɣe ɔtã David iso.

16 David ɔtã Ɣaa iti i ɔbi iti. Ɔnyikanya, kasɛ̃ ɔɖuɖu ne ɔrɛ i karɔ̃ kunu. 17 Ɔ̃ iyomaturi makpakpa ɔba maapɛ wũ nrɔɔ̃ sɔ ɔta i karɔ̃, ɣɛɛ ɔsɛ̃ fiɛ ɔsɛ̃ ana sɔ ɔ̃ito ɔɖegu ma aɖera.

18 Ikpɛnɛ kɔdzɛva ne, ɔbi ɔkpi. David maɖabo ɔnigã sɔ maaɣere wũ sɔ ɔbi ɔkpi, alasɔ mabu sɔ, "Si ɔwi wɔ i ɔbi iikpi fiɛ ɔsɛ̃ sɔ ɔ̃ito ɔkã bo atsue ne, nda boabara fiɛ boaɣere wũ sɔ ɔbi ɔɔkpi? Ɔto ɔ̃abara so iraboa."

19 David ɔnya sɔ ɔ̃ maɖabo to maɣere so siwɔwɔi, ne ɔso ɔtsue sɔ ɔbi ɔɔkpi. Ne ɔkarɛ ma sɔ, "Ɔbi ne ɔkpi ɔ̃ɔkpi?'

Ne matã wũ mmuai sɔ, "Aĩ, ɔ̃ɔkpi."

20 Ne David ɔta i karɔ̃. Ne ɔsɛ ɔ̃apie ndu, ɔsɔla nnɔĩ, ɔfirikira ɔ̃ awu. Ne ka ɔkɛlɛ ikpayo nɛ ɔɣedza ɔtã Ɣaa ndamu aɖaka ame, ɔsɛ ɔ̃asumu. Ne ka ɔkɛlɛ ɔ̃ iyo ne ɔkarɛ araɖea fiɛ matã wũ ɔɖe ne.

21 Ne ɔ̃ maɖabo ɔkarɛ wũ sɔ, "Be iɖe ato abara i ngbe ne? Gɔ ɔbi ɔwe ngbã ne, anyikanya, abiɛ, ɣɛɛ kini gɔ ɔbi ɔɔkpi ne, ɔɔta aɖe ara!"

22 Ne ɔtã mmuai sɔ, "Gɔ ɔbi ɔwe ngbã ne, lonyikanya fiɛ lobiɛ ala lobu sɔ, 'Siainyɔ Bosate to ɔ̃anyɔ me nnya ɔtã ɔbi ɔwe ngbã.' 23 Ɣɛɛ kiniɔ gɔ ɔ̃ɔkpi ne, be ɔso loakɛlɛ i katɔ̃ lonyikanya? Loawo wũ ɔkpesera ɔbɔ ngbã? Mme ka loakɛlɛ ɔ̃ kɔrɛ, ɔ̃ ne ɔ̃isibakpese ɔba i wũ kɔrɛ."

24 Ne David ɔpia ɔ̃ ɔre Batseba kɔrɔ̃ i kayiri ɔsɛ ɔ̃ kɔrɛ ne ɔrɛgu wũ. Ɔɣe ɔbibirɛrɛĩ ɔtã wũ, ne ɔsia wũ sɔ Solomon. Bosate ɔɖɔɛ wũ; 25 gɔ Bosate ɔɖɔɛ wũ ɔso ne, ɔpia kanyaɖidze Natan sɔ ɔsɛ ɔ̃asia wũ iyere sɔ Yedidia.*

26 I ɔwi wɔgbe ame ne Yoab ana ɔkɛlɛgu i katɔ̃ ɔkpɛ̃gu Raba wɔ loɖe ma Amonse igarakpakpa ɔmagɛ̃siare. 27 Ne Yoab ɔpia David makpabo sɔ maɣere wũ sɔ, "Loɔkpɛ̃gu Raba lomɔɛ̃ ma ndu kaɖukɔ̃. 28 Kiniɔ ne, sira makpakpɛ̃dze tsɔra kanya si miki milɔ ɔmagɛ̃siare si mimɔɛ̃ wũ. Si iiɖe ngbɔ si lomɔɛ̃ ɔmagɛ̃ ne, iyɔ mme loafɔ iyere."

29 Ne ɔso David ɔsira makpakpɛ̃dze ɔɖuɖu kanya masɛ maakpɛ̃gu Raba mamɔɛ̃ ɔmagɛ̃. 30 David ɔfɔ ma igaraikoto nɛ nfu i ma igara iti. Sikãrɛtɛa kukereme ɔɖe kilo sitɛ-ina masu mabaragu ala fiɛ masu ata wa lofɔ kuɣa makɛrɛ ne ala - ne masu matɔmedza David. David ɔsore kakpãramɔɛã titiiti ɔbɔrɛgu i ɔmagɛ̃siare wɔmɔ ame. 31 Ɔkɔ maturi ɔɖuɖu ɔbɔrɛgu i ɔmagɛ̃siare ame ɔkpesera ma masande ma loasu saa gu awoɖikpuã gu kuɣɛ, ne ɔtã mabara karabara i biriks itu ame. David ɔbara ma Amonse simagɛ̃ ɔɖuɖu ngbɔ, ne kama ne, ma gu ɔ̃ makpakpɛ̃dze ɔɖuɖu ɔkpese makɛlɛ Yerusalem.