1 Yoab, Zeruya ɔbibirɛrɛĩ ɔtsue sɔ igara to ɔnyigi Absalom. 2 Ne ɔso Yoab ɔpia masɛ maakɔ ɔrɔ̃go nɔgbadze ɔwɛ̃ mabɔrɛgu i Tekoa mabɔ. Ne ɔɣere wũ sɔ, "Bara so lɛ ɔrɔ̃go wɔ nto ɔkisi ɔ̃ maturi ayi gbodzoo si apia kaku ara. Daaledza so asɔla nnɔĩ. 3 Iyɔ kɛlɛ igara kɔrɛ si asɛ aaɣere wũ atɔ̃me wagbe." Ne Yoab ɔɣere wũ nnɛ ɔ̃asɛ ɔ̃aɣɛ ne.

4 Ne ɔrɔ̃go wɔ lobɔrɛ i Tekoa ɔkɛlɛ igara kɔrɛ, ɔkɛlɛ ɔrɛ ɔfu anɔ i karɔ̃ i kuwarɛ ame ɔtã igara ɔɣere wũ sɔ, "O Igara, buai me!"

5 Igara ɔkarɛ wũ sɔ, "Be nto iɖaa-ɔ?"

Ne ɔrɔ̃go ɔtã mmuai sɔ, "Gbaã ne kuɛdze loɖe, wũ ɔrã ɔɔkpi. 6 Fɔ ɔɖabo ɔwe mabibirɛrɛĩ inyɔ, matsɛ ikpɛ̃ i karɔ̃ iputu ame gɔ kuwɛ̃ na gɔ ɔ̃akpura ma, ne ɔwɛ̃ ɔwuĩ ɔ̃ ɔnyiibi ira fiɛ ɔkpi ne. 7 Kiniɔ ne, kalɛ ɔɖuɖu ɔɔta maɣɛ i fɔ ɔɖabo iso maɣɛ sɔ, 'Ɖi fɔ ɔbi wɔ loɖoe ɔ̃ ɔnyiibi bɔ si boɖoe wũ botikuso i ɔ̃ ɔnyiibi wɔ ɔɖoe iti, iyɔ boɔwɔra biarase ana.' Mabie sɔ maanidza itɔgirĩ nɛ ame ka mba ɔtɔ i wũ iyo matã sɔ wũ ɔrã iyere gu ɔkparɛ aayu i karɔ̃ iso."

8 Ne igara ɔɣere ɔrɔ̃go sɔ, "Kɛlɛ iyo ne loto loatã mmara i fɔ kanya."

9 Ɣɛɛ ɔrɔ̃go wɔ lobɔrɛ i Tekoa ɔɣere wũ sɔ, "Wũ ɔkɔse igara si ɔtã iɣɛrɛ si iba bo gu wũ ɔse iyomaturi iso, ipɔ si ire ɔ̃ sigaraiyara kama dzoroo."

10 Ne igara ɔtã mmuai sɔ, "Si ɔrere ɔɣere-ɔ irere ne, kɔ wũ bɔ me, iyɔ ɔ̃isibakarɛ-ɔ kuira ana."

11 Kere ne ɔrɔ̃go ɔɣɛ sɔ, "Igara si ɔkã Bosate wɔ nɖe ɔ̃ Ɣaa sɔ ɔtɛ̃ nwɔ loati wũ ɔbi kpise kuso ɔri si ɔ̃ibabɔ iwɔ ɔbua, si wũ ɔbibirɛrɛĩ ɔbi wɔ lokuti iibakpi."

Ne igara ɔɣɛ sɔ, "Lokã sɔ ayi kumɛgɔ i Bosate si ngbã ne, fɔ ɔbi iti ɔwɛrɛ̃ kuwɛ̃ iibakpase ɔse i karɔ̃."

12 Kere ne ɔrɔ̃go ɔɣɛ sɔ, "Tã fɔ ɔɖabo si ɔɣere wũ ɔkɔse igara itɔ̃me iwɛ̃."

Ne igara ɔtã mmuai sɔ, "Ɣɛ nnɛ aba."

13 Ne ɔrɔ̃go ɔɣɛ sɔ, "Ne iyɔ be ɔso fiɛ abara ira nɛgbe igbã i Ɣaa maturi iso? Si igara ɔɖeika lɛgbe ne, ɔ̃ɔtã so ipɔ gɔ ɔ̃ikpesera ɔ̃ ɔbi wɔ ɔsɛ̃ ɔbɔ. 14 Lɛ kumɛgɔ si ndu ɔwiri mifere i karɔ̃ maisibawo me ɔbodza ne, ngbɔ boakpi ne. Ɣɛɛ iiɖe ngbɔ i Ɣaa to ɔbie, ɣɛɛ ɔsɛ ɔbie ɔri wɔ iso ɔ̃akpesera ɔturi wɔ masa i ɔ̃ kɔrɛ ɔbɔ.

15 "Fiɛ kiniɔ ne, loba loɣere wũ ɔkɔse igara nnɛgbe alasɔ maturi to mapia me ifɔ̃. Ne ɔso fɔ ɔɖabo ɔbu sɔ, 'Loaɖegu igara ika siainyɔ ɔto ɔ̃abara nnɛ loto lokarɛ ɔtã me. 16 Siainyɔ igara to ɔ̃aɖi ɔ̃ ɔɖabo ɔbɔrɛgu i nwɔ nto ɔbie sɔ ɔ̃aɖoe bo gu wũ ɔbi ɔɖi i Ɣaa kaɖekɔ̃ ga ɔtã bo iso.'

17 "Kiniɔ ne, fɔ ɔɖabo sɔ, 'Wũ ɔkɔse igara itɔ̃me nɛ ɔɣɛ si itã sɔ kuwɛ̃ iibapɛgu wũ kaɖekɔ̃ alasɔ wũ ɔkɔse igara ne, ɔse lɛ Ɣaa kpabo wɔ nɣe isɛɛ gu ilalaa. Bosate wɔ nɖe fɔ Ɣaa si ɔwegu-ɔ.' "

18 Ne igara ɔɣere ɔrɔ̃go sɔ, "Nnɛ loto loba loakarɛ-ɔ ne, daasɛ̃ sɔ aito atã me ne mmuai."

Ne ɔrɔ̃go ɔɣɛ sɔ, "Wũ ɔkɔse igara si ɔɖeika."

19 Ne igara ɔkarɛ sɔ, "Yoab kɔrɔ̃ na i nnɛgbe ɔɖuɖu ame ɣɛɛ?"

Ne ɔrɔ̃go ɔtã mmuai sɔ, "Lokã wũ ɔkɔse igara sɔ, kuwɛ̃ iibawo ɔfiriki ɔkɛlɛ kuɖearɔ̃ ɣee kubena i nnɛ wũ ɔkɔse igara ɔɣɛ iso. Aĩ, fɔ ɔɖabo Yoab lopia me sɔ lobara ngbɔ, fiɛ ɔ̃ lopia fɔ ɔɖabo atɔ̃me i kanya. 20 Fɔ ɔɖabo Yoab ɔbara ngbɔ si ɔfirikira nnɛ nto kiniɔ. Wũ sate ba iwola lɛ Ɣaa kpabo - ɔɣe irabiara nɛ nto i karɔ̃ iso."

21 Ne igara ɔɣere Yoab sɔ, "Lonɔ, loabara kumɛɔ, kɛlɛ aakɔ Absalom bɔ."

22 Yoab ɔkɛlɛ ɔrɛ i igara katɔ̃ i kuwarɛ ame, ɔfere igara kusɛkusɛ. Ne Yoab ɔɣɛ sɔ, "Nɔme fɔ ɔɖabo to ɔtsue sɔ ɔ̃ ara ɔbo wũ ɔkɔse igara anɔ alasɔ igara ɔtɔrã ɔsia i nnɛ ɔ̃ ɔɖabo ɔkarɛ iso."

23 Ne Yoab ɔkɛlɛ Gesur ɔsɛ ɔ̃akɔ Absalom ɔkpesegu ɔbɔ Yerusalem ne. 24 Ɣɛɛ igara ɔɣɛ sɔ, "Ɔkɛlɛ ɔ̃ mɔmɔ iyo, ɔdaanya me katɔ̃." Ne ɔso Absalom ɔkɛlɛ ɔ̃ iyo, ɔ̃inya igara katɔ̃.

25 I Israel ɔɖuɖu ne, kuwɛ̃ na gɔ masɛ male ɔ̃ situri ire lɛ Absalom. Ita i ɔ̃ itititɛ̃ iba i ɔ̃ ngbatata ne, ikparĩ kuiwɛ̃ na wũ iso. 26 Ɔwi ɔrere si ɔkparɛ̃ iti ne ɔla ɔ̃ɔkere sɛ̃ fiɛ sɛ̃ kukereme ɔfɔ lɛ kilo inyɔ gu ira lɛ masɛ kere ara i igara kusɛme. Ɔla ɔ̃akparɛ̃ iti ɔwi ku ɔwi si ka siba ɔrɔrã siɖo wũ.

27 Maɣe mabibirɛrɛĩ itɛ gu ɔbibirɔ̃gomi ɔwɛ̃ matã Absalom. Ɔ̃ ɔbibirɔ̃gomi iyere nɖe Tamar fiɛ ɔba ɔ̃akpese ɔrɔ̃go wɔ lore situri gbaã.

28 Absalom ɔwe i Yerusalem akɔ anyɔ, ɔ̃inya igara katɔ̃. 29 Ne ɔpia sɔ makpere Yoab mabɔ si ɔpia wũ igara kɔrɛ, ɣɛɛ Yoab iisɛ ɔ̃ kɔrɛ. Ɔpia wũ ɔturi ɔkpɛ nyɔare, Yoab ɔsɛ̃ ɔ̃isɛ ɔ̃ kɔrɛ. 30 Ne Absalom ɔɣere ɔ̃ maɖabo sɔ, "Minya Yoab kamɔ kakpɛkɔ̃ ga mpia i wũ kare kɔrɛ i mmɔ, misɛ miapia kã ɔtɔ." Ne ɔso Absalom maɖabo ɔpia kakpɛkɔ̃ ɔtɔ.

31 Ne Yoab ɔkɛlɛ Absalom iyo ɔsɛ ɔ̃akarɛ wũ sɔ, "Be ɔso i fɔ maɖabo ɔpia wũ kakpɛkɔ̃ ɔtɔ?"

32 Ne Absalom ɔɣere Yoab sɔ, "Nyɔ, lopia-ɔ ɔturi sɔ, 'Ba si lopia-ɔ asɛ aakarɛ igara sɔ, "Be ɔso atã lobɔrɛ i Gesur loba, si lodaaba kɔraa tee ilɛ me iɖo!" 'Kiniɔ ne, loto lobie sɔ lonya igara ku anɔ, si loɖe ipɔ ne, si ɔɖoe me."

33 Ne ɔso Yoab ɔsɛ ɔ̃aɣere igara ngbɔ. Ne igara ɔpia Absalom maturi fiɛ ɔba ɔ̃abɔitikarɔ̃ ɔtã igara ne. Ne igara ɔfiɔ̃ wũ irɛkpo ne.