1 Ɔwi mama ne Bosate ɔnagu Israel mabi sikpã ana, ne ɔtã sɔ David si ɔbɔ imɔrɛ̃ i ma iso. Ɔɣere David sɔ, "Kɛlɛ si atã maka makpakpɛ̃dze i Israel gu Yuda."

2 Ne ɔso igara David ɔɣere Yoab gu makpakpɛ̃dze makpakpa ma lowegu wũ sɔ, "Miki i Israel kumele ɔɖuɖu ame ita i Dan ɔmagɛ̃ i kato ikɛlɛ Beerseba ɔmagɛ̃ i kala. Si mitsɛrɛ makpakpɛ̃dze ayere si loatsue mma ɖoɖooɖo mpia."

3 Ɣɛɛ Yoab ɔtã igara mmuai sɔ, "Bosate fɔ Ɣaa si ɔmɔdza fɔ makpakpɛ̃dze ikpɛ kulafa gu kama, si wũ ɔkɔse igara si ɔnya. Ɣɛɛ be ɔso i wũ ɔkɔse igara to ɔbie sɔ ɔbara nnɛmɔ igbã?"

4 Igara ɔya iso sɔ Yoab gu makpakpɛ̃dze makpakpa si mabara i ɔ̃ itɔ̃me iso. Ne ɔso marui i ɔ̃ kɔrɛ masɛ maaka mma loɔkote makpakpɛ̃dze i Israel.

5 Gɔ mawara Yordan ɔwore kama ne, mabara kasɛkɔ̃ i Aroer ɔmagɛ̃ i kala i kagbolomi ame, ne ka maki i Gad ame makɛlɛ Yazer. 6 Makɛlɛ Gilead gu Tatim Xodsi ibuiti ame, ne mabo Dan Yaan gu ndɛ̃mɔ ikɛlɛ Sidon isɛ. 7 Ne ka makɛlɛ Tiro wɔ abere ɔki alɔ isɛ gu ma Xivise gu ma Kanaanse simagɛ̃ ɔɖuɖu ame. Katsɔrakɔ̃ ne, makɛlɛ Beerseba i Negev i Yuda karɔ̃ ame.

8 Gɔ maɔki i karɔ̃ ɔɖuɖu iso ne, makpese maba Yerusalem i awa kaiwɛ̃ gu ayi sinyɔ kama.

9 Yoab ɔtã igara itsue i makpakpɛ̃dze kusime iso: I Israel ne maturi kukpi alafa fafarana ma lotiri makote fiɛ maawo ipɛmi ɔpɛ, fiɛ i Yuda ne maturi kukpi alafa aru.

10 Gɔ David ɔɔtã maka maturi kama ne ɔ̃ kaɣere ɔɖaa wũ, ne ɔɣere Bosate sɔ, "Lobara ikpi siare i nnɛ lobara ame. O Bosate su fɔ ɔɖabo ikpi tsɛ wũ. Lobara idzimira gbaã."

11 Fiɛ David aata ku kaɖesɛã kaya ne, Bosate itɔ̃me ɔɔba Gad wɔ loɖe Ɣaa kanyaɖidze, David kanyaara sɔ, 12 "Kɛlɛ aaɣere David sɔ, ' Bosate sɔ, Nto losu ara atɛ losɛ-ɔ i anɔmi ame. Ɖi iwɛ̃ nɛ loatã iba-ɔ iso.' "

13 Ne ɔso Gad ɔkɛlɛ David kɔrɛ ne ɔɣere wũ sɔ, "Kukã si kubo i fɔ karɔ̃ iso akɔ atɛ? Ɣee awa atɛ gɔ aatere fɔ matsirise ma loatere masiai-ɔ? Ɣee inyɛpɛ̃ si iba i fɔ karɔ̃ iso ayi atɛ? Kiniɔ ne bu iti ame i ne iso si lotsue kumɛgɔ loatã nwɔ lopia me katɔ̃me mmuai."

14 David ɔɣere Gad sɔ, "Lopia i isoma ame gbaã. Boabo i Bosate nrɔɔ̃ ame alasɔ ɔba kayiribielea gbodzoo; ɣɛɛ daatã lobo i wũ matsirise nrɔɔ̃ ame."

15 Ne ɔso Bosate ɔsese inyɛpɛ̃ Israel ita i kaya gamɔ gbɔgbɔɔgbɔ ɔwi wɔ masɛ ɔɣo, ne maturi kukpi sikɔdzɛ ɔkpi ita i Dan ikɛlɛ Beerseba simagɛ̃ ame. 16 Ɔwi wɔ i Ɣaa kpabo ɔɖi kɔrɔ̃ si ɔwɔra Yerusalem ne, Bosate ɔfirikira adzuni ala ara wa loɔnina ɔso ne ɔɣere kpabo wɔ nto ɔwɔra maturi sɔ, "Ka ilɛ! Nyua nnɛ ato abara." Ɔwi wɔmɔ ne Bosate kpabo ɔɔbo Arauna Yebuse imɔtu.

17 Ɔwi wɔ i David ɔnya kpabo wɔ nto ɔɖoe maturi ne, ɔɣere Bosate sɔ, "Mme loɣɛrɛ fiɛ lobara ikpi. Mmagbe ne masɛrɛrerɔ̃ maɖe. Maibara kuira, tã fɔ kɔrɔ̃ si kusia bo gu wũ iyomaturi iso."

18 Ikpɛnɛ nɛmɔ ame ne Gad ɔkɛlɛ David kɔrɛ ɔsɛ ɔ̃aɣere wũ sɔ, "Ya kɛlɛ Arauna Yebuse imɔtu si asɛ aapɛ isɔrɛkasege atã Bosate i mmɔ." 19 Ne ɔso David ɔya ɔkɛlɛ lɛ kumɛgɔ i Bosate ɔɣɛ ɔkigu i Gad iso. 20 Gɔ Arauna ɔnyɔ fiɛ ɔnya igara gu ɔ̃ maturi to maba ɔ̃ isɛ ne, ɔbɔrɛ ɔkɛlɛ ɔsɛ ɔ̃akɔlɛ ɔfu anɔ i karɔ̃ i igara katɔ̃.

21 Arauna ɔkarɛ sɔ, "Be ɔso i wũ ɔkɔse igara ɔba i ɔ̃ ɔɖabo kɔrɛ?"

David ɔtã mmuai sɔ, "Si loɣa fɔ imɔtu si loapɛ isɔrɛkasege lotã Bosate, si inyɛpɛ̃ nɛ loba i maturi iso aatuĩ."

22 Arauna ɔɣere David sɔ, "Wũ ɔkɔse igara si ɔsu nnɛ ɔbie si ɔsɔrɛ. Nya manantsuĩ itã araifɛ̃ isɔrɛ, fiɛ nya kamɔ ipɛ kukolo gu manantsuĩ ɔmeisosidziri dzɛ aasu lɛ ndɔrɛ̃. 23 Arauna sɔ, "O igara Aruana to ɔsu ara ɔɖuɖu wagbe ɔtã igara. Ana ne Bosate fɔ Ɣaa si ɔfɔ fɔ isɔrɛ."

24 Ɣɛɛ igara ɔtã Arauna mmuai sɔ, "Oɣoo, nɣɛ iso sɔ loatã-ɔ kuso i ne iti. Loibasɔrɛ araifɛ̃ isɔrɛ lotã Bosate wũ Ɣaa i nnɛ loitã kuso iti."

Ne ɔso David ɔɣa imɔtu gu manantsuĩ ne ɔtã sikãfudza abi siru. 25 David ɔpɛ isɔrɛkasege i mmɔ ne ɔsɔrɛ araifɛ̃ asɔrɛ gu isobuɛ asɔrɛ ɔtã Bosate. Ne Bosate ɔnɔ kayiikparama i karɔ̃ iti, ne inyɛpɛ̃ ɔtuĩ i Israel iso ne.