1 I ɔwi ame ne, David ɔɖe ma Filistise iso ɔbɔ ma karɔ̃ ne ɔfɔ Meteg Amma i ma Filistise nrɔɔ̃ ame.

2 David ɔɖe ma Moabse ana iso. Ɔtã marɛ i karɔ̃ ne ɔsusu ma ku iwɛĩ i ɔbole ame. Si ɔsusu iwɛĩ ikuri iwɛ̃ gu ikuri inyɔa ne iyɔ ɔ̃ɔɖoe ma ɔɖuɖu i akuri anyɔ ame. Ikuri tɛa nɛ ɔ̃asusu ne ɔ̃ɔtã mawe ngbã. Ne ɔso ma Moabse ɔwe i David kayirinɔ fiɛ matã wũ toto.

3 Ana ne, David ɔkpɛ̃gu Xadadezer, Rexob ɔbibirɛrɛĩ wɔ nɖe Zoba igara ne ɔɖe wũ iso i kakpã ame ku ɔwi wɔ i David ɔsɛ ɔ̃aledza iɣedza ɔ̃ iɖeiso ɔle i Frat ɔwore kɔrɛ. 4 David ɔmɔɛ̃ Xadadezer kubore gɔ i apɔngɔ sɛ akpadzɛ̃ kakpi kawɛ̃, mma nsi i apɔngɔ iso ana ɔmɔɛ̃ kukpi kukɔdzɛ, makpakpɛ̃dze ma nsɛ ngba kukpi sinyɔ. Ɔtutu apɔngɔ ɔɖuɖu wa nsɛ akpadzɛ̃ kubore sikpaɖu iɖo wã kulafa kere ɔ̃itu.

5 Gɔ ma Aramse ma i Damasko ɔba maabuai Xadadezer, Zoba igara ne, David ɔɖoe ma kukpi sinyɔ-inyɔ. 6 Ɔsɛ makpakpɛ̃dze kasɛkɔ̃ i ma Aramse sigarakaɖekɔ̃ i Damasko ne ɔso ma Aramse ɔwe i ɔ̃ kayirinɔ, mala maɔbɔ wũ toto. Bosate ɔtã David iɖeiso i kakɔi biara ga ɔki.

7 David ɔfɔ sikãrɛtɛa akpirafɔra wa loɖe Xadadezer makpakpa are ne ɔsu wã ɔbɔ Yerusalem. 8 Igara David ɔsu ayiwa ibɔra gbodzoo ɔbɔrɛgu i Teba gu Berotai simagɛ̃ dzɛ loɖe Xadadezer sire ame.

9 Gɔ i Tou wɔ loɖe Xamat Igara ɔnɔ sɔ David ɔɖe Xadadezer makpakpɛ̃dze ɔɖuɖu iso ne, 10 ɔpia ɔ̃ ɔbirɛrɛĩ Yoram sɔ ɔsɛ ɔ̃aya Igara David mmɔ si ɔtã wũ ɖafe i ɔ̃ iɖeiso i kakpã ame ku Xadadezer, nwɔ loɔkpɛ̃gu Tou kakpã ana. Yoram ɔsore sikãfudza, sikãrɛtɛa gu ayiwa ibɔra ara fiɛ ɔba.

11 Igara David ɔsu ara wagbe ɔɖuɖu ɔsekelera ɔtã Bosate lɛ kumɛgɔ ɔbara sikãfudza gu sikãrɛtɛa ara wa ɔɖuɖu ɔmɔɛ̃ i nɖebi mɛ ɔ̃ɔɖeiso i kakpã ame mmɛ loɖe: 12 Edom gu Moab, Amon, Filistia gu Amalek gu nwa ɔfɔ i Xadadezer, Rexob ɔbibirɛrɛĩ wɔ loɖe Zoba igara kɔrɛ.

13 Gɔ David ɔsɛ ɔ̃aɖoe ma Edomse kukpi kuweo-fafarana i Mma Kagbolomi ame ɔkpese ne, ɔfɔ iyere ɔbua.

14 Ɔsɛ makpakpɛ̃dze kusɛkɔ̃ i Edom karɔ̃ ɔɖuɖu iso fiɛ ma Edomse ɔkpese David maɖabo. Bosate ɔtã David iɖeiso i kakɔi biara ga ɔsɛ.

15 David ɔɖe sigara i Israel ɔɖuɖu iso, ɔbara ara i ɔri iso gu nnɛ loya ɔtã ɔ̃ maturi ɔɖuɖu. 16 Yoab wɔ ɔnyi loɖe Zeruya loɖe kpakpɛ̃dzekpakpa pelepele, Yexosafat, Axilud ɔbibirɛrɛĩ loɖe nwɔ losia ara ikparĩ; 17 Zadok, Axitub ɔbibirɛrɛĩ gu Aximelek, Abiatar ɔbibirɛrɛĩ loɖe masɔrɛdze; Seraya ɔɖe ratsɛrɛdze; 18 Benaya, Yexoyada ɔbibirɛrɛĩ loɖe ma Keretse gu ma Peletse* makpakpa, fiɛ David mabi ɔɖe igara adzuni matãdze.