2 SAMUEL 10

David Ɔɖe Ma Amonse Gu Ma Aramse Iso

1 I ɔwi kama ne, ma Amonse igara ɔkpi, ne ɔ̃ ɔbibirɛrɛĩ Xanun ɔsɛ i ɔ̃ ɔse kanya ne. 2 David ɔɣere so sɔ, "Loabara Naxas ɔbibirɛrɛĩ Xanun kayiribielea lɛ ɔ̃ ɔse ɔbara me." Ne ɔso David ɔsese maturi sɔ masɛ maabiɛgu Xanun i ɔ̃ ɔse kukpi iti.

Gɔ i David marɛrɛ̃ ɔba ma Amonse karɔ̃ iso ne, 3 ma Amonse makpakpɛ̃dzekpakpa ɔkarɛ ma ɔkɔse Xanun sɔ, "Abu sɔ David to ɔwarɛ fɔ ɔse ɔso ɔpia maturi sɔ maba maabiɛgu-ɔ? Iiɖe ɔpia ɔpia ma i fɔ kɔrɛ sɔ maba maayu bo ɔmagɛ̃ manyɔ si maaba maabiɛ wũ?" 4 Ne ɔso Xanun ɔmɔɛ̃ David maturi ma ɔpia katɔ̃me ɔkparɛ̃ ma sikore kasɛ, ɔtu ma awu i amɔrɛsɛ ndɛ̃ ɔkpesera ma ɔsese.

5 Gɔ David ɔnɔ nnɛ loba ne, ɔpia maɖabo sɔ masɛ maatu marɛrɛ̃ mabge i ɔri alasɔ mapia ma kunuarɛ gbaã. Igara ɔɣere ma sɔ, "Miwe i Yeriko gbɔgbɔɔgbɔ mi sikore aayi iyɔ si miakpese miba kaa."

6 Gɔ ma Amonse ɔnya sɔ maɔpia David sikpã ne, matã sikã mafɔ ngbaiso makpakpɛ̃dze kukpi sinyɔ i ma Aramse kɔrɛ i Bet Rexob gu Zoba, Maaka igara ana ɔtã makpakpɛ̃dze kakpi kawɛ̃ fiɛ makpakpɛ̃dze kukpi kuweo-kunyɔ ana ɔbɔrɛ i Tob.

7 Gɔ David ɔnɔ nnɛgbe ne, ɔsese Yoab gu marɛrɛ̃ ma ɔɖuɖu loɖe makpakpɛ̃dze si masɛ maakpɛ̃ ma. 8 Ma Amonse ɔbɔrɛ maba maaya i kakpã katɔ̃ i ma ɔmagɛ̃siare kayogodɔ̃ kabɔrɛnya, gɔ i ma Aramse ma lobɔrɛ i Zoba gu Rexob gu marɛrɛ̃ ma lobɔrɛ i Tob gu Maaka ma wũ maɣedza so i karɔ̃ ndɛ̃.

9 Yoab ɔnya sɔ tsirise makpakpɛ̃dze ɣɛ wũ i katɔ̃ gu kama, ne ɔso ɔɖi makpakpɛ̃dze sɛɛ i Israel sɔ mayagu ma Aramse. 10 Ɔsu makpakpɛ̃dze tsɔra ɔpia i ɔ̃ ɔnyiibi Abisai kayirinɔ fiɛ ɔtã mayagu ma Amonse. 11 Yoab ɔɣere ɔ̃ ɔnyiibi sɔ, "Si ma Aramse to mawe ɔle maɖo me ne, babuai me, ɣɛɛ si ma Amonse to mawe ɔle maɖo-ɔ ne, loaba loabuai-ɔ. 12 We ɔle, si atã bokpɛ̃ botã bo maturi ku kagbegbe gu bo Ɣaa simagɛ̃siare. Bosate to ɔ̃abara nnɛ loabo wũ anɔ."

13 Gɔ Yoab gu ɔ̃ makpakpɛ̃dze ɔta mato mabo si makpɛ̃gu ma Aramse ne, matsɛ irui itere i Yoab kanya. 14 Gɔ ma Amonse ɔnya sɔ ma Aramse ɔɔtsɛ itere ne, ma wũ matere i Abisai kɔrɛ mabo i ma ɔmagɛ̃siare ame. Ne ɔso gɔ Yoab ɔsɛ ɔ̃akpɛ̃gu ma Amonse ɔro ne, ɔkpese ɔba Yerusalem.

15 Gɔ ma Aramse ɔnya sɔ Israel ɔɖe ma iso kama ne, makpese masikanya. 16 Xadadezer ɔtã makpere ma Aramse makpakpɛ̃dze ma i Frat ɔwore kama isɛ mabɔ fiɛ makɛlɛ Xelam. Sobak wɔ loɖe Xadadezer kpakpɛ̃dzekpakpa loɖe ma katɔ̃.

17 Gɔ maɣere David nnɛgbe ne, ɔsira Israel ɔɖuɖu kanya, mawara Yordan ɔwore makɛlɛ Xelam. Ma Aramse ɔbara ma kakpã katɔ̃ kuyakɔ̃ gɔ maasarɛgu David i kakpã ame. 18 Ɣɛɛ ma Aramse matere i Israel kanya fiɛ David ɔɖoe mma nsi i kubore iso alafa akɔdzɛ gu makpakpɛ̃dze ma nsɛ ngba kukpi sina. Ɔwuĩ Sobak wɔ loɖe makpakpɛ̃dzekpakpa i karɔ̃ ɔkpi i mmɔ. 19 Gɔ magara ma ɔɖuɖu lowe i Xadadezer kayirinɔ ɔnya sɔ Israel ɔɔɖe ma iso ne, manyigu Israel isobuɛ kanya makpese ma maɖabo.

Ita i ɔwi wɔmɔ ne, ma Aramse ka mala maɔnigã sɔ maabuai ma Amonse ana.