2 SAMUEL 20

Seba Ɔta Ɔya I David Iso

1 Ɔwi wɔmɔ ame ne, kulupiadze ɔwɛ̃ wɔ marɔ Seba, fiɛ ɔɖe Bikri ɔbibirɛrɛĩ fiɛ ɔbɔrɛ i Benyamin kamele ame ɔwe i mmɔ. Ɔfɛ̃ kadadã ɔlakulu ɔɣɛ sɔ,

"Bona kaɖekɔ̃ i David ame,

bona kakɔi i Yese ɔbi ame!

O Israel, ɔbiara si ɔkɛlɛ ɔ̃ ikpayo ame!"

2 Ne ɔso Israel marɛrɛ̃ ɔɖuɖu ɔkpese i David kama masiai Bikri ɔbibirɛrɛĩ Seba. Ɣɛɛ Yuda marɛrɛ̃ ɔwegu ma igara ita i Yordan ɔwore katɔ̃ isɛ iabo Yerusalem.

3 Gɔ David ɔkpese ɔkɛlɛ ɔ̃ igaraiyo i Yerusalem ne, ɔsu ɔ̃ masɔrɔ̃ iweo ma ɔnyua ɔsɛ i kama sɔ madzuɛ̃ igaraiyo ɔpia i iyo ise i madzuɛ̃se kayirinɔ. Ɔnyɔ ma iso, ɣɛɛ ɔ̃isirɛgu ma. Ɔtã ma masɛ ise lɛ makpisemare gbɔgbɔɔgbɔ makpi.

4 Kere ne igara ɔɣere Amasa sɔ, "Kpere Yuda marɛrɛ̃ ɔɖuɖu sɔ masikanya i ngbe i ayi atɛ ame si fɔ mɔmɔ ana si aba." 5 Ɣɛɛ gɔ Amasa ɔsɛ ɔkpere Yuda marɛrɛ̃ ne, ɔfɔ ɔwi ɔɖo ɔwi wɔ i igara ɔsɛ wũ.

6 Ne David ɔɣere Abisai sɔ, "Kiniɔ ne, nnɛ i Bikri ɔbibirɛrɛĩ Seba to ɔ̃abara bo to ianyanyarĩ iɖo nnɛ i Absalom ɔbara. Kɔ mi ɔkɔse makpakpɛ̃dze si mitere misiai wũ si ɔ̃ibana simagɛ̃siare dzɛ matsue abere mapia ame ɔbo ɔtere bo iso." 7 Ne ɔso Abisai ɔɖegu Yoab makpakpɛ̃dze gu ma Keretse gu ma Peletse*20.7 Ma Keretse gu ma Peletse: Maɖe mafɔ makpakpɛ̃dze ma mala maɔsu ɔpaa. gu makpãrɛrɛĩ ɔɖuɖu katɔ̃ masɛ mabɔrɛ i Yerusalem matere masiai Bikri ɔbibirɛrɛĩ Seba kama.

8 Gɔ ame mapia i Gibeon Itasiare kɔrɛ ne, Amasa ɔba ɔ̃atu ma. Yoab ɔpia makpakpɛ̃dze ara, ɔsu kafiami ɔnyi so i ɔsɔ ame, fiɛ itekpe ɔwe i ɔyuɛ ame isarã iso. Gɔ ɔɖi kukpa ɔba katɔ̃ ne, ikpase ibɔrɛ i ɔyuɛ ame.

9 Ne Yoab ɔɣere Amasa sɔ, "Wũ ɔnyii, nda ise? Ne Yoab ɔsu ɔ̃ kuɖearɔ̃ ɔmɔɛ̃ Amasa i ɔkore si ɔfiɔ̃ wũ irɛkpo. 10 Amasa iidzuɛ̃ so i itekpe nɛ i Yoab to i kɔrɔ̃ ame iso, ne ɔso Yoab ɔsu ne ɔtsue wũ i iyiri, siɣɛrɛ ɔbɔrɛ sifere i karɔ̃. Ɔ̃isitsue wũ ɔkpɛ nyɔare fiɛ Amasa ɔkpi. Ne Yoab gu ɔ̃ ɔnyiibi Abisai ɔtere masiai Bikri ɔbibirɛrɛĩ Seba.

11 Ne Yoab ɔrɛrɛ ɔwɛ̃ ɔya i Amasa kɔrɛ ɔɣɛ sɔ, "Ɔbiara wɔ i Yoab ara ɔbo anɔ gu mma nɖe David mare si masiai Yoab!" 12 Amasa ɔrɛ i mmɔ i ɔ̃ mɔmɔ ima ame ne ɔrɛrɛ̃ ɔwɛ̃ ɔnya sɔ makpakpɛ̃dze ɔɖuɖu ma loba maabo i mmɔ ne, matuĩ. Gɔ ɔnya sɔ ɔbiara wɔ loba ɔ̃abo Amasa kɔrɛ ɔtuĩ ne, ɔrɛrɛ̃ wɔmɔ ɔbore wũ ɔɖi i ɔri iso ɔpia i sikua ame ɔsu awu ɔfu wũ. 13 Gɔ maɔbore Amasa maɖi i ɔri iso kama ne, makpakpɛ̃dze ɔɖuɖu ɔso ɔri masiai Yoab mati Seba wɔ nɖe Bikri ɔbibirɛrɛĩ kama.

14 Seba ɔki i Israel kumele ɔɖuɖu ame isɛ iabo Abel Bet Maaka gu ma Beritse ibuiti ame fiɛ ma ɔɖuɖu ɔsikanya ne masiai wũ. 15 Makpakpɛ̃dze ɔɖuɖu ma losiai Yoab ɔba maki malɔ Seba i Abel Bet Maaka. Makuri sise mali ɔmagɛ̃siare ibere nɛ i kama, matsɛ ne iwete ku sidziri sɔ si irɔ̃, 16 ne ɔrɔ̃go ku iwola ɔwɛ̃ ɔkpere ɔbɔrɛgu i ɔmagɛ̃siare ame sɔ, "Mikã atsue! Mikã atsue! Miɣere Yoab sɔ ɔba i ngbe si loɖegu wũ ika." 17 Yoab ɔkɛlɛ ɔ̃ kɔrɛ isɛ, ne ɔrɔ̃go ɔkarɛ sɔ, "Fɔ nɖe Yoab?"

Ne Yoab ɔtɔrã sɔ, "Aĩ, mme loɖe."

Ne ɔrɔ̃go ɔɣɛ sɔ, "Kã nnɛ i fɔ ɔɖabo to ɔba ɔ̃aɣɛ atsue."

Ne Yoab ɔɣere wũ sɔ, "Loto lokã-ɔ atsue."

18 Ne ɔrɔ̃go ɔkɛlɛgu i katɔ̃ sɔ, "Kokooko ne, ɔɣɛ mala maɔɣɛ sɔ, 'Fɔ mmuai bɔrɛgu i Abel kɔrɛ,' iyɔ itɔ̃me ɔɔɖaɛ. 19 Boɖe isobuɛ gu ɔmagɛ̃ wɔ nsɛ ɔbara ara i ɔri iso i Israel. Ato abie sɔ awɔra ɔmagɛ̃siare wɔ lonya, ɔba kuwarɛ i Israel. Be ɔso ato abie sɔ ame Bosate kaɖekɔ̃?"

20 Ne Yoab ɔtã mmuai sɔ, "Kuiyikuiyi! Iiɖe ngbɔ nɖe wũ adzuni sɔ loame ɣee lowɔra Bosate kaɖekɔ̃! 21 Iiɖe ngbɔ nɖe itɔ̃me. Ɔrɛrɛ̃ wɔ marɔ Seba fiɛ ɔɖe Bikri ɔbibirɛrɛĩ wɔ lobɔrɛ i Efrayim kabemi karɔ̃ iso ɔta ɔya i igara iso, i David iso. Miɖi ɔrɛrɛ̃ ɔwɛ̃ wɔgbe mitã me si loarui i mi ɔmagɛ̃siare kɔrɛ."

Ne ɔrɔ̃go ɔɣere Yoab sɔ, "Mato maafuĩdza ɔ̃ iti mabɔrɛgu i ibere iso masese-ɔ."

22 Kere ne ɔrɔ̃go wɔgbe ɔrui ɔsɛ ɔ̃asarɛgu maturi ɔɖuɖu fiɛ ku ɔ̃ iwola kuka ne, matu Seba, Bikri ɔbibirɛrɛĩ iti mafuĩdza masese Yoab. Ne ɔso Yoab ɔfɛ̃ kadadã fiɛ ɔ̃ makpakpɛ̃dze ka masasame marui i ɔmagɛ̃siare kɔrɛ ɔbiara ɔkɛlɛ ma aɖe. Ne Yoab ka ɔkpese ɔkɛlɛ igara kɔrɛ i Yerusalem ne.

David Makpakpa

23 Yoab loɖe makpakpɛ̃dze ɔɖuɖu i Israel ɔkpakpa, Benaya wɔ nɖe Yexoyada ɔbibirɛrɛĩ ɔɖe ma Keretse gu ma Peletse ɔkpakpa. 24 Adoniram loɖe mma nto mabara ɔɣiɛ karabara ɔkpakpa, Yexosafat, Axilud ɔbibirɛrɛĩ loɖe nwɔ losia ara ikparĩ; 25 Seva ɔɖe ratsɛrɛdze; Zadok gu Abiatar ɔɖe masɔrɛdze; 26 fiɛ Ira wɔ loɖe Yairise ɔɖe David sɔrɛdze.