2 SAMUEL 3

1 Kakpã ɔwe i Saul iyo gu David iyo ndɛ̃ igu ɔfɔ ɔwi ɔdzoro. David iyo ɔla iɔwe ɔle ibua, ɣɛɛ Saul iyo ɔle ɔla karɔ̃ iba.

David Mabibirɛrɛĩ Ma Ɔɣe I Xebron

2 Maɣe mabibirɛrɛĩ matã David i Xebron:

Ɔ̃ ɔbi ɖeakatɔ̃ loɖe Amnon, ɔbirɛrɛĩ wɔ i Axinoam wɔ lobɔrɛ i Yezrel ɔɣe;

3 Ɔbirɛrɛĩ nyɔare loɖe Kileab wɔ i Abigail, Nabal wɔ lobɔrɛ i Karmel kpise ɔre ɔɣe;

Ɔtɛare loɖe Absalom wɔ i Maaxa, Gesur igara Talmai ɔbibirɔ̃gomi ɔɣe;

4 Ɔnaare loɖe Adoniya wɔ i Xagit ɔɣe;

ɔruva nɖe Sefatya wɔ i Abital ɔɣe;

5 fiɛ ɔkuɔva nɖe Itream wɔ i David ɔre Egla ɔɣe ɔtã wũ.

Mabibirɛrɛĩ magbe maɣe matã David i Xebron ne.

Abner Ɔwara Ɔkɛlɛ David Kɔrɛ

6 Ɔwi wɔ i kakpã to i Saul iyo gu David iyo ndɛ̃ ne, Abner ɔ̃ wũ ɔla ɔ̃ɔɣedza ɔ̃ mɔmɔ siɖebia i karɔ̃ i Saul iyo. 7 Saul ɔwe ɔsɔrɔ̃ ɔwɛ̃ wɔ marɔ Rizpa fiɛ ɔɖe Aya ɔbibirɔ̃gomi. Iyi iwɛ̃ ne, Isboset ɔkarɛ Abner sɔ, "Be ɔso arɛgu wũ ɔse ɔsɔrɔ̃?"

8 Sikpã ɔmɔɛ̃ Abner gbaã i nnɛ i Isboset ɔkarɛ wũ ɔso, ne ɔso ɔkarɛ wũ sɔ, "Abu sɔ nwɔ loisɛ loɖe ɔnukuare lɛ kpɛkpɛ loɖe i Yuda iyo kasɛ? Ipɛ i nɔme ne, losu so lotã fɔ ɔse Saul iyo, ɔ̃ iyomaturi gu ɔ̃ malaa ku ɔnukuare. Loiɖi mi lotã David, ɣɛɛ kiniɔ ne, ato anagu me sikpã ala iɣɛrɛ nɛ loba i ɔrɔ̃go wɔgbe iti! 9 Ɣaa si ɔte me ɔledza me ite si loibara nnɛ i Bosate ɔɣɛ ɔsɛ ku ndamu sɔ ɔ̃abara ɔtã David. 10 Loanyɔ sɔ sigarakaɖekɔ̃ ɔfiriki sibɔrɛgu i Saul iyo sikɛlɛ David sigaraiyara i Israel gu Yuda iso ita i Dan isɛ iabo Beerseba." 11 Isboset iisina ɔtu ɔbusi kanya ɔɣere Abner kuira alasɔ ɔto ɔnigã wũ.

12 Ne Abner ɔpia maturi David kɔrɛ sɔ masɛ maaɣere wũ i ɔ̃ kanya sɔ, "Nna mba karɔ̃? Baragu me kanyakawɛ̃ si lobuai-ɔ lokɔ Israel kaɖe ɔɖuɖu lobɔ-ɔ."

13 Ne David ɔtã mmuai sɔ, "Ilɛ, loabaragu-ɔ kanyakawɛ̃, ɣɛɛ loakarɛ ira iwɛ̃ lobɔrɛgu i fɔ kɔrɛ: Daaba i wũ kɔrɛ si aisɛgu Saul ɔbibirɔ̃gomi Mixal." 14 Ne David ɔpia makpabo sɔ masɛ maaɣere Saul ɔbibirɛrɛĩ Isboset sɔ, "Su wũ ɔre Mixal wɔ iti ara lobara ala ma Filistise kulafa ma loɖoe akurinyaĩ sese me."

15 Ne ɔso Isboset ɔpia masɛ maakɔ wũ maruigu i ɔ̃ ɔrã Paltiel wɔ nɖe Lais ɔbibirɛrɛĩ kɔrɛ. 16 Ɔ̃ ɔrã ɣɛɛ ne, ɔsiai wũ i kama ɔto ɔbiɛ ɔsɛ ɔ̃abo Baxurim. Ne Abner ɔɣere wũ sɔ, "Kpese kɛlɛ iyo!" Ne ɔso ɔkpese ɔkɛlɛ.

17 Abner ɔsɛ iti ame ku Israel kaɖe makpakpa ɔɣɛ sɔ, "Iɔfɔ ɔwi kiniɔ gɔ mito mibie sɔ misɛra David sigara. 18 Kiniɔ ne, ka misɛra wũ, ala Bosate ɔsiaita ku kaɣɛkasɛ ɔtã David sɔ, 'Wũ ɔɖabo David iso loaki loaɖi wũ maturi Israel kaɖe lobɔrɛgu i ma Filistise gu ma matsirise ɔɖuɖu nrɔɔ̃ ame.' "

19 Abner mɔmɔ ana ɔɖegu ma Benyaminse ika. Ne ka ɔkɛlɛ Xebron ɔsɛ ɔ̃aɣere David ibiara nɛ i Israel gu Benyamin iyo ɔɖuɖu ɔbie sɔ maabara ne. 20 Gɔ Abner ɔba David kɔrɛ i Xebron ne, ɔsɛgu ɔ̃ marɛrɛ̃ sinyɔ, ne ɔso David ɔtu ma gu ɔ̃ marɛrɛ̃ ɔpɔrɔ̃ maɖe kakpakpe. 21 Ne Abner ɔɣere David sɔ, "Tã lorui ɔluwɛ̃ loasa Israel kaɖe ɔɖuɖu kanya ɔluwɛ̃ lotã wũ ɔkɔse igara si makã ndamu matã-ɔ si aɖe sigara i ma ɔɖuɖu iso, lɛ kumɛgɔ i fɔ ɔtu to ɔbie." Ne ɔso David ɔɖi Abner ɔri i isobuɛ ame.

Yoab Ɔɖoe Abner

22 Iifɔ ɔwi ɖuɖuuɖu ne, David makpakpɛ̃dze gu Yoab ɔkpese maba Xebron gɔ masɛ maata mabo i ma matsirise iso maasore karana gbodzoo mabɔ. Ɣɛɛ Abner siina i David kɔrɛ i Xebron, ala ɔ̃ɔɖi wũ ɔri fiɛ ka ɔkpa i isobuɛ ame. 23 Gɔ Yoab gu makpakpɛ̃dze ɔɖuɖu ɔba maabo ne, maɣere wũ sɔ Abner wɔ nɖe Ner ɔbibirɛrɛĩ ɔba igara kɔrɛ fiɛ igara ɔɔɖi wũ ɔri i isobuɛ ame.

24 Ne ɔso Yoab ɔkɛlɛ igara kɔrɛ ɔsɛ ɔ̃akarɛ wũ sɔ, "Be iɖe abara i ngbe? Nyɔ, Abner ɔba i fɔ kɔrɛ, be ɔso atã wũ ɔrui? Kiniɔ ka ɔkpa! 25 Aɣe Abner, Ner ɔbibirɛrɛĩ, ɔba ɔ̃asɔsɔla-ɔ si ɔnyɔ fɔ ife gu ikpese si ɔnyɔ irabiara nɛ ato abara."

26 Kere ne Yoab ɔrui i David kɔrɛ fiɛ ɔpia Abner makpabo masɛ maakɔ wũ makpesera mabɔrɛgu i Sira itubu kɔrɛ mabɔ, ɣɛɛ David iiɣe. 27 Gɔ Abner ɔkpese ɔba Xebron ne, Yoab ɔkɔ wũ mabo i iyo kabɔrɛnya lɛ itɔ̃me ɔto ɔbie sɔ ɔɣere wũ i iwɛrɛ ame. Ne i mmɔ kere Yoab ɔɖi itekpe ɔtsue Abner i kayiri ɔɖoe wũ ɔsu ɔtikuso ala gɔ ɔɖoe ɔ̃ ɔnyiibi Asaxel iti.

28 Kama gɔ David ɔnɔ nnɛgbe ne, ɔɣɛ sɔ, "Bo gu wũ sigarakaɖekɔ̃ na iɣɛrɛ ɖaa i Bosate anɔ i Abner, Ner ɔbibirɛrɛĩ kukpi gɔgbe ame. 29 Ɔ̃ ima si ikarɛ so iti i Yoab gu ɔ̃ ɔse iyo ɔɖuɖu iso! Nwɔ nto ɔkpɛ̃ iyɛi ɣee ɔnyɛ ɔnyɛrɛtɛa, ɣee ɔsɛ i sidziri iso, ɣee ɔkpi i kakpã ame ɣee ɔkpi kukã si ɔdaaro i Yoab iyo."

30 (Yoab gu ɔ̃ ɔnyiibi Abisai ɔɖoe Abner ala ma ɔnyiibi Asaxel wɔ i Abner ɔɖoe i kakpã ame i Gibeon ɔso.)

31 Ne David ɔɣere Yoab gu mma ɔɖuɖu lowe i ɔ̃ kɔrɛ sɔ, "Mikɛkɛ mi awu si minyɔme ipundu sikoto si misɛ i isoma ame i Abner katɔ̃." Igara mɔmɔ ɔgbi aɖaka kama. 32 Mabiara Abner i Xebron. Igara ɔbiɛ wororo i Abner ibiɔ katɔ̃, fiɛ maturi ɔɖuɖu ɔbiɛ ana.

33 Igara ɔka isomanɔ wɔgbe ɔtã Abner:

"Iikote sɔ Abner aakpi lɛ ɔturi wɔ liobara i mmara iso.

34 Mainyi-ɔ nrɔɔ̃,

maipia fɔ ngba i ikpo ame.

Arɔ̃ lɛ nwɔ lorɔ̃ i ɔtile maturi nrɔɔ̃ ame."

Ne maturi ɔɖuɖu ɔbiɛ Abner ana ne.

35 Ɔwi wɔ i kuɣɛ̃ iibo iyo ne, ma ɔɖuɖu ɔba maatã David iti sɔ ka ɔpia ira kɛkɛĩ i kanya, ɣɛɛ David ɔkã ndamu ɔɣɛ sɔ, "Ɣaa si ɔte me, ɔledza me ite si ira ɔti me i kanya fiɛ kuɣɛ̃ aabo iyo!"

36 Maturi ɔɖuɖu ɔkarã inɔ, fiɛ ibo ma anɔ, fiɛ gbaã ne, irabiara nɛ i igara ɔbara ɔbo ma anɔ. 37 Ne ɔso iyi nɛmɔ ne, mma ɔɖuɖu lowe i mmɔ gu Israel ɔɖuɖu ɔtsue sɔ igara kɔrɔ̃ na i Abner, Ner ɔbibirɛrɛĩ kukpi ame.

38 Ne igara ɔkarɛ ɔ̃ makpakpɛ̃dze sɔ, "Miiɣe sɔ ɔturi siare gu ɔkpakpaturi lokpi i Israel nɔme ɣɛɛ? 39 Nɔme atoasɔ mme nɖe igara wɔ masɔla nnɔĩ ne, nrɔɔ̃ ɔfɛ̃ me ala Zeruya mabibirɛrɛĩ magbe ɔfe ɔle matã me. Bosate mɔmɔ si ɔtã iranyanyariã baradze kuso i ɔ̃ kurabarara nyanyariã kanya!"