1 David ɔka kuka gɔgbe atɔ̃me ku ɔwi wɔ i Bosate ɔɖi wũ i ɔ̃ matsirise ɔɖuɖu nrɔɔ̃ ame gu i Saul nrɔɔ̃ ame. 2 Ɔɣɛ sɔ,

"Bosate nɖe wũ itasiare, wũ ɔlekasɛkɔ̃ gu wũ fɔdze;

3 wũ Ɣaa nɖe wũ itasiare, ɔ̃ lotarĩgu,

wũ akpiraifɔra gu wũ iɖi ɔle.

Ɔ̃ nɖe wũ ɔlekasɛkɔ̃, wũ katarikɔ̃ gu wũ ɖidze -

aɖi me abɔrɛgu i maturi nyanyariã nrɔɔ̃ ame.

4 Lokpere Bosate, nwɔ lokote ɔtã ile,

ne lona iɖi lobɔrɛgu i wũ matsirise nrɔɔ̃ ame.

5 "Kukpi sipotutaa ɔki silɔ me;

iwɔ nduborea teteree ɔmɔɛ̃ me mito.

6 Ikpibiɔ awɛĩ ɔmini me ato;

fiɛ kukpi iyebi ɔgbere ise me.

7 Lokpere Bosate i wũ isoma ame;

lokpere wũ Ɣaa si ɔbuai me.

Ɔnɔ wũ silɔ i ɔ̃ isɔrɛyo ame;

wũ kaku ɔbo wũ i atsue ame.

8 "Karɔ̃ ɔti kasɛ kakpese,

kato sikaĩ ɔti;

siti sikpakpa alasɔ ɔna sikpã.

9 Kuyɔ ɔbɔrɛ i ɔ̃ ɔɣɔ̃ ame;

ne ɔtɔ sinyagɛmi ɔbɔrɛ i kanya ame,

fiɛ akaĩ wa lomɔɛ̃ ato ɔbɔrɛ i kã ame.

10 Ɔkɛ kato ɔso ɔba karɔ̃;

adɔdɔ kpinakpina ɔwe i ɔ̃ ngba kayirinɔ.

11 Ɔta ɔsɛ i kerubi iso ne ɔfɛrɛrɛ ne;

ɔkɛlɛ kato i ɔwiri abue iso.

12 Ɔpia so idududu lɛ ɔ̃ ikatigbɔdɔ ɔki ɔlɔ so -

kado adɔdɔ kpirikpiria i kuɖokpo.

13 Ikpawaĩ ɔfiɛ iki ilɔ wũ

ikpawaĩ lɛ ɔtɔ imama ɔsa ibɔrɛ.

14 Bosate ɔɖi silɔ i kato lɛ kadoiɖu;

Nwɔ Lokɔlɛ ɔɖo silɔ ɔre.

15 Ɔpɛ mirɛ̃ ne ɔsamera ɔ̃ matsirise,

ɔpɛ ɔtɔ imama ɔsamera ma matere.

16 Gɔ Bosate ɔna sikpã,

fiɛ ɔwarã teteree ɔbɔrɛgu i ɔɣɔ̃ ame ne,

ɔpo ame kugbolomi ɔse wawe

ne karɔ̃ sikaĩ ɔse kpawee ne.

17 "Ɔso ɔbɔrɛ i kato ne ɔɖi kɔrɔ̃ ɔmɔɛ̃ me ne;

ɔkpadzɛ̃ me ɔɖi i ndu wodoroa ame.

18 Ɔfɔ me ɔbɔrɛgu i wũ matsirise ma mba ɔle nrɔɔ̃ ame,

ɔfɔ me ɔbɔrɛgu i wũ makpɛ̃guse ma mba ɔle kaɖu nrɔɔ̃ ame.

19 Mabo me iso ku iyi nɛ lobo imɔrɛ̃ ame,

ɣɛɛ Bosate loɖe wũ buaidze.

20 Ɔkɔ me ɔbɔ kakɔĩ ga lowarɛ;

ɔɖi me alasɔ lobo wũ anɔ.

21 "Bosate ɔɔtã me kuso i wũ sibɔlɔlɔ iti;

ɔ̃ɔtã me kuso i kumɛgɔ wũ nrɔɔ̃ ame ɔkpa iti.

22 Ala loɔmɔɛ̃ Bosate siri lola ɔso.

Loibara ikpi iki i wũ Ɣaa isɛ̃ ame.

23 Ɔ̃ mmara ɔɖuɖu pia me i iti ame.

Loipɛ lofiriki i ɔ̃ asɛ̃ra iso.

24 Loibara iɣɛrɛ i ɔ̃ anɔ

fiɛ loɔɖi so i ikpi ame.

25 Bosate ɔɔtã me kuso i wũ sibɔlɔlɔ iti.

Bosate ɔɔtã me kuso i kumɛgɔ wũ nrɔɔ̃ ame ɔkpa i ɔ̃ anɔ.

26 "Asɛ aɖi so ate mma nsɛ maɖe ɔnukuare sɔ aɖe ɔnukuarese.

Asɛ aɖi so ate mma nna iɣɛrɛ sɔ ana iɣɛrɛ.

27 Asɛ aɖi so ate mma ɔtu lokpa sɔ akpa,

ɣɛɛ matilese ne aisɛ anyɔ ma nnya.

28 Asɛ aɖi mabɔsokarɔĩ

ɣɛɛ fɔ anɔmi sia i mma nsɛ manyɔ so gɔ aabɔ ma karɔ̃.

29 O Bosate fɔ nɖe wũ ɔkaniɛ;

Bosate sɛ ɔfirikira wũ idududu ikpese ikpawaĩ.

30 Asɛ abuai me si lota lobo matsirise makpakpɛ̃dze iso;

Ɣaa ɔle ame nsɛ lowara ibere.

31 "Ɣaa ɣɛɛ ne, ɔ̃ siri ɔkpa.

Bosate itɔ̃me ɖe nnɛ iso maasiaiti.

Akpiraifɔra ɔɖe

ɔtã mma ɔɖuɖu nsɛ matarĩgu wũ.

32 Bosate ɔnɔwɛ̃saã nɖe Ɣaa.

Ɣaa ɔnɔwɛ̃saã nɖe Itasiare.

33 Ɣaa nɖe wũ ɔlekasɛkɔ̃

fiɛ ɔsɛ ɔbara wũ ɔri ɔkpa.

34 Ɔsɛ ɔbara wũ ngba lɛ kasɔlɔ ɔkpɛ awe;

ɔsɛ ɔmɔɛ̃ me ɔla i abe iso.

35 Ɔsɛ ɔkpadzɛ̃ me kumɛgɔ loakpɛ̃ kakpã;

wũ nrɔɔ̃ sɛ miwo ayiwa kuta ɔkpadzɛ̃.

36 Asɛ atã me fɔ iɖeiso akpiraifɔra,

akɔ so abɔ karɔ̃ ne abara me ɔsiare.

37 Abɛra ɔri atã wũ ngba,

si wũ ngbakɔrɔ iibapɛ mifiriki.

38 "Lotere losiai wũ matsirise fiɛ lowɔra ma.

Loipɛ lokpese gbɔgbɔɔgbɔ lowɔra ma.

39 Lowɔra ma pelepele fiɛ maisibawo ɔta;

marɔ̃ mafere i wũ ngbatɔ̃.

40 Asɛ atã me ɔle atã kakpã;

atã wũ makpɛ̃guse ɔrɔ̃ i wũ ngbatɔ̃.

41 Atã wũ matsirise ɔpɛ mafiriki matere,

ne lowɔra wũ matsirise.

42 Mabiɛ mabie kabuai, ɣɛɛ kuwɛ̃ na ɔ̃aɖi ma -

makpere Bosate ɣɛɛ ɔ̃itɔrã.

43 Lobibiɛ ma makpese lɛ karɔ̃ ɔsebu ɖɛkpɛrɛa awe.

Lowete fiɛ lonene ma lɛ ibata i sivurã iso.

44 "Aɖi me i wũ maturi itaiyaiso ame;

ne amɔɛ̃ me ala lɛ nɖebi ɖeisose.

Maturi ma loiɣe abɔ i wũ kayirinɔ,

45 ne mafɔ ɔba maapɛ mamatã me;

kumɛgɔ ame maanɔ wũ silɔ kere, masɛ mawarɛ me.

46 Ma ɔɖuɖu ɔyu katetere;

mabɔrɛ i ma silekusɛkɔ̃ maba mato mati makpakpa.

47 "Bosate pia ngbã! Maale wũ Itasiare!

Maakɔlɛ Ɣaa kato, Itasiare, wũ Ɖidze!

48 Ɔɖe Ɣaa wɔ nsɛ ɔtikuso ɔtã me

nwɔ nsɛ ɔsu nɖebi ɔpia i wũ kayirinɔ,

49 nwɔ nsɛ ɔtã me iwarã i wũ matsirise nrɔɔ̃ ame.

Akɔlɛ me kato aɖo wũ makpɛ̃guse;

aɖi me abɔrɛgu i maturi nyanyariã nrɔɔ̃ ame.

50 O Bosate, ne ɔso loale-ɔ i nɖebi ndɛ̃.

Loaka ileaka lotã fɔ iyere.

51 Ɔsɛ ɔtã ɔ̃ igara iɖeiso siare;

ɔsɛ ɔɖi kayiribielea ɔte nwɔ ɔsɔla nnɔĩ,

ɔtã David gu ɔ̃ ɔkparɛ ɔwi daaro."